Rongorongo man te Moan Beretitentii
Kokoaua nakon aia Onimaki ara Bakatibu
John Linford ai 43 ana ririki ngke ngaia ma kainnabana ae Maria, ao teniman natiia mwane a baireia bwa a na kiitana mweengaia i Gravely, Engiran, ni mwananga inanon te maire bwa ana iira te mananga inanon te mwanono n te Great Salt Lake. A katuka aia kaaman n nati, bwa e na karaoa ana mwakuri ni mitinare, a kaboonakoi aia bwai, ao a mwananga rinanon te Liverpool iaon te kaibuke Thornton.
Te mwananga i taari nakon te Kaawa ae New York, mai ikanne iaon te aba nako Iowa, e korakora te aki mweengaraoi. E a moana n roko kanganga aika baati, e ngae ngke, Linfors ao Aika Itiaki ake Tabeman a ieie iaon te Thornton ni kiitana kaawan Iowa n Turai 15, 1856, bwa mwakoron ana aenika ni kambwana James G. Willie are e aki totokanikai.
Kanoan te bong ae buaka ao te mwananga ae bati mwakuriana e mwaiti ae anai maiuia n te kambwana n ikotaki ma John. N tokina e a rang aoraki n te aro are e a katikaki n te aenikaa. N te tai are e a roko iai te kambwana i Wyoming, marurungina e a kekerikaaki. Te tiim ni kamaiu mai Salt Lake e roko n Okitobwa 21, bon tabeua aoa imwiin tokin maiun John. E motirawa n te moaningabong anne irarikin te karaanga are Sweetwater River.
E nanokawaki John ni kanakoa mwengaraoina ibukin te ikakorakora, kaonoti, ao kanganga n uotakiia ana utu nako Tion?
“E aki, Maria,” e tuanga buuna imwain matena. “I kakatonga bwa ti roko. N na bon aki maiu n roko i Salt Lake, ma ngkoe ao natira mwaane kam na roko, ao I aki nanokawaki ni bwaai ni kabane ake ti a tia n rinanona ngkana a ikawai rake natira ao ni katei utu i Tion.”1
Maria ao natina mwaane a roko n tokin kawaia. Ngke e mate Maria e kaniia 30 te ririki imwiina, ngaia ma John a katuka imwiia rongorongon te onimaki, te ibuobuoki, te nanomatoa, ao te anganano.
N riki bwa te Aomata ae Itiaki ni Boong Aika Kaitira bon te riki ni bwaeoniia, bwa kabwarabwaraan te bwaeoniia bon “temanna are e rimoa ni katauraoi ao ni kauka te kawai ibukiia tabeman bwa a na iria.”2 Ao n riki bwa te bwaeoniia kona riki bwa te tia anganano. E ngae ngke membwa n te Ekaretia a aikoa tuangaki bwa a na kiitana mweengaia ni mwananga nako Tion, n tainako a katikui anuaia ni kawai, te katei are a tia ni maiuakinna, ao raraoia aika tatangiriia. Tabeman a karaoi babaire aika kammaraki ni kiitaniia kain aia utu aika a ribai riniia bwa kain te Ekaretia. E ngae n anne, aika Itiaki ni Boong aika Kaitira, a tataro ibukiia naake a kakaawaki irouia bwa a na oota ao a na butimwaea aia babaire.
Kawaia bwaeoniia e bon aki beebete, ma ti toua mwiin mwanekaia Bwaeoniia aika kabanea n tamaroa—ao bon te Tia Kamaiu—are e nako n rimoa, ni kaota nakoira te kawai ae ti na toua.
“Nakomai, ao iriirai,”3 E kakao.
“Bon Ngai te kawai, ao te koaua, ao te maiu,”4 E katanoata.
“Nakomai nakoiu,”5 E wewete.
E kona ni kakatai te kawai. Tabeman a taku bwa e rang kanganga taobaraakin te bwainingare ao te kakaniko irouia aika a nanobaba ake a kakanikoa te itiaki, kokoaua, ao te ongotaeka nakon ana tua te Atua. Te aonaaba e bwainingareia aika a ongotaeka nakon taian tua. Ngke e tuangaki Noa bwa e na kaba te ake, kain te aba aika nanobaba a tara karawa ae akea uananginangina ao a bwainingare ao a takarua—ni karokoa e bwaka te karau.
Iaon Amerika inanon tienture aika nako, aomata a nanokokoraki, kauntaeka, ao a aki ongeaba ni karokoa e urarake Taraemera, ao Moronaaia e rabunaki n te tano, ao Moroni e kaonaki n te ran. Takarua, bwainingare, riribai, ao buure ai akea. A tia n oneaki mwiia n te kainabwaabu, rotongitong ae matenten. Ana tataonannano te Atua e a toki, E a koro nanon ana kainibaire.
Maria Linford e aki kabua ana onimaki man te bwainikiriinaki i Engiran, kangangan te mwananga nakon “te tabo are e katauraoia … te Atua,”6 ao te kataaki ake a manga riki are e teimatoa inanona ibukiia ana utu ao te Ekaretia.
N 1937 n te bootaki n taunimate are e karaoaki ibukin kauringaan Maria, Unimwane George Albert Smith (1870–1951) e titirakiniia ana kariki: “Kam na maiuakina te kokoaua nakon aia onimaki ami bwakatibu? … Kam na keiakinna n riki bwa kam na tau ibukin aia anganano ni kabane [ake a] tia ni karaoi ibukimi.”7
Ngkai ti ukoukora katean Tion inanora, inanon mweengara, ma ara botanaomata, ao i abara, ti bia uringa ninikoriaia ao aia onimaki naake a tia n anganako aia bwai ni kabane bwa ti aonga ni kakatonga ni kakabwaia n te euangkerio are kaokaki, ma te kantaninga ao te berita rinanon ana Mwakuri ni Kamaiu Iesu Kristo.