O mea ua faamamafaina mai i le Konafesi Aoao Lona 186 Faaletausaga o Le Ekalesia a Iesu Keriso o le Au Paia o Aso e Gata Ai

O le sauniga i le taeao o le Aso Toonai o le konafesi aoao ia Aperila na amata i se valaaulia mai ia Peresitene Henry B. Eyring e faamalosiau atu i le au faalogologo ina ia tatalo mo failauga ma aufaipese, ao lei faia ma le taimi o faia ai a latou gaoioiga. Ma i le faaiuga o le konafesi i le aoauli o Aso Sa, sa matauina e Elder Jeffrey R. Holland: “Afai e te vaaia i aso o lumanai atu … ni elemene i lou lava olaga e le o ogatusa ma savali ua e faalogo i ai i le faaiuga o lenei vaiaso, aua ne’i faalotovaivaia lou agaga. … O le mea sili e uiga i le talalelei o le tauia o i tatou mo le taumafai, e tusa lava pe le manuia i tatou i taimi uma” (itulau e 125, 126).

O a latou valaauga e faatino na valoia ma faamalosia le valaau a Peresitene Thomas S. Monson, “A o tatou mafaufau i faaiuga tatou te faia i o tatou olaga i aso taitasi,… afai tatou te filifilia Keriso, o le a tatou faia le filifiliga sa’o” (itulau e 86).

O isi mea na faamamafa mai le konafesi e aofia ai:

• O le faasilasilaga a Peresitene Monson o malumalu fou e fa: i Belém, Pasila; Quito, Ekuatoa; Lima, Peru (o le malumalu lona lua iina); ma Harare, Zimbabwe (tagai i le tala i le itulau e 142).

• O le lagolagoina o au Pulega Aoao fou e toa 11 (o tala o latou soifuaga e amata i le itulau e 131).

• O le lagolagoina o le au peresitene aoao fou o le Peraimeri (o tala o latou soifuaga e amata i le itulau 136).

• O le faasilasilaga o se taumafaiga fou mo tagata taitoatasi ma aiga e aapa atu ai i le lotoifale e fesoasoani i tagata sulufai (tagai i itulau e 13, 111, ma le 141).

• O se taulaiga i sootaga faaleaiga, ae maise lava o matafaioi o alii i le avea ai ma tane, tamā, ma e umia le perisitua.

• Malamalamaaga faale-aoaoga faavae mai failauga, e pei o lenei mai ia Elder Dale G. Renlund: “A tatou latalata atili i le Atua, o le a oo mai le mana fesoasoani o le Togiola a Iesu Keriso i o tatou olaga. Ma, e pei o soo i le ala i Emau, o le a tatou iloaina le faatasi mai o le Faaola i le taimi atoa” (itulau e 42).