O Le Mea ua Faapotopoto ai se Toalua po o se Toatolu

Saunia e Peresitrene Henry B. Eyring

Fesoasoani Muamua i le Au Peresitene Sili

Afai e te faafofoga ma le Agaga, o le a e mauaina le faamalūlūina o lou loto, faamalosia o lou faatuatua, ma le faateleina o lou gafatia e alofa ai i le Alii.

Ou uso e ma tuafafine pele, ou te faafeiloai atu ia te outou i le Konafesi Faaletausaga Lona 186 a Le Ekalesia a Iesu Keriso o le Au Paia o Aso e Gata Ai. Ua ou olioli lava e faatasi ma outou, ma ou te faafeiloai atu ma le alofa.

Ou te faafetai ua outou o mai i le konafesi ia lagonaina musumusuga mai le lagi ma ia lagona le latalata atili atu i lo tatou Tama Faalelagi ma le Alii o Iesu Keriso.

Ua potopoto i lenei sauniga lea o loo faasalalau atu i le lalolagi atoa, le faitau miliona o soo o Iesu Keriso o loo i lalo o le feagaiga ia manatua pea o Ia ma auauna atu ia te Ia. E ala i le vavega o tekinolosi, ua le o toe i ai se eseesega o taimi ma nofoaga mamao. O loo tatou fono e peiseai o loo tatou faatasi uma i se fale tele e tasi.

Ae e sili atu foi ona taua nai lo le tatou potopoto faatasi ai, o le iloa po o le suafa o ai lea tatou te potopoto ai. Na folafola mai e le Alii e tusa lava po o le a le toatele naua o Ona soo i le lalolagi i nei aso, o le a Ia latalata mai lava ia i taotu taitoatasi. Sa Ia fetalai atu i nai Ona soo toalaiti i le 1829, “E moni, e moni, Ou te fai atu ia te oulua, … o le mea e potopoto faatasi ai le toalua po o le toatolu i lo’u igoa, … faauta, o iina o le a Ou i ai i le lotolotoi o i latou—e faapei lava ona Ou i ai ia te oulua” (MF&F 6:32).

Ua silia nei ma le toatasi po o le toalua, o se motu o tagata o Ona soo ua potopoto i lenei konafesi, ma e pei lava ona folafola mai, o loo i ai le Alii i lo tatou lotolotoi. Ona o Ia o se tagata toetu ma faamamaluina, e le mafai ai ona i ai o Ia i la le tino i nofoaga uma e potopoto ai le Au Paia. Ae, e ala i le mana o le Agaga, e mafai ai ona tatou lagonaina o loo i ai o Ia iinei faatasi ma i tatou.

O le nofoaga ma le taimi tatou te lagonaina ai le latalata mai o le Faaola e faalagolago lea ia i tatou taitoatasi. Sa Ia tuu maia lenei faatonuga:

“O lenei foi, e moni Ou te fai atu ia te outou, o a’u uo, Ou te tuu atu nei upu ia te outou tou te mafaufau i ai i o outou loto, faatasi ma le poloaiga lenei Ou te tuu atu ia te outou, ia outou valaau mai ia te a’u manū o Ou latalata atu—

“Faalatalata mai ia te a’u ma o le a Ou faalatalata atu ai ia te outou; saili mai ia te a’u ma le filiga ma o le a outou maua ai a’u; ole mai, ma o le a outou maua ai; tu’itu’i mai, ma o le a tatala atu ai ia te outou” (MF&F 88:62–63).

Ou te iloa ni tagata se toalua o loo faafofoga mai i le asō o e mananao i lena faamanuiaga ma o laua loto atoa. O le a la taumafai ma le naunautai ia faalatalata atili atu i le Alii i lenei konafesi. Sa laua taufai tusi mai ia te au—sa taunuu mai a laua tusi i lo’u ofisa i le vaiaso lava e tasi—ma aioi mai mo le ituaiga lava e tasi o fesoasoani.

O i laua uma o ni tagata liliu mai i le Ekalesia ma na maua muamua ni molimau manino o le alofa o le Atua le Tama ma Lona Alo, o Iesu Keriso, le Faaola o le lalolagi. Sa la iloaina o le Perofeta o Iosefa Samita na faatulagaina le Ekalesia e ala i faaaliga tuusao mai le Atua ma ki o le perisitua paia na toefuatai mai. Sa tofu maua e i laua se molimau ua toe i ai na ki i le Ekalesia i aso nei. Sa laua tuu maia ia te au a la molimau faamaoni i a la tusi.

Ae sa taufai faanoanoa uma i laua ona o o la lagona o le alofa mo le Alii ma Lona alofa mo i laua ua faaitiitia. Sa laua mananao uma, ma o la loto atoa, mo a’u ia fesoasoani atu ia i laua ia toe maua le olioli ma le lagona o le alofaina lea sa la mauaina ina ua la o mai i le malo o le Atua. Sa faailoa mai uma e i laua se popolega e faapea a le mafai ona la toe mauaina le atoatoa o na lagona o le alofa mo le Faaola ma Lana Ekalesia, o tofotofoga ma faaosoosoga la te fetaiai o le a iu ina faatoilalo ai lo la faatuatua.

E le o tuua na o i laua i o la popolega, po o o la tofotofoga foi, o se mea fou. I le taimi o Lana galuega faaletino, sa tuu mai ai e le Faaola ia i tatou le faataoto o le fatu ma le lulusaito. O le fatu o le afioga a le Atua. O le tagata lulu o le Alii. O le ola o le fatu ma lona tuputupu ae sa faalagolago i le tulaga o le eleele. E te manatuaina Ana upu:

“Ua ia lulu saito, ua pau ai isi i le auala, ona o ane lea o manu felelei, ma aai ai:

“Ua pa’u foi isi i le mea papa, e itiiti le eleele sa i ai; ona vave tupu ai lea, ona o le eleele ina itiiti:

“Ua alu ae le la, ua velasia; ona magumagu ai lea, ona ua leai ni aa:

“Ua pa’u foi isi i le vaotuitui, ua tutupu ae foi le vao tuitui, ona fetinaiina ai lea:

“A ua pa’u isi i le eleele lelei, ona fua mai ai lea e taiselau i nisi ma taionogafulu i nisi ma taitolugafulu i nisi.

“O le ua i ai taliga e faalogo ai, ina faalogo mai ia o ia” (Mataio 13:4–9).

E toe faapea atu, o le fatu o le afioga a le Atua. O le eleele o le loto o le tagata e mauaina le fatu.

O i tatou uma e tele mea e tutusa ai ma tagata lelei o e na tusi mai ia te au mo se fesoasoani ma se faamautinoaga. E tofu uma i tatou ma ni fatu, po o le afioga a le Atua, na totoina i o tatou loto i se taimi ua alu. Mo nisi, o le taimi a o tamaitiiti ina ua valaaulia i tatou e o tatou matua ina ia papatisoina ma faamauina e i latou e i ai le pule. O isi o tatou sa aoaoina e ni auauna valaauina a le Atua. Sa taufai lagonaina uma sa lelei le fatu, sa oo lava i le lagonaina o le maena i le loto, ma lagonaina le olioli a o faalauteleina o tatou loto [i le alofa] ma le [malamalama i le] mafaufau.

O i tatou uma ua tofotofoina lo tatou faatuatua e ni faamanuiaga taua na tuai mai, o ni osofaiga matuia a i latou na mananao ia faaumatia lo tatou faatuatua, o faaosoosoga o agasala, ma le manatu faapito na faaitiitia ai a tatou taumafaiga e faafailele ma faamalūlū lagona faaleagaga o o tatou loto.

O i latou ua faanoanoa i le le toe maua o le olioli na latou maua muamua, o tagata faamanuiaina na. O nisi latou te le iloaina le magumagu o le faatuatua i totonu o i latou lava. E atamai Satani. Na te ta’u atu ia i latou ia e manao o ia ina ia pagatia, o le olioli na latou lagonaina muamua o se mea taufaasese faatamaitiiti.

O la’u savali i le asō ia i tatou uma e faapea, o le a i ai se avanoa taua i nai aso o sosoo ai ia filifili ina ia faamalūlūina o tatou loto ma ia maua ma faafaileleina le fatu. O le fatu o le afioga a le Atua, ma o le a liligi mai i luga o i tatou uma o e faalogo, maimoa, ma faitau i taualumaga o lenei konafesi. O musika, o lauga, ma molimau ua sauniaina e auauna a le Atua o e na saili atu ma le filiga mo le Agaga Paia e taialaina i latou i a latou sauniuniga. Sa latou tatalo umi ma lotomaualalo atili a o tulalata mai i aso o le konafesi.

Sa latou tatalo ina ia maua le mana e uunaia ai outou ia faia ni filifiliga ia o le a fatufatua’i ai i totonu o o outou loto se eleele sili atu ona lauusiusi mo le afioga lelei a le Atua e ola ai ma fuatele mai. Afai e te faafofoga ma le Agaga, o le a e mauaina le faamalūlūina o lou loto, faamalosia o lou faatuatua, ma le faateleina o lou gafatia e alofa ai i le Alii.

O lau filifiliga e tatalo atoa ma se faamoemoega atoa o le loto o le a liua ai lou aafiaga i sauniga o le konafesi ma i aso ma masina e sosoo ai.

E toatele outou ua amata. I le amataga o lenei sauniga, sa outou faia se mea e sili atu nai lo le na o le faafofoga i le tatalo; na e faaopoopo atu lou faatuatua i aioiga ina ia tatou olioli i faamanuiaga o le mauaina o le Agaga Paia e liligi mai i o tatou luga. A o e faaopoopo atu lau aioiga leleoa i le suafa o Iesu Keriso, ua e faalatalata atili atu ia te Ia. O Lana konafesi lenei. Ua na o le Agaga Paia lava Na te aumaia faamanuiaga e finagalo i ai le Alii mo i tatou. I Lona alofa mo i tatou, ua Ia folafola mai ai e mafai ona tatou lagonaina:

“O soo se mea o le a latou tautala atu ai pe a uunaia ai e le Agaga Paia, o tusitusiga paia ia, o le finagalo lea o le Alii, o le mafaufau lea o le Alii, o le afioga lea a le Alii, o le siufofoga lea o le Alii, ma o le mana lea a le Atua mo le olataga.

“Faauta, o le folafolaga lenei a le Alii ia te outou, E outou e o a’u auauna.

“O le mea lea, ia fiafia, ma aua le fefefe, aua o A’u o le Alii ua Ou faatasi ma outou, ma o le a tu i tafatafa o outou; ma o le a outou molimau atu A’u, o Iesu Keriso lava, o A’u o le atalii o le Atua soifua, ma sa ou i ai ma o loo Ou i ai, ma o le a Ou alu atu” (MF&F 68:4–6).

E mafai ona e tatalo ma faaopoopo atu lou faatuatua i taimi taitasi e alu atu ai se auauna a le Atua i le pulelaa ina ia faataunuu le folafolaga a le Alii i le Mataupu Faavae ma Feagaiga vaega e 50:

“E moni Ou te fai atu ia te outou, o ia o le ua Ou faauuina ma auina atu e talai le afioga o le upumoni e ala i le Faamafanafana, i le Agaga o le upumoni, e talai atu ea e ia i le Agaga o le upumoni po o se isi ala?

“Ma afai e talai atu i se isi ala ua le mai i le Atua.

“O lenei foi, o ia o le e talia le afioga o le upumoni, e talia ea e ia e ala i le Agaga o le upumoni po o se isi ala?

“Afai e talia i se isi ala ua le mai i le Atua.

“O lea, aisea ua le mafai ai ona outou malamalama ma iloa, o ia o le e mauaina le afioga e ala i le Agaga o le upumoni e maua e ia e pei ona talai atu ai le Agaga o le upumoni?

“O le mea lea, o ia o le e talai atu atoa ma ia o le e mauaina, e malamalama i le tasi, ma e faagaeetiaina ma olioli faatasi i laua uma” (MF&F 50:17–22).

E mafai ona e tatalo a o sauni le aufaipese e pepese. O le taitai pese, o taokeni, ma tagata o le aufaipese na tatalo ma faataitai atoa ai ma se tatalo i o latou loto ma faatasi ai ma le faatuatua o le a faamalūlūina e musika ma upu ni loto ma faalauteleina lo latou mana e fausia ai le faatuatua o isi. O le a latou faatinoina mo le Alii e peiseai o loo latou vivii i Ona luma, ma o le a latou iloaina e faafofogaina e lo tatou Tama Faalelagi i latou e pei lava ona mautinoa Na te faafofogaina a latou tatalo faaletagata lava ia. Sa latou galulue faatasi ma le alofa ia tino moni mai le folafolaga a le Faaola ia Ema Samita: “Aua e fiafia lo’u agaga i le pese a le loto; ioe, o le pese a e amiotonu o se tatalo mai ia te a’u, ma o le a talia ma se faamanuiaga i luga o o latou ulu” (MF&F 25:12).

Afai e le na o lou faafofoga ae tatalo foi a o latou pepese, o le a taliina au tatalo ma a latou tatalo i se faamanuiaga i luga o lou ulu faapea foi ma o latou ulu. O le a e lagonaina le faamanuiaga o le alofa o le Faaola ma le faamaoniga. O e uma e aufaatasi i lena viiga o le a lagonaina le faatuputeleina o lo latou alolofa mo Ia.

E mafai ona e filifili e tatalo a o agai ina faaiuiu e se failauga lana savali. O le a tatalo o ia i lona loto i le Tama ina ia tuu atu e le Agaga Paia i lana molimau ni upu o le a siitia ai loto, faamoemoe, ma le naunautaiga o e faafofoga ina ia manatua pea le Faaola ma tausi i poloaiga ua Ia tuuina mai ia i tatou.

O le molimau o le a le toe ta’ua ai mea na ta’ua i le savali. O le a avea ma se faamautuuga o nisi o upumoni e mafai ona molioo atu e le Agaga i loto o i latou o le a tatalo mo se fesoasoani, mo se taitaiga faalelagi, ma ia maua ai le alofa le pona o Keriso.

O le molimau moni o le a tuuina atu i failauga. Atonu o le a le tele ni a latou upu, ae o le a molioo atu i le loto o le tagata e faafofoga ma le lotomaualalo, o sē na sau i le konafesi ma le matelaina mo le afioga lelei a le Atua.

Ua ou iloa mai aafiaga le mea e mafai ona faia e le faatuatua o tagata lelei e aumai ai upu mai le Agaga i le faamaeaina o se lauga. E sili atu ma le faatasi, na faapea mai ai se tasi ia te a’u i le maea ai o sa’u molimau, “Na faapefea ona e iloa le mea sa matua ou manaomia ona faalogo i ai?” Sa ou aoao ia aua nei faateia pe a le mafai ona toe manatuaina upu na fai atu. Sa ou tautala atu ni upu o le molimau, ae sa i ai le Alii iina, ma tuuina mai ia te a’u i lena lava taimi. O le folafolaga o le a tuu mai e le Alii ia i tatou ni upu i le taimi tonu, e faatatau faapitoa i le molimau (tagai MF&F 24:6). Faafofoga ma le totoa i molimau e tuuina atu i lenei konafesi—o le a e lagona ai le latalata atili i le Alii.

E mafai ona e lagonaina lo’u oo atu i lea taimi o le a ou faaiuina ai le savali o loo ou taumafai e faamatala atu i se molimau o le upumoni. O le a fesoasoani a outou tatalo ia te au ia tuu atu ni upu o le molimau e mafai ona fesoasoani i se tasi o loo naunau mo se tali i ana fesili.

Ou te tuu atu ia te outou la’u molimau mautinoa e faapea, e alofa ma silafia e lo tatou Tama Faalelagi, le Elohima sili i tatou, ma tagata uma. I lalo o Lana taitaiga, sa avea ai Lona Alo, o Ieova ma Foafoa. Ou te molimau atu o Iesu o Nasareta sa soifua mai o le Alo o le Atua. Sa Ia faamalolo i e mamai, faapupula i e tauaso, ma faatulai mai e na oti. Sa Ia totogia le tau o agasala uma a fanau taitoatasi a le Tama Faalelagi e fananau mai i le olaga faaletino. Sa Ia talepeina noataga o le oti mo tagata uma ina ua toetu mai o Ia nai le tuugamau i lena uluai Aso Sa o le Eseta. O loo soifua o Ia i le asō, o se Atua—ua toetu ma le mamalu.

E na o le pau lenei o le Ekalesia moni, ma o Ia o lona maatulimau. O Thomas S. Monson o Lana perofeta i le lalolagi atoa. O perofeta ma aposetolo o le a outou faafofoga i ai i lenei konafesi e lauga atu mo le Alii. O i latou o Ana auauna, ua faatagaina e galulue mo Ia. E taitai e Ia Ana auauna i le lalolagi. Ou te iloaina lenei mea. Ma ou te molimau atu ai i Lona suafa, le suafa paia o Iesu Keriso, amene.