Sister Bonnie H. Cordon

Fesoasoani Lua i le Au Peresitene Aoao o le Peraimeri

I lona olaga faatamaitiiti i sautesasae i Idaho, ISA, sa aoaoina ai e Bonnie Hillam Cordon le tele o lesona taua o le olaga. O le galulue ai, taaalo, ma le ola ai i se faatoaga e aoaoina i lona tutoatasi, galue malosi, ma “le le fefe e faataitai ai i mea,” na fai mai ai le fesoasoani fou o le lona lua i le au peresitene aoao o le Peraimeri.

Ae peitai, o le lesona aupito sili ona taua, na oo mai mai ona matua, o Harold ma Carol Rasmussen Hillam, o e na aoaoina o ia faapea o le i ai o le fesoasoani a le Alii, e mafai ai ona ia faia soo se mea. “E leai ni tuaoi,” o le tala lea a lona tama.

Sa faalagolago Sister Cordon i lena malamalama ao avea ma se faifeautalai faatoa valaauina i Lisbon, Potukale, o loo tauivi e aoao le Faapotukale. “Sa ou i ai i ou tulivae i le tele o taimi e ole atu mo se vavega. Ae ona o lo’u tama, sa ou aoao e mafai ona ou faia mea faigata.”

Ina ua maea le tele o talosaga, galuega, ma le onosai, sa faasolosolo lemu ona lelei le tautala faaPotukale, lea na faamanuiaina o ia i le tele o tausaga mulimuli ane ina ua valaauina o ia ma lona toalua e auauna atu i Curitiba, Pasila.

“E ese le manaia o le auala e saunia ai i tatou e le Alii ma fausia auauai i tatou i lea taimi ma lea taimi,” o lana tala lea. “E talafeagai ai lava pe a tatou vaavaai atu i le faaata o i tua. E tatau ai lava ona i ai lo ta faatuatua.”

Sa soifua mai Bonnie Hillam i le aso 11 o Mati, 1964, i Idaho Falls, Idaho. Ina ua maea lana misiona, sa ia aoga i mea tau aoaoga i le Iunivesite o Polika Iaga, i Provo, Iuta, ISA. Ao i ai iina na avea i laua ma ni uo mamae ma Derek Lane Cordon. Na oo atu le la faigauo i se mafutaga faamemelo, ma sa faaipoipo le toalua i le aso 25 o Aperila, 1986, i le Malumalu o Sate Leki. E toafa o laua alo—tolu tama ma le teine e toatasi—ma fanau a fanau e toatolu.

I le aluga o tausaga sa la auauna atu i le tele o valaauga o le Ekalesia. Sa ia auauna atu faatasi ma lona toalua ao ia pulefaamalumalu i le Misiona a Pasila Curitiba mai le 2010 i le 2013, ma sa auauna atu se peresitene o Tamaitai Talavou o le siteki, faiaoga o le vasega pepe, ma se faiaoga seminare, ma i faalapotopotoga a Tamaitai Talavou, Aualofa, ma le Peraimeri a le uarota.

I lona tofiga fou, na saunoa mai ai Sister Cordon na te faamoemoe e aoao atu se upumoni taua se tasi i tamaiti o le Peraimeri o le Ekalesia: “E alofa le Tama Faalelagi ia i latou.”