O Se Tiutetauave Paia

Saunia e Peresitene Thomas S. Monson

O lenei meaalofa taua o le mana o le perisitua e aumai ai faatasi e le gata o tiutetauave paia ae faapena foi faamanuiaga faapitoa mo i tatou lava ma mo isi.

Ou uso e pele, ou te tatalo mo le Agaga e taiala la’u tautalaga i lenei afiafi. O se nonoa e tasi o loo noatia faatasi ai i tatou. Ua faatuatuaina i tatou e tauave le perisitua a le Atua ma ia galulue i Lona suafa. O i tatou o e ua mauaina se tiutetauave paia. Ua tele mea ua faamoemoeina mai ia i tatou.

Ua tatou faitau i le Mataupu Faavae ma Feagaiga, vaega 121, fuaiupu 36, “O aia a le perisitua ua fesootai e le mavavaeeseina ma mana o le lagi.” Oka se meaalofa ina a matagofie ua tatou mauaina. O lo tatou tiutetauave o le malutia lea ma le puipuia o lena perisitua ma ia agavaa mo faamanuiaga mamalu uma a lo tatou Tama i le Lagi ua Ia faapolopoloina mo i tatou—ma mo isi e auala atu ia i tatou.

Po o fea lava e te alu i ai, e alu ai foi ma lou perisitua. O e tu ea i nofoaga paia? A o lei e tuua oe lava ma lou perisitua i se tulaga lamatia i le alu i nofoaga po o le auai i ni gaoioiga e le agavaa ai oe po o lena perisitua, ia toe taofi lava ma mafaufau i ona taunuuga. Manatua po o ai oe ma le tagata ua faamoemoeina oe e le Atua e te avea ai. O oe o se tamaitiiti o le folafolaga. O oe o se alii o le malosi. O oe o se atalii o le Atua.

O lenei meaalofa taua o le mana o le perisitua e aumai ai faatasi e le gata o tiutetauave paia ae faapena foi faamanuiaga faapitoa mo i tatou lava ma mo isi. Tau ina ia tatou agavaa i taimi uma, i soo se nofoaga atonu tatou te i ai, e valaau atu i ona mana, aua tatou te le iloa lava le taimi tatou te manaomia ai ma lo tatou avanoa e faaaoga ai.

I le taimi o le Taua Lona Lua a le Lalolagi, sa auauna atu sa’u uo i le Pasefika i Saute ina ua fanaina i lalo lana vaalele ma pa’u ifo ai i le vasa. Sa parasuti ese ma le manuia o ia ma isi o lana vaega mai le vaalele na mu, feula a latou vaafaaola, ma faaopeopea ai i na vaafaaola mo aso e tolu.

I le aso lona tolu na latou vaai atu ai i se mea na latou iloaina o se vaa laveai. Sa pasia i latou. O le isi taeao na sosoo ai na toe pasia foi i latou. Sa amata ona latou faanoanoa aua na latou iloaina o le aso mulimuli lea e i ai le vaa laveai i lena [ogasami].

Ona fetalai atu lea o le Agaga Paia i la’u uo: “O loo ia te oe le perisitua. Poloai le au laveai ia piki outou i luga.”

Sa ia faia e pei ona uunaia ai: “I le suafa o Iesu Keriso ma i le mana o le perisitua, toe liliu mai e piki atu i matou.”

I ni nai minute ae tu mai le vaa i o latou talaane, ma fesoasoani ia i latou i luga o le vaa. O se na umia ma le faamaoni ma le agavaa le perisitua, i ona tulaga sili ona faigata, na faaaogaina lena perisitua, e faamanuiaina ai lona olaga, ma olaga o isi.

Tau ina ia tatou filifili, iinei ma i le taimi nei lava, ia matuai saunia mo o tatou taimi o mafatiaga, o tatou taimi o auaunaga, o tatou taimi o faamanuiaga.

A o tatou faamaeaina ai lenei sauniga aoao o le perisitua, ou te fai atu ia te outou, o outou “o le tupulaga ua filifilia outou, o tupu ma ositaulaga” (1 Peteru 2:9). Tau ina ia tatou matuai agavaa mo nei mamalu faalelagi, ou te tatalo ai ma lo’u loto atoa i le suafa o Iesu Keriso, lo tatou Faaola, amene.