Ti Taekina Taekan Kristo
Tangiraia Tabeman ma KakaoKOron Aroia
I kataia ni karikirakeia au ataei bwa a na karekei anua aika rietata. Ma ngke temanna aia banna ni katooto e karaoa te rinerine ae bure, N na bon miimi ngkana a oota ni bwaai ni kabane aika I a tia ni katai n reireiniia iai.
Mwanen kainabau Janey (e a tia ni bitaki arana) e rikirake n te euangkerio ao bon kaain te ekaretia ae e rangin ni kakaonimaki. Imwiin tokin korakoran ana mare n te tembora ae e taraa ni kakukurei, aomata inanon ana kaomiunitii ae uarereke a moanna ni kabuta nakoa te rongorongo ao ni karaoi motikitaeka ibukina. E kararoa mairouia raoraona aika a mwaiti ao imwiina te Ekaretia.
E moana ana kareke tangira ma te ataeinimwaane ae, Andy, are e waekoa n tiku ni maeka mangaia. I raraoma n te bwai are N na taekinna nakoia au ataei. Natiu aine aika teniman a tangira ai tinaia ae Janey. Ti aki n ae ti ara utu aika rangin ni kaan, ma bon aia tia reirei n te mwaie, ngaia ae a nonoria tabeua te tai n te wiiki.
Inanon namwakaina aika mwaiti, a taku n aia iango bwa e rangin n rawata ana tai n roroko Andy, ma n tokina I tuangiia ae a bootaki ni maeka Janey ao Andy. I kabwarabwara bwa aia rinerine ae a karaoia bon te bure ae rangin ni kakaiaki. A taraa n ae a ota natiu aine, ao ti karaoa te maroro ae tamaroa iaon kakawakin maiuakinan reirein te euangkerio.
Imwiina ao e a riki te bwai ae kamiimi. E katanoata Janey ma te kakukurei nakon te utu ae ngaia ma Andy a kantaninga natia. I a raraoma riki bwa e na kanga mwiin te rongorongo aei nakoia natiu. A ataia ae tiaki aio aron ae tangiria te Tama are i Karawa n aron uotakiia natina nakon te aonaaba? Ngkana a mena n te kangaanga aei, n aia iango e kariaiakaki ao ni bwainaki?
I raraoma inanon wiiki, n aki tangiria n tuangiia natiu te bwai ae e rangin ni boou aei. Teuana te namwakaina imwiina a baireia Janey ao Andy bwa a nang mare. Bukin tera aki katanoata taekan te bikoukou imwiin ae a tia ni mare?
E riki rake te un inanou kanga te buroburo mai inanon te ran. N na kanga n tangira Janey ma tiaki te bwai are e a tia ni karaoia? N na kanga n reiakiniia au ataei n teimatoa n tangira ai tinaia ma tiaki rinerine ake e a tia ni karaoi?
N te bong teuana e tuangai mwaneu taekan te ataeinnaine n ana uoote are e bikoukou. Te ataeinnaine aei e teimatoa n nakon te taromauri ao e taraa ni kukurei ao n ingainga nanona ibukin te bwai ae e na riki ni maiuna n te tai ae e na roko. Ataeinnaine ake tabeman a mino aia iango n aron te bwai ae a noria ni kateina are a noria nakon te kangaanga.
Ma mwaneu, are te tia kakawari n reirei nakon tinan te ataeinnaine, e reiakinna ni boong aika aki reke warekaia ngke e a tia te ataeinnaine n tang ni karokoa e matu, n te rawawata n te rinerine are e kairia nakon te kangaanga aei. Imwiin wiiki n raraoma aika mwaiti, e iangoia te ataeinnaine bwa e na teimatoa n nanokawaki n ana mwakuri, ke e na waaki nako ao ni kukurei. Ibukin ana mwakuri ni kamaiu Kristo, e kona ni kariaia mwiin ana mwakuri ao n itiaki riki rinanon te rairannnano.
N na mimi ngkana e a tia Janey n rinanon te aeka ni bwai ae aekakin aei. Ngke e a tia n nanokawaki n ana rinerine ma, n aki kona ni bita mwiina, e kariai ao n iangoia bwa e na waaki nako?
I namakina te mama n au motikitaeka ae matoatoa ao n au aki konabwai n tangira n aron ana kawai Iesu Kristo ae kantaningaira bwa ti na tangira. Ngke I iangoa maiun te Tia Kamaiu, I uringnga ae E aki toki ni ukoukoriia taan karaoa te bure, n reireiniia rinanon Ana taeka ao ana katooto, ao n tangiriia. Bon te tangira aei ae kakorakorai naano ao e bitiia aomata.
I namakinna ae n angiin te tai I tangiria aomata ma ti ngkana a mwakuri n te kawai ae I iangoia bwa a riai, ma n te tai are a karaoa iai te bure, I kabuakakaiia inanou. Te bwaretaio kangara ngai! I namakinna ae I riai n rairananou. I kainnanoia n reiakinna n tangira te tia bure n aki taekina ana bure. N tokina, I a kona ni kanakoa te un inanou ni kaitara Janey ao ni manga tangiria.
I karekea riki te tai ni marooro ae tamaroa ma au ataei. I kamataata kakawakin te mare imwaain karekean te ataei. A ingainga nanora nakon bungiakin te teei ae boou inanon te utu. Ti bane n tangiria ni boutokaa Janey ao n tibwauaia n te tai ae onoti aei ni maiuna. A ataia au ataei ae e a tia ni karaoa te bwai ae bure Ai Tinaia ae Janey, ma a teimatoa n tangiria ao Ai Tamaia ae Andy ao te kantaninga bwa n te taina aia utu ae tamaroa a na iangoia n oki nakon bain ara Tia Kamaiu ae tataningaira, Iesu Kristo.