Kakaean Tibu te Unaine
Reuben Wadsworth, Utah, USA
Kamataata n te tamnei iroun Allen Garns
Teuana te kananokawaki bwa I tuai tekateka ma tinan tamau ni karakina rongorongon maiuna ao n taui mwiin ana ururing ibukiia ana kariki. Imwiin maten tamau ao ai tamau a tuangai aki kukureina i bon irouna ao e aki toki n titiraki, “Bukin tera akea ae tangiria ni kan ataa rongorongou?”
Ngke te kangaanga n te mwane e kairoroia au utu bwa a na mwaing nakon ana auti tinan tamam, are akea kaaina imwiin matena, e waekoa ni kaonaki nanou ma ururing aika a kakukurei, ao aika kananokawaki. Te tairiki teuana tabeua te bong imwiin are ti mwaing nako iai, I mataku n tamnei inanon n nen te tamnei ao te bwaoki ni bwai aika aki kakawaki, are a raonaki ma reeta aika a koreaki, kariaia n te tembora aika a rangin ni maan, ao riki nakon te burokuraem n te taunimate ae boretiaki ibukin taman taman te tia taetae. Imwiin warekan te bwai ni kauring aei, I iangoia ngkana iai riki.
I namakinna ni kan taraa te ruu ietan te auti ao waekoa ni kairaki nakon te baeki are iai inanona te bwaainta ae buru karana ae e taraa n ae e nang karenakoaki. Inanon te bwaainta anne I kunea moan rongorongon maiun tibu te unnaine are e koreia 30 te ririki n nako. I kunea imwiina, ni mimiiu, bwa akea mairouia kaain te utu ae ataia bwa e mena ikekei. Tamau ao ai tamau a bane n eti—E aki rangin ni katabea nanona tibu te unnaine ma taekana ngaia are akea naba ae kaongoa ae a tia ni moana korean rongorongon maiuna!
N te tairiki anne I wareki taeka iaon iteraniba akanne ake waniua, ao ngke I karaoia, I reakina ae bati n rongorongon tibu te unnaine—tera aron maiuna n te kauarinan n reirei, e kanga ni kaitibo ma tibu te unimwaane, ao aron matoatoan kainan te tabo n tamnei are e kamwakuri ngaia ma tibu te unimwaane.
I namakina menana ikekei ngke I wareki iteraniba aikanne, n aron ae kanga e tuangai bwa N na aki raraoma ibukin katian rongorongona are I a tia n iangoia ni karaoia. Warekan rongorongon maiun tibu te unnaine are e bon koroia e rangin ni kakawaki nakoiu ao ni kakerikaka nanokawakiu are I namakinna n te tai ae maan. Bon kakoauaan ana nanoanga te Uea ae teimatoa ao te kakoaua are rongorongon te utu tiaki ti ibukin kakaeakiia bakatibu aika tiaki ataiia n te maiu aei. Bon ibukin ukoukoraia aika a rangin n tangiraki ao naake ti kabanea te tai ae bati ma ngaia iaon te aba.
Ngke I tekateka ma au utu ni korei aia rongorongo ao a titirakinai bwa bukin tera ae aomata a tangiria ni kan atai taekaia, N na kakoaua nakoia bwa a materaoi tataekinakin aia rongorongo ao are a na kakaitauaki irouia aia kariki, kanga n aron are I kakaitaua tibu te unnaine ibukin katukan rongorongona ae kakawaki.