O Se Meaalofa Taiala a le Tamaitiiti
Saunia e Mary R. Durham
Fesoasoani Lua i le Au Peresitene Aoao o le Peraimeri na Faamalolo Talu Ai Nei
E faapefea ona tatou aoao i latou e tuuese faatosinaga a le lalolagi ma faalagolago i le Agaga
O se tama talavou sa magoto moni lava. Sa savavali o ia, o lana fanau e toalua, ma lona tama faaletulafono i se vaituloto. Sa siomia i latou e mauga e ufitia i laau paina matagofie, ma le lagi sa lanumoana, na faatumulia i ao papae filemu, na tuuina mai le matagofie ma le toafilemu. Ina ua faasolo ina vaivai ma vevela tamaiti, sa filifili [nei] alii e toalua e tuu tamaiti i o la papatua ma aau i le mamao puupuu i le isi itu o le vaituloto.
Sa foliga mai e faigofie lava—seia oo i le taimi na amata ai ona lagona e le tama le tosoina [o ia] i lalo, o mea uma sa avea o ni mea mamafa. Sa tulei o ia e le vai i le pito i lalo o le vaituloto, ma sa oo mai se lagona popole ia te ia. E faapefea ona ia faaopeopea pea—ma faia faapena faatasi ai ma lona afafine laitiiti faapelepele i lona papatua?
Sa le lagona lona leo i le mamao ao ia tauvalaau atu; sa mamao tele lona tama faaletulafono e lagona o ia ma tali mai i lana augani faatauanau mo se fesoasoani. Sa ia lagona le tuuatoatasi ma le tuuaunoaina.
E mafai ona e vaai faalemafaufau i le lagona ai o le tuuatoatasi e pei ona ia lagonaina, ma le le mafai ona aapa atu i se mea e pipii i ai ma tauivi ai i se tulaga o le leai o se faamoemoe ina ia e soifua ma ola lau tama? Ae paga lea, tatou te oo uma i sina vaega o lenei lagona pe a tatou i ai i ni tulaga tatou te matuā manaomia ai le saili mo le fesoasoani ina ia ola ma faasaoina i latou tatou te alolofa i ai.
I le latalata ai i le fefe, sa iloa ai o ona seevae ua pala i le vai sa tosoina o ia i lalo. Ao galue ai ina ia faaopeopea pea, sa amata ona ia taumafai e talai ese ona seevae mamafa mai ona vae. Ae sa peiseai o loo pipii faatasi ma le malosi. Sa putaputa nonoa o seevae i le vai, ma atili ai ona mau.
I le mea na foliga mai o lona taimi mulimuli o le fefe, sa ia mafai ona aveese seevae mai ona vae, ma na iu ai na faamaamulu le pipii ai o seevae, ma pauu vave i le pito i lalo o le vaituloto. I le saoloto ai mai le avega mamafa sa tosoina o ia i lalo, sa vave ona ia uunai a’e o ia lava ma lona afafine i luga. Ua mafai nei ona ia aau atu i luma, agai atu i le saogalemu i le isi itu o le vaituloto.
I nisi o taimi atonu tatou te lagona uma le pei o loo malelemo. E mafai ona lofituina le olaga. “O se lalolagi pisa ma le pisi lenei o loo tatou ola ai. Afai tatou te lē faaeteete, e mafai e mea o lenei lalolagi ona suitulaga i mea a le Agaga.”1
E faapefea ona tatou mulimuli i le faataitaiga a lenei tama ma tuuese ni mea o le lalolagi o loo tatou tauaveina—ina ia le lofituina i tatou i mea a le lalolagi? E pei ona apoapoai mai Paulo, e mafai faapefea ona tatou, “tuu ese ia o mea mamafa uma”?2 E mafai faapefea ona tatou saunia o tatou fanau mo le aso o le a le mafai ona latou faalagolago mai ia i tatou ma o tatou molimau—pe afai o i latou o loo feausi?
E oo mai se tali pe a tatou iloaina lenei puna paia o le malosi. O se puna lava e masani ona lē faatauaina, ae e mafai ona faaaoga i aso uma e faamāmā ai a tatou avega ma taitai ai o tatou fanau faapelepele. O lena puna o le meaalofa taiala o le Agaga Paia.
I le valu tausaga, e mafai ona aafia fanau i le papatisoga. Latou te aoao e uiga ma osia se feagaiga ma le Atua. O i latou, latou te alolofa i ai e siomia i latou ao latou o ifo ma o a’e i le vai papatisoga ma se lagona o le olioli sili. Ona latou maua lea o le meaalofa lēmafaamatalaina a le Agaga Paia, o se meaalofa e mafai ona taitai pea i latou ao latou soifua ai mo lena faamanuiaga.
Ua saunoa mai Elder David A. Bednar: “O le faigofie o lenei [faamauga] atonu e afua ai ona tatou le iloa lona taua. O upu nei e fa—‘Talia le Agaga Paia’—e le o se faamatalaga e toe tau faaupu; ae ua i ai se faatonuga faaleperisitua—o se apoapoaiga faapoloaiga e filifili ai ae le tau galueaiina.”3
E i ai i fanau se manao masani e faia le lelei ma ia avea ma lelei. E mafai ona tatou lagona lo latou mama, lo latou mama a’ia’i. Latou te maua foi se lagona maoae i le leo itiiti ma le filemu.
I le 3 Nifae 26, sa faaali mai e le Faaola ia i tatou le malosi faaleagaga o fanau:
“Ma ia tatala o latou laulaufaiva, ma sa latou tautatala atu i o latou tamā mea tetele ma le ofoofogia, sa silisili atu lava ona tetele i lo mea na ia faaali atu i le nuu. …
“… Sa latou vaai ma lagonaina nei fanau; ioe, e oo lava i pepe sa tatalaina o latou gutu ma tautala mai i mea ofoofogia.”4
E faapefea e tatou o matua ona faateleina le malosi faaleagaga o o tatou fanau iti? E faapefea ona tatou aoao i latou e tuuese faatosinaga a le lalolagi ma faalagolago i le Agaga pe a tatou le i ai faatasi ma i latou ma ua na o i latou i taimi faigata o o latou olaga?
Sei ou faasoa atu ni manatu.
Muamua, e mafai ona tatou faia ia nofouta a tatou fanau pe a latou faafofoga ma lagona le Agaga. Sei o tatou toe vaai i tua i le talafaasolopito o le Feagaiga Tuai e iloa ai pe na faapefea ona faia e Eli lea lava mea mo Samuelu.
E faalua ona faalogoina e Samuelu talavou se leo ma tamoe atu ia Eli, ma faapea atu, “O a’u lenei.”
“Ou te lei valaau,” o le tali lea a Eli.
Ae o “Samuelu e lei oo ina iloa e ia Ieova, e lei faaalia foi ia te ia le afioga a Ieova.”
E oo atu i le taimi lona tolu, na iloa e Eli, sa valaau le Alii ia Samuelu ma fetalai atu ia Samuelu e faapea atu, “Fetalai mai ia, Ieova e; aua o loo faalogologo atu lau auauna.”5
Sa amata ona lagona, iloa, ma gauai atu i le siufofoga a le Alii. Ae o lenei tama talavou, e lei amata ona malamalama seia oo ina fesoasoani Eli ia te ia e iloaina lenei mea. Ma i le aoaoina ai, sa mafai e Samuelu ona masani atili i le leo itiiti ma le filemu.
Lua, e mafai ona tatou saunia o tatou aiga ma o tatou fanau ia lagona le leo itiiti ma le filemu. “E toatele faiaoga o gagana eseese e talitonu e pito i aoaoina lelei lava e tamaiti se gagana i le auala o le ‘faatofu,’ lea e vagaia ai i latou e isi e tautatala i lena gagana ma fai atu ia tautatala ai foi i latou i lena gagana. E le na o lo latou aoao e fai atu ni upu, a ia tautatala lelei ai foi i lena gagana ma ia mafaufau foi i le gagana fou. O le nofoaga tatau e ‘faatofu’ lelei ai i aoaoga faaleagaga, o le aiga, lea e mafai e mataupu faaleagaga ona faatuina se faavae e ola ai i aso taitasi.”6
“Ia e matua aoao soo [afioga a le Alii] i lau fanau, ma ia e tautalatala a’i, pe a e nofo i lou fale, pe a e savali foi i le ala, pe a e taoto, pe a ae tulai foi.”7 O le faatofuina o o tatou aiga i le Agaga o le a maua ai pea e a tatou fanau Lona uunaiga.
Tolu, e mafai ona tatou fesoasoani i a tatou fanau ia malamalama i le auala e talanoa mai ai le Agaga ia i latou. Sa aoao mai Iosefa Samita: “Afai e Na te oo mai i se tamaitiiti laitiiti, o le a Ia fetuunaia o ia lava i le gagana ma le malosi o le tamaitiiti laitiiti.”8 Sa iloa e se tasi o tina e faapea, talu ai ona e eseese le aoao a fanau—o nisi e aoao mai i mea e vaavaai i ai, e ala i le faalogo, e ala i le pa’i atu i mea, pe e ala i le lagonaina—o le tele sa ia matauina ai lana fanau, o le tele na ia iloa ai e aoao e le Agaga Paia lana fanau i auala e sili ai ona aoaoina taitoatasi.9
Sa faasoa mai e se isi tina se aafiaga o le fesoasoani i lana fanau e aoao ia iloa le Agaga. “O nisi taimi,” sa ia tusia, “o [fanau] e le iloa o se manatu e oo mai pea, o se lagona o le lagolelei pe a maea ona latou fetagisi, po o le manatuaina o se mea i lena taimi sao, o auala uma e fesootai mai le Agaga Paia [ma i latou].” Sa ia faaauau, “O loo ou aoaoina lau fanau e taulai atu i mea latou te lagonaina [ma ona galue lea i ai].”10
O le lagonaina ma le iloaina o le Agaga o le a aumaia le malosi faaleagaga i totonu o olaga a o tatou fanau, ma o le leo e oo ina latou iloaina o le a sili ona manino ma silisili ona manino ia i latou. O le a pei ona saunoa mai Elder Richard G. Scott: “A o e mauaina le poto masani ma le manuia e ala i le taitaiga a le Agaga, o lou talitonu maua’i i uunaiga e te maua, e mafai ona mautinoa atili nai lo lou faalagolago i mea e te vaai pe faalogo i ai.”11
E le manaomia ona tatou fefefe a o tatou vaai i a tatou fanau o ulufale i vai o le olaga, aua sa tatou fesoasoani ia i latou e tuuese i latou lava mai mea faalelalolagi. Sa tatou aoao i latou e soifua mo le meaalofa taiala o le Agaga. O le a faaauau pea ona faamamaina e lenei meaalofa le mamafa o loo latou tauaveina ma toe taitai atu i latou i lo latou aiga faalelagi, pe a latou soifua ai ma mulimuli i ana musumusuga. I le suafa o Iesu Keriso, amene.