I Le Laveai: E Mafai ona Tatou Faia
Saunia e Elder Mervyn B. Arnold
O Le Fitugafulu
Ua saunia e le Alii meafaigaluega uma e manaomia mo i tatou e o ai e laveai mai a tatou uo ua le o toe toaaga mai ma e le lolotu.
Na malamalama manino lava le Faaola i Lana misiona e laveai fanau a le Tama Faalelagi, aua na Ia tautino mai:
“Aua ua sau le Atalii o le tagata e faaola i le na le iloa. …
“[ Aua] e faapea lo outou Tama o i le lagi, e le finagalo ia ina ia fano se tasi o i latou nei e faatauvaa.”1
Na silafia lelei e lo’u tina alofa, o Jasmine Bennion Arnold, lana matafaioi e fesoasoani i le laveaiina o le mamoe ua manua pe ua leiloa a lo tatou Tama Faalelagi, e aofia ai lana lava fanau ma fanau a fanau. O se matafaioi matagofie lea e faia e matua matutua i olaga o fanau a fanau.
E masani lava ona tofi Tina e faiaoga asiasi ia i latou o tauivi ma o latou faatuatua, tagata ua le o toe toaaga mai ma tagata e le auai o latou aiga; ae na aafia i lana vaega isi ia e lei tofia o ia e asia. E masani lava o ana asiasiga e le na o le faatasi i se masina, ao ia faalogo atu ma le filemu, auauna atu i e mamai ma avatu ni faamalosiauga agaalofa. O nai masina mulimuli o le soifuaga o Tina, sa faataotolia ai o ia i le fale, o lea sa ia faaaluina le tele o taimi e tusi ai ia i latou ni tusi, faailoa atu lona alofa, tuu atu lana molimau, ma uunaia i latou na o mai e asiasi.
A tatou o i le laveai, e aumai e le Atua ia i tatou le malosi, faamalosiauga, ma faamanuiaga. Ina ua Ia poloaiina Mose e laveai le fanauga a Isaraelu, sa fefe Mose, e pei o le toatele o i tatou. Sa fai ma alofaga a Mose le fai atu, “O a’u … e le iloa fai lauga, … ua le matala lo’u gutu, ua le matala foi lo’u laulaufaiva.”2
Na faamautinoa atu e le Alii ia Mose:
“O ai ea na na faia le gutu o le tagata? … E le o a’u ea o Ieova?
“O lenei, alu ia oe; o a’u foi ou te faatasi ma lou gutu, ou te aoao atu foi ia te oe i upu e te tautala atu ai.”3
O le mea moni lava, na tau atu e le Alii ia Mose, “E mafai ona e faia!” Ma e tou te iloa, e mafai foi ona matou faia!
Sei ou faasoa atua ni mataupu faavae se fa o le a fesoasoani i a tatou taumafaiga o le laveai.
Mataupu Faavae 1: E Le Tatau Ona Faatuai Le Tatou O e Laveai
Sa faamatala e Elder Alejandro Patania, o le sa avea muamua ma Fitugafulu Eria, le tala i lona uso laitiiti, o Tanielu, o le sa folau i le sami e fagota ma lana auvaa. Ina ua mavae se taimi, na maua e Tanielu se lapataiga faafuasei o loo agai vave mai se matagi malosi. I le taimi lava lena, sa toe foi ai Tanielu ma lana auvaa.
Ao faateteleina le matagi, na pe le afi o se vaa na lata ane. Sa faapipiiina e le auvaa a Tanielu se uaea malo i le vaa ua faaletonu ma tosoina mai i le vaega saogalemu. Sa latou valaau atu mo se fesoasoani, i le iloaina lea, o le faateteleina o le matagi, latou te manaomia ai se fesoasoani vave.
Ao faatalitali ma le popole e e pele, sa feiloai sui mai i leoleo o le talafatai, asosi a tagata faifaiva, ma le neivi e fuafua le metotia sili mo le laveai. Na mananao nisi e o loa i le taimi lava lena ae sa fai i ai e faatali mo se fuafuaga. Ao faaauau pea ona aioi mai i latou sa aafia i le matagi mo se fesoasoani, sa faaauau pea le fono a sui, taumafai ia malilie i se faiga ma se fuafuaga talafeagai.
Ina ua uma ona faatulagaina se vaega laveai, na oo mai se valaau popole mulimuli e tasi. O le malosi o le matagi ua motu ai le uaea malo nai le va o vaa e lua, ma sa toe foi le auvaa a Tanielu e vaai pe mafai ona latou faasaoina a latou uo faifaiva. I le iuga, na goto uma vaa e lua ma o a laua auvaa, e aofia ai le uso a Elder Patania o Tanielu na maliliu.
Sa faatusaina e Elder Patania lenei faalavelave i le aoaiga a le Alii ina ua Ia fetalai mai: “Ua outou le faamalosia e ua vaivai, … [po o] le ua tulia ua outou le toe aumaia, … [po o] le ua se ua outou le sailia; … ou te sueina atu foi lau lafu ia te outou.”4
Sa faamatalaina e Elder Patania faapea, e ui e tatau ona tatou faatulagaina a tatou aufono, korama, ausilali, faapea foi ma tagata taitoatasi, e le tatau lava ona faatuai lo tatou o e laveai. O nisi taimi e pasi ai le tele o vaiaso ao la e lava o loo tatou talanoa i auala e fesoasoani ai i aiga po o tagata taitoatasi o i ai ni manaoga faapitoa. Tatou te mafaufau ma le faaeteete po o ai o le a asia i latou ma auala e faia ai. Ao lena taimi, o loo faaauau pea ona manaomia ma o nisi taimi o valaau mai ma aioi mai o tatou uso ma tuafafine ua leiloloa mo se fesoasoani. E le tatau ona tatou faatuai.
Mataupu Faavae 2: E Le Tatau Lava Ona Tatou Faavaivai
Na saunoa mai Peresitene Thomas S. Monson, i se valaau manino e o i le laveai, “E manaomia e o tatou tagata le faamanatu atu e le o tuai tele pe a faatatau i … tagata ua le o toe toaaga mai … o e sa mafai ona faamoemoeina o se mafuaaga ua leai se faamoemoe.”5
E pei o le toatele o outou, sa ou faasoa atua le talalelei i nisi e le o toe mamao ae papatiso pe faamalosi mai, ma isi—e pei o la’u uo le lotu o Tim ma lona faletua e le toaga, o Charlene, e tele se taimi e alu ai.
Mo le silia ma le 25 tausaga sa ou talanoa ai ia Tim i le talalelei ma ave Tim ma Charlene i fale tatala o le malumalu. Sa auai isi i le laveai; ae peitai, na teena e Tim valaaulia uma na faia e feiloai ai ma faifeautalai.
I se tasi o faaiuga o le vaiaso sa tofia ai a’u e pulefaamalumalu i se konafesi faalesiteki. Sa ou talosagaina le peresitene o le siteki e anapogi ma tatalo e uiga i se tasi e tatau ona matou asia. Sa ou ofo ina ua ia tuuina mai ia te a’u le igoa o la’u uo o Tim. Ina ua tuitui le epikopo a Tim, le peresitene o le siteki, ma a’u i le faitotoa, sa tatala e Tim, tilotilo mai ia te a’u, tilotilo i le epikopo, ona fai mai lea, “Epikopo, sa ou faapea na e ta’u mai ia te a’u o le a e aumaia se tagata faapitoa!”
Ona ata lea o Tim ma fai mai, “Sau i totonu, Merv.” Sa tupu se vavega i lena aso. Ua uma ona papatiso nei Tim, ma ua faamauina o ia ma Charlene i le malumalu. E le tatau ona tatou faavaivai.
Mataupu Faavae 3: E Matua Tele Lava Lou Olioli Pe A E Aumaia Se Agaga E Toatasi ia Keriso
O le tele o tausaga ua mavae i se konafesi aoao, sa ou lauga ai i le ala na malamalama ai José de Souza Marques i le fetalaiga a le Faaola faapea “afai e i ai se tagata i totonu o outou ua malosi i le Agaga, ia tuu atu ia te ia na te ave faatasi ma ia lē ua vaivai, ina ia … faamalosia foi o ia.”6
Na silafia e Uso Marques le igoa o mamoe uma i lana korama a ositaulaga ma iloa ai o loo misi Fernando. Na ia sailia Fernando i lona fale, i le fale o lana uo, ma na alu foi i le matafaga.
Na iu ina ia mauaina Fernando o loo faasee i le sami. Na te lei faatalitali seia goto le vaa, pei o le tala ia Tanielu. Sa vave ona ia ulu atu i le vai e laveai lana mamoe ua leiloa, ma aumai o ia i le fale ma olioli.7
Ona ia faamautinoaina lea e ala i le auauna atu pea ina ia le toe aluese Fernando mai le lafu.8
Sei ou faailoa atu ia te outou le mea na tupu talu mai le laveaiina o Fernando ma faasoa atu le olioli lea na oo mai i le laveaiina o le mamoe e tasi na leiloa. Sa faaipoipo Fernando i lana manamea, o Maria, i le malumalu. Ua toa 5 nei o la alo ma fanau a fanau e toa 13, o loo toaaga uma i latou i le Lotu. E toatele isi tagata o le aiga ma o latou aiga ua auai foi i le Ekalesia. Ua latou auina mai faatasi le faitau afe o igoa o o latou tuaa ina ia maua sauniga o le malumalu, ma o loo faaauau pea ona sau faamanuiaga.
O loo auauna atu nei Fernando o se epikopo mo le taimi lona tolu, ma o loo faaauau pea ona alu e laveai, e pei lava ona laveaiina o ia. Sa ia faasoa mai talu ai nei, “I le matou uarota, e 32 alii talavou malolosi i le Perisitua Arona, 21 o i latou na laveaiina i le 18 masina ua mavae.” I le avea ai ma tagata taitoatasi, aiga, korama, ausilali, vasega, ma faiaoga o aiga ma faiaoga asiasi, e mafai ona tatou faia lena mea!
Mataupu Faavae 4: Po O Le A Lo Tatou Matutua, Ua Valaauina i Tatou Uma e O i le Laveai
Sa tautino mai e Peresitene Henry B. Eyring: “Po o le a lava lo tatou matutua, malosi, valaauga i le Ekalesia, po o nofoaga, ua tasi i tatou o e ua valaauina i le galuega e fesoasoani [i le Faaola] i Lana seleselega o agaga seia toe afio mai o Ia.”9
Ua usitaia e le toatele o a tatou fanau, talavou, talavou nofofua matutua, ma o tatou tagata matutua i soo se vaitausaga le valaau manino a le Faaola e o e laveai. Faafetai mo a outou taumafaiga! Sei ou faasoa atua nisi o faataitaiga:
O Amy, e 7 tausaga, sa valaauliaina lana uo o Ariana ma lona aiga i lana polokalama o le sauniga faamanatuga a le Peraimeri faaletausaga. I nai masina mulimuli ane, sa papatisoina Ariana ma lona aiga.
O Aleni, o se talavou nofofua matua, na lagona le uunaiga e faasoa atu ni vitio a le Ekalesia, Savali faaMamona, ma ni mau o tusitusiga paia ma ana uo uma e faaaoga ai ala faasalalau faaagafesootai.
Na amata ona faasoa atu e Sister Reeves le talalelei ma tagata faatau uma i luga o le telefoni sa valaau mai.
Sa valaaulia e James lana uo le lotu o Shane i le papatisoga a lona afafine.
Sa auina atu e Spencer i lona tuafafine ua le o toe toaga mai se sootaga i le saunoaga o le konafesi a Peresitene Russell M. Nelson ma tau mai, “Sa ia faitauina le lauga ma ua matala ai se faamalama.”
Ua saunia e le Alii ni meafaigaluega uma e manaomia mo i tatou e o ai e laveai mai a tatou uo ua le o toe toaaga mai ma e le lolotu. E mafai e i tatou uma ona faia!
Ou te valaaulia outou taitoatasi ia usitaia le valaau a le Faaola ma o i le laveai. E mafai ona tatou faia!
Ou te molimau atu ma le faamaoni ou te iloa o Iesu o se Leoleo Mamoe Lelei, e alofa o Ia ia i tatou ma o le a Ia faamanuiaina i tatou pe a tatou o e laveai. Ou te iloa o loo soifua o Ia; ou te iloaina. I le suafa o Iesu Keriso, amene.