Elder Massimo De Feo

Fitugafulu o le Pulega Aoao

I se taimi puupuu ao lei taliaina lona valaauga faafaifeautalai, sa aoaoina ai e Elder Massimo De Feo ni lesona autu o le ositaulaga a le alofa mai lona tama, o Vittorio De Feo.

Sa itiiti ni punaoa tautupe a le aiga a De Feo, ma e lei lolotu Vittorio ma lona faletua, o Velia. Peitai sa faaaloalo De Feo matua i le manao o lona atalii e faasoa atu le talalelei.

“Na fesili mai lo’u tama ia te au, ‘E te manao moni lava e faia lenei mea?” na manatuaina e Elder De Feo. “Sa ou fai atu, ‘Ioe, ou te manao e auauna atu i le Alii ma lo’u loto atoa.”

Na folafola atu e Vittorio o le a ia faia mea uma na te mafaia e fesoasoani ai e totogi le tupe o le galuega e lua tausaga a lona atalii i le Misiona a Italia Roma.

“Ou te mafaufau i lena tupe o se mea paia—o le fua o se osigataulaga tele mai i se tamalii e lei talitonu i le Ekalesia,” o le tala lea a Elder De Feo. “O lea sa ou auauna atu ai i lau misiona ma lo’u loto atoa, manatu, mafaufau, ma le malosi ona sa ou alofa i le Alii, ma sa ou alofa i lo’u tama.”

O mataupu faavae o le talalelei e pei o le ositaulaga, galue malosi, aiga, ma le auaunaga na fesoasoani e faamatala ai Elder De Feo.

Sa soifua mai i Taranto, Italia, i le aso 14 o Tesema, 1960, na iloa e Massimo De Feo le Ekalesia i le iva o tausaga ina ua tuitui atu ni faifeautalai se toalua i le faitotoa o lona fale. E le’i umi ae papatisoina loa ia Massino ma lona uso matua, o Alberto.

Sa fiafia le auuso De Feo i le alofa ma le lagolagosua a taitai tuuto o le paranesi a o la auai i le Peraimeri ma, mulimuli ane, i le Mutuale. Na faia foi e Massimo ni uo mo le olaga atoa ma isi talavou i le paranesi—e aofia ai se uo na liliu mai o Loredana Galeandro, o le o le a ia faaipoipo i ai pe a maea lana misiona. Sa la faamau i le aso 14 o Aukuso, 1984, i le Malumalu o Bern Suisilani. E toatolu alo a le au De Feos.

A o lei avea ma se Fitugafulu o le Pulega Aoao, sa nofo Elder De Feo i Roma ma faigaluega ai i le silia ma le 30 tausaga mo le Matagaluega o le Setete a le I.S. Sa ia auauna atu o se peresitene o se paranesi, peresitene o se itu, peresitene o se siteki, ma se Fitugafulu Eria.