Elder Mark A. Bragg

Fitugafulu o le Pulega Aoao

Ina ua 14 tausaga o Mark Bragg, na faailoa atu e ana uo mai lana au peisipolo lona aiga i le Ekalesia. Sa papatisoina Mark, ma sa toe toaga mai lona tina.

“Sa suia ai o matou olaga,” o le tala lea a Elder Bragg.

Sa soifua mai Mark Allyn Bragg i le aso 16 o Aperila, 1962, i Santa Monika, Kalefonia, ISA, ia Donald E. ma Diane Bragg.

A o auai i le Iunivesite o Iuta, sa valaauina ai Elder Bragg e auauna atu i le Misiona a Mekisiko Monterrey, i lalo o le taitaiga a le peresitene o misiona o Roy H. King ma lona faletua, o Darlene O. King.

Ina ua maea le galuega faafaifeautalai a Elder Bragg, sa amata ona ia tafao faamasani ma le afafine laitiiti o lana peresitene o le misiona, o Yvonne. Sa la faaipoipo i le Malumalu o Los Angeles Kalefonia i le aso 17 o Mati, 1984.

Ina ua mavae le maliu faafuasei o le tama o Elder Bragg, sa toe foi atu le ulugalii i Kalefonia e amata ai lana galuega i le faletupe (sa faamaeaina lana galuega o se sui peresitene sinia o le Faletupe o Amerika) ma ina ia latalata atu ai i le tina o Elder Bragg.

E fitu tausaga ae faatoa mafai ona auai mai ni fanau i le aiga o Bragg. “E i ai taimi sa ma lagonaina ai le faaesea, e oo lava i o maua aiga,” o le tala lea a Elder Bragg.

Ona oo lea—“i se aso sili ona lelei i le lalolagi”—na fanauina ai e Sister Bragg le ma pepe muamua o le fanau e toafa. “Ou te manatua… le mafaufau ai e leai se isi ua sili atu le fiafia nai lo au i lena lava taimi,” o le tala lea a Elder Bragg.

Sa lei faigofie i taimi uma le olaga mo le aiga, ae ui i lea. I le aso ina ua mavae le lagolagoina o Elder Bragg o se epikopo i le uarota lea sa ia soifua ae ai, na matautia le maliu o lona tina i se taumafaiga e ave faamalosi lana taavale. O lona falelauasiga o le maliu muamua lea na ia pulefaamalumalu ai o se epikopo. “Sa i ai iina le Aualofa mo lo matou aiga i aso uma,” o lana tala lea.

O na lesona o le alofa, auaunaga, ma le tiga alofa o le a taitaia Elder Bragg i ana auaunaga i le lumanai i le Ekalesia—o se peresitene o le siteki, Fitugafulu Eria, ma se tagata fai faigaluega o le malumalu.