Sulufaiga mai le Afa
Saunia e Elder Patrick Kearon
O Le Fitugafulu
O lenei taimi e lē faamatalaina ai tagata sulufai, ae o lo tatou tali atu o le a faamatalaina ai i tatou.
“Aua na ou fia ‘ai, ona outou avane ai lea ni mea ou te ‘ai ai: na ou fia inu, ona outou avane ai lea ni vai ou te inu ai: sa fai a’u ma tagata ese, ona outou talia lea o a’u:
“Na ou le lavalavā, ona outou faaofuina lea o a’u …
“…E moni, ou te fai atu ia te outou, auā na faia e outou i le tasi o e aupito itiiti o o’u uso nei, o a’u lea na outou faia i ai.”1
O loo i ai se aofaiga e 60 miliona o tagata sulufai i lalolagi i le asō, o lona uiga e “1 i le 122 o tagata soifua … ua faamalosia e sosola ese mai o latou fale,”2 ma o le afa o nei [tagata sulufai] o tamaiti.3 E faateia le mafaufau ai i fuainumera ua aofia ai ma le mafaufau pe o le a le uiga o lenei mea i olaga o tagata taitoatasi. O lou tofiga i le taimi nei o Europa, lea o loo taunuu ai le tasi ma le kuata miliona o nei tagata sulufai i le tausaga ua tuanai mai i vaega ua masofa i taua o le Sasae Tutotonu ma Aferika.4 Matou te vaaia le toatele o i latou e o mai na o ofu o loo laeiina ma mea e mafai ona latou aveina i se ato laitiiti. O se fuainumera tele o i latou ua lelei le aotauina, ma ua faamalosia e tuua fale, o aoga, ma galuega.
I lalo o le taitaiga a le Au Peresitene Sili, o loo galulue le Ekalesia ma faalapotopotoga e 75 i atunuu o Europa e 17. O nei faalapotopotoga eseese e mai faalapotopotoga tetele faavaomalo i taumafaiga a pitonuu laiti, mai ofisa o malo i galuega alofa a tapuaiga faalelotu ma le lalolagi. Ua faamanuiaina i tatou e fai paaga ma aoao mai i isi o e na galulue ma tagata sulufai i le lalolagi mo le tele o tausaga.
I le avea ai ma tagata o le Ekalesia, faatasi o ni vaega o ni tagata, tatou te lē tau vaai i tua i lo tatou talafaasolopito e mafaufau ai i taimi na avea ai i tatou ma tagata sulufai, i le sauaina o le aveesea faamalosi mai fale ma faatoaga i lea taimi ma lea taim. I le vaiaso ua tea i le talanoa e uiga i tagata sulufai, sa talosaga ai e Sister Linda Burton tamaitai o le Ekalesia e mafaufau “Ae faapefea pe ana ou oo i le mea na latou oo i ai.”5 O lo latou tala, o lo tatou tala, e lē o ni tausaga se tele ua leva.
Ua matuā malosi finauga i malo ma le salafa o le lalolagi e faatatau i le faauigaga o se tagata sulufai ma mea e tatau ona faia e fesoasoani ai i tagata sulufai. O ou manatu e lē faamoemoe e fatu ai se vaega o lena talanoaga i soo se auala, pe ia faia ai ni faamatalaga i aiaiga faavae tau femalagaaiga, ae ia taulai atu i tagata o e ua faamalosia e tuua o latou fale ma atunuu ona o taua latou te le’i amataina.
E silafia e le Faaola pe faapefea lagona o le avea ma se tagata sulufai—Sa avea o Ia ma se tagata sulufai. Ao laitiiti, sa sosola atu Iesu ma Lona aiga i Aikupito e sola ese mai le fasiotia ona o faatonuga a Herota. Ma i vaega eseese i Lana galuega, sa maua e Iesu o Ia Lava ua faamatauina ma Lona olaga i le tulaga lamatia, na iu lava na auina atu i faiga faatiapolo a tagata na fuafuaina Lona maliu. Atonu, i lena taimi, e sili atu ona matagofie ia i tatou sa Ia aoao pea i tatou ia fealofani, faapei ona Ia alofa atu, ia alofa atu i lē lua te tuaoi, ia pei o oe lava ia te oe. E moni, “le amio Atua e lelei ma le faamaoni i luma o le Atua o le Tama lea, Ina ia tauasiasi atu i e matua oti ma fafine ua oti a latou tane i o latou tiga”6 ma ia “vaaia e ua matitiva ma e ua lē tagolima, ma auauna atu mo lo latou toomaga ina ia latou lē mafatia.”7
E musuia le molimauina o mea ua foai ma le limafoai e tagata o le Ekalesia mai le lalolagi e fesoasoani ai i nei tagata ma aiga o e ua aveesea le tele o mea. I Europa lava ia, ua ou vaaia le toatele o tagata o le Ekalesia o e ua oo i se atinaega o le lagona o le olioli ma le musuiaina a o latou tali atu i lena manao masani loloto e fesoasoani ma auauna atu ia i latou i na manaoga ogaoga o vagaia i latou. Ua tuuina atu e le Ekalesia fale ma le tausiga faafomai. Ua tuufaatasi e siteki ma misiona le faitau afe e tele o tausiga o le faamamaina. Ua tuuina atu e isi siteki meaai ma vai, lavalava, ofutalaloa e lē susū, uila, tusi, ato faafafa, tioata faitau, ma le tele o isi mea.
O tagata mai Sikotilani i Sicily, ua faataunuuina le tele o matafaioi. Ua ofo fua atu e fomai ma tausi mai lo latou auaunaga i nofoaga lea e taunuu ai tagata sulufai ua susū pala, maalilili, ma e masani ona atuatuvale ona o le asaina o vai tetele mai le solaaga. A o amata e tagata sulufai le faagasologa o le toe aumau ai, o loo fesoasoani tagata o le ekalesia i le lotoifale ia i latou e aoao le gagana o lo latou atunuu talimalo, a o tuuina atu e isi le faamalosiauga i fanau uma ma matua e ala i le tuuina atu o meataalo, sapalai o ata, musika, ma tala faatino. O nisi o loo ave ni vulu na foai atu, nila suisui, ma pine kolose, ma aoao nei tomai i tagata sulufai matuua ma talavou i le lotoifale.
O tagata o le Ekalesia ua lava le tomai o e na tuuina atu le tele o tausaga o le auauna atu ma le taitaiga ua faamaonia i le moni o le auauna atu i nei tagata e vave ona manaomia le fesoasoani ua tuuina mai le aafiaga faaoaina, sili atu ona faamalieina i lo latou auaunaga.
E tatau ona vaaia le moni o nei tulaga ina ia talitonuina. I le taumalulu sa ou feiloai, i le lotolotoi o le toatele o isi tagata, i se fafine maitaga mai Suria i se tolauapiga faatalitali o loo sailia ma le naunautai se faamautinoaga e na te le fanauina lana pepe i luga o fola malulu o le fale telē sa nofo ai. I Suria, o ia o se polofesa i le iunivesite. Ma i Eleni sa ou talanoa ma se aiga ao susū pea, ma gatete, ma fefe mai lo latou sopoaga i se tamai vaa pau mai Take. Ina ua maea ona vaai i o latou fofoga ma faalogo i o latou tala, o o latou matata’u na latou sosola ese mai ai ma le malaga lamatia e saili se sulufaiga, o le a ou lē toe avea ma tagata na i ai muamua.
O le tuuina atu o le tausiga ma le fesoasoani o se vaega tele o tagata faigaluega o le toomaga tuuto, o le toatele o i latou e ofo fua atu. Sa ou vaai i le faatinoga se tagata o le Ekalesia o lē, mo le tele o masina, sa galue i le po atoa, e tuuina atu mo manaoga aupito sili ona manaomia a i latou na taunuu mai Take i Eleni. Mai le tele o isi faatinoga, sa ia tuuina atu le fesoasoani muamua ia i latou e sili ona manaomia le fesoasoani faafomai, sa ia vaaia o fafine ma tamaiti o loo malaga na o i latou sa tausia, sa ia siiina i latou sa maliliu i le ala, ma faia le mea silisili e faaaoga punaoa sa faatapulaaina e fesoasoani ai i le toatele o tagata sa mafai ona fesoasoani i ai. O ia, e pei o le toatele e pei o ia, sa avea ma agelu faamafanafana moni e ona galuega e le faagaloina e i latou na ia tausia, e faapena foi le Alii, e ona le feau sa ia i ai.
O i latou uma ua tuuina atu i latou lava e faamama ai le mafatiaga o loo siomia i latou ua pei o le nuu o Alema: “Ma sa faapea, i o latou tulaga tamaoaiga, ona latou lē auina ese atu soo se tasi sa lē lavalavā, po o se sa fia ‘ai, po o se sa fia inu, po o se sa mai, po o se sa lē tausia … sa latou limafoai i tagata uma, o e matutua ma e laiti, o e pologa ma e saoloto, o tane ma fafine, pe e i fafo o le ekalesia pe e i totonu o le ekalesia, sa leai so latou faailoga tagata e faatatau ia te i latou o e na manaomia le fesoasoani.”8
E tatau ona tatou faaeteete o talafou o tulaga o tagata sulufai e lē avea ma nofoaga masani, pe a faaitiitia le faate’ia muamua, ae o loo faaauau pea taua ma aiga o loo sosola ese mai o latou atunuu e saili nofoaga o le sulufaiga. O le faitau miliona o tagata sulufai i le lalolagi atoa, e ona e le o toe lauiloa i talafou, o loo matuā manaomia pea le fesoasoani.
Afai o e fesili, “O le a se mea e mafai ona ou faia?” ia tatou manatua muamua e le tatau ona tatou auauna atu pe a aafia ai o tatou aiga ma isi tiutetauave,9 pe tatau ona tatou faamoemoe i o tatou taitai e faatulaga ni galuega faatino mo i tatou. Ae i le avea ai o ni talavou, alii, tamaitai, ma aiga, e mafai ona tatou aufaatasi i lenei galuega agaalofa maoae.
I le tali atu i le valaaulia mai le Au Peresitene Sili e auai i le auaunaga FaaKeriso i tagata sulufai i le lalolagi atoa,10 ua faatulagaina e le au peresitene aoao o le Aualofa, Tamaitai Talavou, ma le Peraimeri se taumafaiga mo le toomaga ua faaautuina “Sa Fai Au ma Tagata Ese.” Sa faalauiloa atu e Sister Burton lenei taumafaiga i tamaitai o le Ekalesia i le faaiuga o le vaiaso ua tuanai atu i le sauniga aoao a tamaitai. O loo i ai ni manatu aoga e tele, o punaoa, ma fautuaga mo le auaunaga i luga o le IWasAStranger.lds.org.
Amata i ou tulivae i le tatalo. Ona mafaufau lea i tulaga o le faia o se mea e latalata i le fale, i lou lava nuu, lea e te maua ai ni tagata o e o manaomia le fesoasoani i le fetuunaiga i o latou tulaga fou. O le faamoemoega tupito o lo latou toe mauaina o se olaga manuia ma ola-tutoatasi.
O avanoa mo i tatou e fesoasoani ai ma avea o se uo e lemafaitaulia. Atonu e te fesoasoani i tagata sulufai ua masii mai e aoao lo latou gagana o le atunuu talimalo, toefaafou a latou tomai o galuega, pe faataitai faatalanoaga o galuega. E mafai ona e ofo atu e faufautua se aiga po o se tina nofofua a o latou masii atu i se aganuu e le masani ai, e oo lava i se mea, e faigofie e pei o le faatasi atu ma i latou i le faleoloa po o le aoga. O loo i ai i nisi o uarota ma siteki ni faalapotopotoga faatuatuaina e paaga faatasi. Ma, e tusa ai ma ou tulaga, e mafai ona e tuuina atu i le taumafaiga agaalofa tulaga ese a le Ekalesia.
E faaopoopo i ai, e mafai e i tatou taitoasi ona faateleina lo tatou nofouta i mea e tutupu i le lalolagi ua mafua ai ona tuua e nei aiga o latou fale. E tatau ona tatou faia se puipuiga e faasaga i le lē gafatia ma le lagolagoina o le migao ma le malamalama i le va o tu ma aganuu. O le feiloai i aiga o tagata sulufai ma faalogo patino i o latou lava tala, ae e lē mai i se lau po o le nusipepa, o le a suia ai oe. O ni faauoga moni o le a atiina ae ma o le a faafailele ai le alofa, ma le manuia.
Ua faatonuina i tatou e le Alii o siteki o Siona e ao ona avea o “se puipuiga” ma “se sulufaiga mai le afa.”11 Ua tatou mauaina le sulufaiga. Ia tatou o mai i fafo mai o tatou nofoaga o le saogalemu ma faasoa atu ma i latou, lo tatou manuia, faamoemoe mo se lumanai manuia, faatuatua i le Atua ma i o tatou uso a tagata, ma le alofa alofa e vaai ai i talaatu o eseesega faaleaganuu ma talitonuga i le upumoni matagofie o i tatou uma o fanau a lo tatou Tama Faalelagi.
“Aua ua le foaiina mai e le Atua ia te i tatou le Agaga e matata’u ai; a o le agaga e faamalosi ai, ma alofa ai.”12
O le avea o se tagata sulufai atonu o se taimi taua i olaga o i latou o tagata sulufai, ae o le avea ma tagata sulufai e lē faamatalaina ai i latou. E pei o le faitau afe lemafaitaulia na muamua atu ia i latou, o lenei mo na o se vaitaimi—tatou te faamoemoe o se vaitaimi puupuu—i o latou olaga. O nisi o i latou o le a agai pea le avea ma tamalii faamamaluina, o auauna i tagata lautele, fomai, saienitisi, musika, tusiata, taitai faalelotu, ma saofaga i isi matātā. E moni, o le toatele o i latou sa avea ma tagata nei ae lei aveesea mea uma. O lenei taimi e lē faamatalaina ai i latou, ae o lo tatou tali atu o le a faamatalaina ai i tatou.
“E moni ou te fai atu ia te outou, Auā na faia e outou i le tasi o e aupito itiiti o o’u uso nei, o a’u lea na outou faia i ai.”13 I le suafa o Iesu Keriso, amene.
Mo nisi faamatalaga, tagai i le IWasAStranger.lds.org ma le mormonchannel.org/blog/post/40-ways-to-help-refugees-in-your-community.