Korakoran te rao & Pisto
E maeka te tia korokaraki i Saltillo, Mexico.
I a roko n te bootaki ma raoraou ni kabane, ma ni kabane a manging.
Ngke 12 au ririki, tabeman ataeinainen au reirei aika a boou a kaoai nakon te bootaki n rekenibong. Bon te moan bootaki ma raoraou aikai n te reirei ae I kaoaki bwa N na iria. Ngke I tuangiia au karo ngkana I kona n nako, a kangai ko aki ibukina te bootaki e a tiba moanaki ni bwakanakontai.
Tabeua te tai imwina, I a manga karekea riki teuana te kakao. I a manga tuangiia au karo riki, ma a manga taku riki ko aki, ao I rang un. I aki konaa ni karekea teutana te kukurei?
Ngkanne temanna raoraou e bairea ana bootaki. Ngai temanna ana moan aomata ae kaoia. Te bootaki e moantaai ni waaki nakon ake tabeua. E bon karaoaki n onoti ao e boo irarikin mwengau. I tuangiia au karo aia kariaia n nako, ao a kangai eng! I rangin ni kukurei.
E a roko te bong. Ngke a kabwakaai au karo ikekei, a tuangai bwa a na anaai n te aoa 10:00 p.m. Ngke I roko n te bootaki, I noriia raoraou ataeinnaine. Uabwi te miniti imwina, I aki noora te ataeinnaine are e koro ana ririki.
Tabeua te miniti imwina, te ataeinimane e kawariira ao n titiraki, “Kam uota ami mane ibukin te pisto?” E kaota te tiaaina n tuangai bwa te “pisto” bon te biia. Raoraou ataeinnaine a kukurei n anga aia mwane. Akea au mane irou, ngaia are I a kawariia tabeman raoraou ataeinnaine ma ake tabeman a karaoi oin aia waaki.
Tokina, e a roko te ataeinnaine are e koro ana ririki—teuana te aoa rimwiina. I katekeraoia, ao ngke ti a maroro, e a roko te turaki ae bubura. Niman mwaane a otinako ao a karuoi uoua kaaten ni biia. Ni kabane te koraki a katobibi ao a tibwatibwai nako biia. Raoraou ataeinnaine a nako n anai tabeua, ao I a tiku n ti ngai, ni matakuakiniia kairake n aomata akekei n uneaki ni moi biia.
Raoraou ataeinnaine a roko ao anganai tabeua. “I aki, kam rabwa,” I tuangiia. A manga imanonoai riki. I manga taku I aki. E moanna n tata buroou, ao I namakina te kaokoro, aron ingaingam n te tamnei are I a riki bwa te tia karao birim ao I a mane n te tabo ae kamiimi. Ngkanne I ongo tangin buun te kaa—bon au karo! I kabo nakoia ti teuana te tai ngke I kitana te bootaki.
I rin, ni ikeike n tauti. I moanna ni iangoa aron rawawatan te otabwanin are I mena iai. E titiraki tinau ngkana akea au kanganga. “Eng,” I kaeka. “ma iai te bwai ae I mimi iai.”
“Tera ae kamimiko?” e titiraki tamau.
“Ni kabane raoraou a bane ni moi, ao ngai ikekei, kubanrou, n tataninga te bwai ae raoiroi ae e na riki. I a kaman tataningai ngkami ni kauoman bwa kam na anaai, ao ngkai I a roko ikai.” I taraa tain te kaa; e bon tuai ni boo te 10:00.
E taku tinau, “Anne aron karaoan bobotaki n te aonaaba. Bwa anne bukina ti aki kariaia nakom nakon bootaki ake imwaina.”
Te tairiki anne ngke I tataro, I karabwa Tamau are i Karawa ni maontaain rokoia.
Ngaira kain te Ekaretia ae ti maeka n te aonaaba, ma ti aki kain te aonaaba. I a tia n reiakinna bwa ngkana I teimatoa ni iriiri bobotaki akanne, N na bon bwaka ma n urua Tuan te Mauri ao riki Tuan te Itiaki. A mwaiti raoraou aika a tia ni bwaka n te waaki aei, ma angiia tiaki kaain te Ekaretia, ma a kona naba kaain te Ekaretia ni bwaka naba ngkana aki tiku ni matoa.
I namakina te kukurei n te babaire are I karaoia n aki mooi. I iangoia bwa tao N na kaenaenaaki imwiina, ma raoraou n tokin te tai a angai karineau, bukina bwa a ata au kainibaire. Imwin te bwai are e a tia n riki anne, I kona n aki maaku n totokoa te bwai ae I ataia ae e na urua arou.