Clarence ni kaitara ma te Tiambion
E taratara Clarence man te winto ngke a nang rororake nakon te uaabu. A beibeiti taian booti n te ran imoan taian auti ao taian titoa. Copenhagen, Denmark, bon te tabo ae koro babantoona ae onrake n taian bwaareti, auti aika bubura, ao taian bwaake. E bon rang kaokoro ma ana kaawa ni mweengan Clarence i Utah, USA. E kona n iangoi kawai aika barekareka ngke e kakabo birimwaaka iai ngke te ataeinimwaane. Ngkai e a kaaina ana tiim ni biri te United States, ao ningabong e na kaitaraa te tia biri ae rangi n ataaki mai i Denmark n te kabo birimwaaka ae kakannato.
E tei te kaa n te umwantabu ae uarereke ike e a kaman waakinaki iai karaoan te taromauri.
Ngkai e kataia n rinnako Clarence n ae e na aki nooraki n te rinan are mai buki, temanna te mitinare ae tekateka n te tabo n taetae e kinaa man te kaongora are e nako n te niuti ibukin te kabo birimwaaka niingabong. Te beretienti n te mwaanga e tuanga Clarence bwa e na teirake n taetae.
Imwiin ngke e tia n taekina bukin rokona Clarence, e teirake te ataenimwaane ao ni katea baina. “Am iango ko na kona aon te tiambion mai Denmark?” e titiraki.
E aki koaua raoi Clarence bwa tera ae e na taekinna. Te tia biri mai Denmark iai tamaroan ana tai n te biri ae abwabwakai n te ririki anne.
“Eng e kona,” e taku temanna te mitinare imwaain ae kaeka Clarence. “Ibukina e maiuakina Tuan te Mauri.” E kauka ana boki aika tabu nakon Doctrine ao Covenants 89. E wareka te berita bwa naake a kawakina Tuan te Mauri “a na kona ni biri ao n aki kua ao ni kona n nakonako ao n aki bwaka” (kibuna 20).
Tera ae e kona n taekinna Clarence? E ataa Tuan te Mauri bwa e koaua. Ao ngke te ataei ngaia e berita bwa e na kawakinna n tainako. Ma anne n tii ngaia tiaki nanona bwa e nang moanna naba n te kabobirimwaaka aei. Karekean te moanna e kainnanoa naba te kataneiai ao te konabwai. Ngke e kitana te taromauri Clarence, e iango, “Eng, e aoria bwa akea man te mwaanga n te aro ae e na mena n te biri ningabong.”
N te tairiki are imwiina ngkai e tabe Clarence ni kaabuea rabwatana ibukin te kabobirimwaaka, e tararake ao e nooria uoman mitinare ma kurubu n ataeinimwaane n te roro ae 17 te ririki. Ngaia a bon roko!
Ngke a uakaan, temanna te mitinare e wirikiriki nakon Clarence, “Ngkana ko a tia ni bibiri inanon maium, ko riai ni biri n te tairiki aei.” Angiia ataeinimwaane tiaki kaain te Ekaretia ma a roko ma raoraoia n nooria ngkana e koaua Tuan te Mauri.
E raraoma Clarence. N te kabobirimwaaka aei, ana kabanea n tamaroa e bae n aki tau. Ma e biri ibukin reirein ana euangkerio Iesu Kristo. E bon riai ni moanna. E bon tui man tatataro mai imwaaina ibukin moannana, ma e kunea te ruu ae akea kaaina ae e kona n tataro iai.
E tataro, “te Tama are i Karawa, I ataa Tuan te Mauri bwa e koaua, ao I bon tuai man urua. Taiaoka kakabwaiaai bwa N na anganaki te tokanikai n te kabobirimwaaka aei.” Ngke e a rianna nakon te rain ni kabobirimwaaka, e ataia bwa te Tama are i karawa e ongo ana tataro. E onimakina Ana Kantaninga Tamara are i Karawa.
Te tairiki anne e boni kakarau ao ni bokaboka. Ngkai e moana ana kabobirimwaaka Clarence, e taraa n ae kanga e a tia n biri ni maaire aikai. E birimwaaka aron biria taan biri, ao te tiambion mai Denmark e rimoa. Ma ngke e kabanea te kateniua n raaun Clarence, n te tai ae waekoa e aikoa kona ni kua. E a moanna ni birimwaaka birina, ao akea marakina. Ngkai e a kawaekoakoa riki teutana e teimatoa n akea marakina. E a rimoan te tiambion mai Denmark ao e teimatoa ni birimwaaka riki.
Ngkai e nang roko ni banen te raaun Clarence, e takarua ana kouti, “Karaurau! Ko na bon aki kona ni karekea te korakora n roko n tokin te rain!” Ma e ataia Clarence e kona ni kateimatoa birina. Ao ngke e a tia ni kabobirimwaaka, e riaon 50 te iaati (46 te miita) n rimoan te tia biri mai Denmark. E ataia ae e moanna ibukina bwa e a tia ni kaekaaki ana tataro iroun te Tama are i Karawa ao ibukina bwa e koaua Tuan te Mauri.