Sister Jean B. Bingham

Fesoasoani Muamua, i le Au Peresitene Aoao o le Peraimeri

Mo le toeitiiti atoa le ono tausaga, sa fiafia lava Sister Jean Barrus Bingham e auauna atu i lona valaauga o se aufaatonu aoao o le Peraimeri. Na ia asiasi i aiga o tagata o le ekalesia ma auai atu i Peraimeri, molimauina ai le faatuatua malosi o le Au Paia o Aso e Gata Ai—aemaise le fanau Peraimeri—i le lalolagi atoa.

O Sister Bingham, o le sa lagolagoina talu ai nei o se fesoasoani muamua i le au peresitene aoao o le Peraimeri, na faaaluina le tele o lona ola i le aoao atu, faafaileleina, ma alofa atu i tamaiti. Pe i le taimi ao tuputupu ae ai ma ona tei laiti, o ana fanau teine e toalua, ana fanau teine fai, fanau a fanau, o malo e o atu i lona fale, po o i latou o e na ia feiloai i ai ao avea ma sui o le aufono aoao a le Peraimeri, sa avea o ia ma se fesoasoani ma se puna o le malosi mo le toatele.

“Ua tofu tamaiti ma se gafatia matagofie, ma a tatou vaai atu ia i latou e ala i fofoga o le Tama Faalelagi, e mafai ona tatou fesoasoani ia i latou ia avea uma ai ma tagata na Ia mamanuina i latou e avea ai,” o lana tala lea.

Na soifua mai i le aso 10 o Iuni, 1952, i Provo, Iuta, ISA, ia Edith Joy Clark ma Robert Rowland Barrus, o Sister Bingham o le lona tolu o le fanau e toaiva. Ina ua tolu masina lona matua, sa siitia atu lona aiga i Initiana ina ia mafai ona faaauau pea e lona tama ana aoaoga. I le uluai ono tausaga o lona olaga, sa siitia atu ai Sister Bingham ma lona aiga i ni setete se fa.

Ina ua uma ona faauu mai le aoga maualuga i New Jersey, sa siitia atu Sister Bingham i Provo, Iuta, e auai i le Iunivesite o Polika Iaga. I lona tausaga lona lua iina, sa ia feiloai ai i lona toalua i le lumanai, o Bruce Bryan Bingham, o se tamaitiiti faifaatoaga mai Ilinoi lea sa papatisoina a o talavou ma ona matua. Sa la faaipoipo i le aso 22 o Tesema, 1972, i le Malumalu o Provo Iuta.

O lana auaunaga atoa i le Ekalesia sa aofia ai se taimi o avea ma se peresitene o se Peraimeri a se uarota, peresitene o Tamaitai Talavou, fesoasoani i le au peresitene o le Aualofa, peresitene o Tamaitai Talavou a le siteki, tagata faigaluega o le malumalu, ma se faiaoga seminare i le vaveao.

“Sa ou vaaia lenei mamanu i lona olaga, i le silia ma le 43 o o maua tausaga faaipoipo, o se usiusitai faifai pea i musumusuga a le Agaga,” na fai mai ai Brother Bingham e uiga i lona faletua. “Ua ia faia pea lava pea le mea na finagalo le Alii na te faia.”