O a Taeao e Faia ai e le Alii o Vavega i o Outou Luma
Saunia e Elder Jeffrey R. Holland
O Le Korama a Aposetolo e Toasefululua
Ia alofa pea. Ia taumafai pea. Ia faalagolago pea. Ia talitonu pea. Ia tuputupu ae pea. O loo faamalosiau mai pea le lagi ia te outou i le asō, taeao, ma le faavavau.
Uso e ma tuafafine, o tou manatu ea—o tou maua ea se lagona po o se malamalama po o le a lava—i le tele o lo matou alolofa ia te outou? Mo le 10 itula e te matamata ai, ma taulai atu i le fofoga e tasi i lenei pulelaa i le faagasologa, ae mo na lava 10 itula e tasi, matou te saofafai ai i tua o lenei pulelaa, ma taulai atu ia te outou. Tou te faafiafiaina i matou e oo i le ogatotonu o o matou agaga, pe o le 21,000 o iinei i le Maota Autu mo Konafesi, po o le anoanoai o loo i falelotu ma falesa, po o le mulimuli, o le miliona i totonu o aiga i le salafa o le lalolagi, atonu o loo faapupuu faataamilo i se lau o le komepiuta a le aiga. O outou iinei, o outou iina, i lea itula ma lea itula, i a outou laei silisili o le Aso Sa, o loo avea ma tou tagata silisili. Tou te vivii ma tatalo. Tou te faafofoga ma tou talitonu. O outou lava o le vavega o lenei Ekalesia. Ma e matou te alolofa ia te outou.
Oka o se isi konafesi aoao matagofie ua tatou maua. Ua faamanuiaina faapitoa i tatou i le auai ai o Peresitene Thomas S. Monson atoa ma ana savali faaperofeta. Peresitene, matou te alolofa ia te oe, matou te tatalo mo oe, matou te faafetai atu ia te oe, ma sili ai, matou te lagolagoina oe. Matou te faafetai lava i le aoaoina ai e outou, o ou fesoasoani, ma le toatele o o tatou taitai maoae o alii ma tamaitai. Ua tatou faalogologo i musika faalelagi. Ua latou tatalo faatauanau ma aioi mai [ia tatou tausi i poloaiga]. E moni lava o loo i ai le Agaga o le Alii iinei i se fuataga tele. O se faaiuga o se vaiaso musuia i soo se auala.
Ia, ua na o ni nai faafitauli lea ua ou vaaia. O le tasi o le mea moni faapea ua na o a’u le tagata o loo tu nei i lou va ma le aisa kulimi ua leva na e fia pa’i i ai pe a uma le konafesi aoao. O le isi faafitauli faamoemoeina o loo vaaia i lenei ata sa ou vaai i ai talu ai nei i luga o le Initoneti.
Ou te faamalulu atu i fanau uma o loo lalafi nei i lalo o nofoa, ae o le mea moni, e leai ma se tasi o i tatou e fia manao taeao, po o talaatu taeao, e faaleagaina ia lagona matagofie ua tatou mauaina i lenei faaiuga o le vaiaso. Tatou te mananao ia taofimau i uunaiga faaleagaga ua tatou mauaina ma aoaoga musuia ua tatou faalogo i ai. Ae e le maalofia lava pe a mavae ni taimi faaleagaga i o tatou olaga, e tatau lava i nisi taimi ona tatou toefoi atu i siosiomaga faalelalolagi e toe fetaiai ai foi ma tulaga faalelalolagi.
Sa lapataia i tatou e le tusitala o Eperu i lenei mea ina ua ia tusia, “A ia outou manatua i aso anamua, ina o faamalamalamaina outou, na outou onosai ai i le taua tele o tiga.”1 O lena tiga ina ua uma ona faamalamalamaina e mafai ona oo mai i le tele o auala, ma e mafai ona oo mai ia i tatou uma. E mautinoa lava o faifeautalai uma ua tala’i e vave lava ona iloaina o le olaga i le galuega faamisiona sa lei tutusa lelei ma le siosiomaga matagofie o le nofoaga autu e aoao ai faifeautalai. Ma e faapena foi mo i tatou uma e tū’ua mai se sauniga matagofie i totonu o le malumalu pe maea foi se sauniga faamanatuga na faapitoa le faaleagaga.
Manatua le taimi na sau ai Mose i lalo mai lona aafiaga ofoofogia i luga o le Mauga o Sinai, sa ia tau mai i lona nuu ua “leaga lava i latou” ma ua “vave ona latou o ese.”2 Sa i ai iina le nuu i lalo i le mauga, o loo pisi lava i le teuteuina o se tamai povi auro e tapuai i ai, i le taimi lava lea e tasi i le tumutumu o le mauga, o loo ta’u atu ai e Ieova ia Mose, “Aua ne’i fai mo oe ni atua ese i o’u luma,” ma “Aua e te fai mo oe se tupua ua ta.”3 Sa lei fiafia Mose i lana lafu o Isaraelu ua fesesetai i lena aso!
I le taimi o Lana galuega faalelalolagi, sa ave ai e Iesu ia Peteru, Iakopo, ma Ioane i luga o le Mauga o Liua lea o loo faapea mai ai le mau, “ua pupula mai ona fofoga e pei o le la, ua sisina mai foi ona ofu e pei o le malamalama.”4 Na matala le lagi, na oo mai perofeta anamua, ma sa fetalai mai le Atua le Tama.
Ina ua mavae lea aafiaga faaselesitila, o le a le mea na maua mai e Iesu ina ua afio mai i lalo mai le mauga? Ia, muamua na Ia maua mai se finauga i le va o Ona soo ma o latou fili i se faamanuiaga na tuu atu i se tamaitiiti ae sa le manuia. Ona Ia taumafai lea e faatalitonu le Toasefululua—lea sa le faamanuiaina,—o le a le pine ae molia atu o ia i taitai o le nuu o e o le a fasiotia o Ia. Ona ta’ua lea e se tasi ua faagataina lafoga, ia na totogi sa’o atu. Ona Ia aoaiina lea o nisi o le usoga ona sa latou fefinauai e uiga i le mataupu po o ai e sili i Lona malo. O nei mea uma sa taitai atu ai o Ia e fetalai atu, “Le tupulaga le faatuatua e, tatou te i ai ma outou seia afea?”5 Sa ia te Ia se mafuaaga e fai atu ai lena fesili e silia ma le faa-tasi i le taimi o Lana galuega. E leitioa naunau lava o Ia mo se taimi paganoa e tatalo ai na o Ia i luga o le mauga!
I le iloaina ai e ao lava ona tatou o mai uma mai luga o aafiaga maualuluga faaleagaga i lalo i tulaga e taulimaina faafitauli masani o le olaga, sei ou ofoina atu lava lenei faamalosiauga a o faamaea ai le konafesi aoao.
Mea muamua lava, afai e te vaaia i aso o lumanai atu e le gata i ni tapulaa ia i latou o siomiaina oe ae faapena foi ona e iloaina ni elemene i lou lava olaga e le o ogatusa ma savali ua e faalogo i ai i le faaiuga o lenei vaiaso, faamolemole aua ne’i faalotovaivaia lou agaga ma aua e te fiugofie. O le talalelei, le Ekalesia, ma nei faatasiga matagofie faaleafatausaga ua faamoemoeina e te maua ai le faamoemoe ma musumusuga. E le o faamoemoe e faavaivailoto ia te oe. Ua na o le tiapolo lava, le fili o i tatou uma, o le a taumafai pea e faatalitonu i tatou o mataupu ua faataatitia atu i le konafesi aoao e le moni ma faanoanoa, e le faaleleia moni ai tagata, ma e leai ma se tasi e alualu moni i luma. Ae aisea e avatu ai e Lusifelo na manatu? Aua ua ia iloaina e le mafai ona toe foi o ia i se lelei, ma e le mafai ona ia alualu i luma, i lalolagi e le uma o le a le maua ai sona lumanai. O ia o se tagata pagatia ua noatia i tapulaa e faavavau, ma na te manao ia te oe ia pagatia foi. Ia, aua nei lolo atu i lena manatu. Faatasi ai ma le meaalofa o le Togiola a Iesu Keriso ma le malosiaga o le lagi e fesoasoani ia i tatou, e mafai ona tatou lelei, ma o le mea sili e uiga i le talalelei o le tauia o i tatou mo le taumafai, e tusa lava pe le manuia i tatou i taimi uma.
Ina ua i ai se fefinauaiga i le popofou o le Ekalesia e faatatau po o ai e agavaa i faamanuiaga o le lagi ae o ai foi e le agavaa, sa tautino mai e le Alii i le Perofeta o Iosefa “E moni ou te fai atu ia te outou, ua tuuina mai ia meaalofa [a le Atua] mo le lelei o i latou o e e alolofa ia te a’u ma tausi i a’u poloaiga …, ma [mo i latou] ua saili [e] faia faapea.”6 Oka, tatou te le faafetai uma ea mo lena faamanuiaga faaopoopo ma saili e faia faapea”! O se faaolatotoga lena ona o nisi taimi e na o le pau lena o mea e mafai ona tatou faia! Tatou te lagona sina mafanafana i le mea moni e faapea afai e tauia e le Atua na o e faamaoni atoatoa, semanu la e le tele se lisi o tagata e tauia.
Faamolemole ia manatua taeao, ma aso uma e sosoo ai, e faamanuiaina e le Alii i latou e mananao ina ia lelei atili, o e taliaina le manaomia o poloaiga, ma taumafai e tausi i ai, o e faatauaina uiga paia FaaKeriso ma tauivi i le mea sili o lo latou gafatia e amio ai. Afai e te tautevateva i lena taumafaiga, e faapena foi tagata uma; o loo i ai le Faaola iina e fesoasoani ia te oe ia faaauau pea. Afai e te pa’u, ole atu mo Lona malosi. Valaau atu e pei o Alema, “E, Iesu e, … ia e alofa mutimutivale mai ia te au.”7 O le a Ia fesoasoani ia te oe e toe tu i luga. O le a Ia fesoasoani ia te oe e salamo, faaleleia, toefausia soo se mea e ao ona e toe faaleleia, ma faaauau pea lau malaga. E le pine i le taimi sa’o, o le a e mauaina le manuia o loo e sailia.
“E pei ona e manao mai ia te a’u o le a faapea lava ona faia ia te oe,” ua tautino mai ai le Alii.
“… Ia tuu lou faalagolago i le Agaga lena lea na te taitai ia fai mea lelei—ioe, ia fai mea sao, ia savavali ma le lotomaualalo, ia faamasino ma le amiotonu. …
“… [O lea la] o soo se mea e te manao mai ai ia te a’u [i le] amiotonu, … o le a e mauaina.”8
Ou te fiafia i lena aoaoga faavae! Ua toe ta’u mai ma toe tau mai ai o le a faamanuiaina i tatou mo lo tatou mananao e fai mea lelei, a o tatou taumafai moni ia amio lelei. Ma ua faamanatu mai ai ia i tatou ina ia agavaa mo na faamanuiaga, e tatau ona tatou mautinoa tatou te le taofia na mea mai i isi: e ao ona tatou taulimaina isi i le amiotonu, aua lava ne’i le amiotonu, aua lava ne’i le faamaoni; e ao ona tatou savavali i le lotomaualalo, aua le faasausili, aua le faamaualuga; e ao ona tatou faamasino atu ma le amiotonu, aua lava ne’i faafiaamiotonu, aua lava ne’i faia ma le le amiotonu.
Ou uso e ma tuafafine, o le poloaiga muamua ma le sili o le faavavau atoa o le alofa atu lea i le Atua ma o tatou loto atoa, manatu, mafaufau, ma le malosi atoa, o le poloaiga muamua ma le sili lena. Ae o le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau, ma le malosi atoa. O lena alofa o le mataupu faavae autu lena o le faavavau, ma e tatau ona avea ma faavae autu o o tatou olaga i aso uma. O le mea moni ua na o le pau lena o le faamautinoaga o loo mumu pea i o tatou loto e mafai ona tatou maua ai le mautinoa e taumafai ai pea ia faaleleia atili, ia saili ai pea le faamagaloga mo a tatou agasala, ma ia faaauau ai pea ona faailoa atu lena alofa tunoa i o tatou tuaoi.
Sa aoao mai Peresitene George Q. Cannon i se tasi taimi: “Po o le a lava le ogaoga o se tofotofoga, po o le matuitui o le faanoanoa, po o le tetele o mafatiaga, o le a le tuulafoaia lava e le [Atua] i tatou. Na te lei tuulafoai lava, ma o le a Ia le tuulafoai lava [i tatou]. E le mafai ona Ia faia. E le o Sona uiga [le faia o lena mea]. … O le a Ia tumau pea ma i tatou. Atonu tatou te oo i ni ogaumu aasa; atonu tatou te pasia ni vai loloto; ae o le a le faaumatia ai i tatou pe lofituina ai. O le a tatou tutulai ae mai nei tofotofoga uma ma faigata o le a lelei atu ma mama atu ona o se taunuuga o na mea.”9
Ia, faatasi ai ma lena tuuto mamalu o loo tatagi mai le lagi e fai ma mea sili e tumau i o tatou olaga, na faaalia ai ma le mama ma le atoatoa sili i le soifuaga, maliu, ma le Togiola a le Alii o Iesu Keriso, e mafai ai ona tatou sosola ese mai taunuuga uma o le agasala ma le faavalevalea—a i tatou po o agasala a isi—po o le a lava le ituaiga e oo mai ai ia i tatou i le ala o le olaga i aso taitasi. Afai tatou te tuu atu o tatou loto i le Atua, afai tatou te alolofa i le Alii o Iesu Keriso, afai tatou te faia le mea silisili tatou te mafaia e ola ai i le talalelei, o taeao la ma isi aso uma o le a iu lava ina ofoofogia, e tusa lava pe tatou te le iloaina i taimi uma e ofoofogia. Aisea? Ona e finagalo lo tatou Tama Faalelagi ia faapena! E finagalo o Ia e faamanuia i tatou. O se ola e faavavau, tauia ma faamanuiaina o le vaega autu lea o Lana fuafuaga alofa mutimutivale mo Lana fanau! O se fuafuaga e faalagolago i le upumoni “e galue … mea uma lava mo le lelei [ia] i latou o e ua alolofa [i le Atua].”10 O lea ia alolofa pea. Ia taumafai pea. Ia faalagolago pea. Ia talitonu pea. Ia tuputupu ae pea. O le a faamalosiau pea le lagi ia te outou nei, taeao, ma le faavavau.
“E te le iloa ea? E te lei faalogo ai ea?” sa tautino mai ai Isaia.
“[O le Atua] Na te avatua le malosi i e ua vaivai; a o e ua leai se malosi na te faatuputele i ai le malosi. …
“… O e faatalitali [ia te Ia] e toe faafouina lo latou malosi; latou te sii ae apaau e pei o aeto. …
“Aua … o le Alii … [le] Atua o le ua taofi [tou] lima taumatau; o le ua fai atu ia te [outou], Aua [tou] te fefe; o a’u, ou te fesoasoani ia te [outou].”11
Uso e ma tuafafine tau ina ia faamanuiaina i tatou e se Tama i le Lagi agaalofa taeao ia manatua ai [mea] ua tatou lagonaina i lenei aso. Tau ina ia Ona faamanuia i tatou ia tauivi ma le onosai ma le faapalepale i mataupu ua tatou faalogo ua folafolaina i lenei konafesi, ma le iloaina o Lona alofa paia ma le fesoasoaniga le mafaatoilaloina o le a faatasi ma i tatou e tusa lava pe tatou te tauivi—leai, o le a faatasi ma i tatou aemaise lava pe a tatou tauivi.
Afai e foliga atu ua maualuluga tulaga faatonuina o le talalelei ma foliga atu ua faigata tele mea e manaomia ona faaleleia mo oe lava ia i aso o i luma atu, manatua le faamalosiauga a Iosua i lona nuu ina ua latou fetaiai ma se lumanai taufaamatau. “Faapaia outou lava,” sa ia fai atu ai, “o a taeao o le a faia ai e Ieova vavega i o outou luma.”12 Ou te folafola atu lena lava folafolaga e tasi. O le folafolaga lena o lenei konafesi. O le folafolaga lena a lenei Ekalesia. O le folafolaga a Ia o lē o loo faatinoina na vavega, o Ia lava lea o le “Silsili Ese, Faipule, o le Atua Malosi, … Le Alii o le Filemu.”13 Ou te molimau atu ai ia te Ia. O Ia ua avea ai au ma molimau. Ma o Ia o lenei konafesi ua avea ma se molimau ia te Ia i Lana galuega o loo faaauau pea i aso nei e gata ai. I le suafa o Iesu Keriso, amene.