Unimwaane Dale G. Renlund: Te Toro ae Ongotaeka
Maing: Tamnein te aobiti iroun Tom Smart, Deseret News; tamnein te aine iroun Joy Basso
E aki kona ni katabetabe te maiu ibukin Dale ao Ruth Renlund. I nuukan aia ka 20 n ririki, a maeka i Baltimore, Maryland, USA. Dale e a tia ni bane ana reirei iaon bwain aoraki n te Uniwetiri i Utah. Ngaia ma Ruth a mwaing nakon taabo ake aki maekanaki ni kona ni karekea te tai ae mwaiti ao ni mataeakina te maeka n te tabo ae John Hopkins School of Medicine. Iai natiia te aine ae botonaine, ae Ashley. Buuna ae kakawaki ae, Ruth, e bwainaoraki ibukin te kaentia, ao Dale e karekea te ongotaeka n kariaia weteana n riki bwa te bitiobi.
Tamnei ni mwamwannano n ana utu Renlund, ma ti n aron ae taekinaki. portrait © Busath.com; background from iStock/Thinkstock
Ngkana e kawariia kaain te uoote, Dale n tabetai e kaira Ashley. N te bong teuana a kawaria kaain te aro ae e aki bati ni kakaonimaki. “I ataia bwa akea temanna ae a kona n totokoa te ataeinaine ae rang kakateke ni mena irarkiu,” e ururing Unimwaane Renlund. E karebwerebwe n ana mataroa te mwaane are e tia n un ao ni kanakoa ana kauntira Unimwaane Renlund teuana te tai mai mwaina.
Ngke E kauka te mataroa te mwaane arei, e rangin bubura ao e tei ni bonota te mataroa. E katurua taraan Bitiobi Renlund. Ashley ae aua ana ririki e taetae n aki iango, “Ngaia, ti konaa n rin ke tera?”
Ma te kamimi, e taku te mwaane arei, “I taku bwa kam kona. Mai riin.”
Ngke a rinnako n tekateka, te mwaane e tuanga Bitiobi Renlund bwa e aki kakoaua te Ekaretia, ke n aki naba kakoaua Iesu Kristo. E reitinako n taetae n un ngke Ashley e kume n takakaro ma taore. N tokina e ruorikaaki man ana kaintekateka, e kamangkoi baina ni bonota taningan tamana, ao e wirikiriki n takarua, “Tamau, tuangnga te koaua.”
Ai ngaia are e karaoia. Bitiobi Renlund e kaota ana koaua nakon te mwaane. E ururing, “Anuan te mwaane e a moana n amarau, ao e roko te Tamnei inanon mwengana.”
Ngkai kaain te Kooram n Abotoro n te Tengaun ma Uoman, e reke ana tai Unimwaane Renlund n tuanga te aonaaba ae bwaninin te koaua (taraa D&C 107:23). “E a roko korakoran te Kimwareirei,” e taku Unimwaane Renlund, “e buoka ni uota Ana Mwakuri ni Kamaiu Kristo nakon maiuia aomata n taabo ni bane. I taku bwa weteau aio e anganai au tai ni karaoia are katinean ae bubura, n taabo riki tabeua, n aron ana tia kakoaua Kristo nakon te aonaaba ni kabane.”
I ikawairake i Meangin Eurobe
E bungiaki Dale Gunnar Renlund i Salt Lake City, Utah, USA, n Nobembwa 3, 1952 Ngaia ma tarina ao mwanena a ikawairake n te taetae n Sweden. Tinaia, Mariana Andersson, e roko mai Sweden, ao aia karo, Mats Ake Renlund, e roko man te taetae-n Sweden n te taaun i mainikun Finland. A roko ni maeka i Utah n te 1950, mai Sweden.
Ana karo Dale a kaitibo n te Ekaretia i Stockholm. Imwin iangoan aia mare, a tokanikai ni karaoia tii inanon te tembora. Ibukina bwa akea te tembora i Eurobe n taai akanne (e katabuaki Temboran Bern Switzerland n 1955), taangaia a nako Utah are a na kona ni kabaeaki n Temboran Salt Lake
Mwanen Unimwaane Renlund ae Linda C. Maurer, are itiua te ririki marangana, e taekinna bwa ngaiia aman naati aika a bane n ikawarake, “a tibwa ataa aron kamimiin ao kakaonimakiia aia karo n eutaki nako ma akean te rabakau n taetae-n Imatang ao teutana te boutoka bwa e aonga n reke te kakabwaia man te euangkerio ao te mare n te tembora.”
Ngke 11 ana ririki Dale, ana karo, te kabenta ao te tia kateitei ae bane arona, e weteaki ni beku bwa te mitinare ae te tia kateitei i Sweden ibukin te teniua te ririki. A kabanea aia tai te utu i Helsinki, Finland, ao Gothenburg, Sweden. A nakon mwangan te Ekaretia ae uarereke, ao natiia a nako n reirei i Sweden. Mwanen Dale ae Anita M. Renlund, are teuana te ririki marangana ma mwanena, e uringa teuana kaangaangan te waaki ni kairiiri: “Aio moan te waaki are e anganira te kubanako ibukina, e ngae ngke ti taetae n Sweden inanon mwengara, ti aki ataa te kuramwa ke tiberingian te taetae.”
N ataeinimwanen Dale iai ana taneiai are e kakorakora ana kakoaua imwiin warekan Ana Boki Moomon. Te beretitenti n te mition i Sweden e kaoiia ataeinimwaane n te Nakoanibonga ae te Aaron bwa a na wareka Ana Boki Moomon, ngaia tarin Dale ae e ikawai, Gary, are 12 ana ririki n te tai anne, e butimwaea te kakaewenako. Dale are tebwi-ma-teuana ana ririki e rinanon naba te kakaewenako. Imwiin warekan Ana Boki Moomon, e tataro ao n titiraki ngkana e bon koaua. E ururing Unimwaane Renlund, “I karekea kaokoron te namakin: ‘I a tia ni kaman tuangkami ni kabane bwa e bon koaua.’ Ao anne bon te taneiai ae kamiimi.”
Dale ma tarina ao mwanena—Gary, Anita, ao Linda—a ururingnga bwa ngke a mwaing te utu n oki nakon te United States, a reitinako n tataetae ao n tataro n Sweden. A uringa naba aia karo n aron kamiimin kaungaan te atatai ni booki aika tabu. A taku, “Te kawai ae tamaroa ni karaoan te oiniango ma ara karo bon man kabonganaan booki aika tabu.” Anita e manikangare, “Ataakin booki aika tabu n ara utu bon te atatai ni kamaiu; e bon aki kai reke.”
Kamimiina, bwa Gary ao Dale a weteaki bwa a na beku i Swedish Mition n titebo weteaia n teuana te tai. A aki katoatoa i bon irouia, ma ngaiia uoman a reke aia tai ni kamanena oin rabakauia n taetae n- Sweden ni beku ibukin te Uea bwa mitinare n te maan ae riaon uoua te ririki. E kabwarabwara ana mition Unimwaane Renlund are e mwaiti te mwakuri ma te taneiai ae kamiimi: “E bon bita-maiu n te tai ni katabetabe ao ni iangoa karaoan te tamaroa are e kona temanna ni karaoia n riki bwa ana reirei Kristo.”
Te Kakabwaia ae Moan te Kamiimi
Imwiin okina man ana mition n 1974, e reirei Dale n te Uniwetiri i Utah. Ataein te reirei ae te kabanea n te tamaroa ao e karekea ana beba ae te baatira tikurii n te kemitituri. Tarina ma mwanena ao raoraona raoi ni koaua a bane n ururinga ana konabwai, babane nanona, mwakuri korakora, ao katabeakina ni kabane ana mwakuri—tamaroana e reitinako ni kaokaotia. E takaruaia Gary, “Bon te tia mwakuri ae rang mwamwakuri are I a bon tibwa nooria.”
N ana uoote Dale e kaitibo ma te ataeinaine ae arana Ruta. Neiei bon natin temanna kaain te beretitenti n te titeiki, Merlin R. Lybbert, are imwina e a manga beku bwa te Itingaun. N ana ururing Dale e karekea angana ma korakorana ni butiia Ruth bwa e na otinako ma ngaia ni maroro, ma e taku I aki. Ngke e kataia riki tabeua te namakaina imwiina, e taku Ngaia. Aroaron Ruth e bon kaokoro teutana. E uringnga neiei are ngke e taetae teuaei n te bootaki n toa iaon ana mition, neiei e kukurei. A karekea te rereitaki ae tamaroa, ao neiei e kariaia ngke e tuangaki bwa a na marooro, ma e a manga taonna n tabena ae e na karaoia n touati n te botaki teuana. Ma ngke e a manga tuangnga riki ao e a kukurei.
Maing: tamnei iroun Kristen Murphy, Deseret News; tamnein te mare © Newman Photography
A mareaki Dale ao Ruth n 1977 n te Tembora i Salt Lake ngke e iriira te reirei teuaei ibukin te bwainaoraki n te Uniwetiri i Utah ao neiei e tia reirei n te South High School, e mena naba i Salt Lake City. “Irarikin ana babaire ni kakaonimaki n te Ekaretia,” E taetae Unimwaane Renlund n akea ana kaangaanga, “mareakiu ma Ruth e riki bwa te bwai ae moan te tamaroa ni maiu.” Natiia te aine Ashley, e bungiaki teuana te wiiki imwiin ana anga beeba Unimwaane Renlund man te reirei ibukin te bwainaoraki n 1980.
E rangin kukurei ngkanne Unimwaane Renlund ngke e kariaiakaki man te Onaoraki ae John Hopkins, ana moan rinerine ibukin reitakin reireina n te bwainaoraki. A mwaing te utu nako Baltimore, Maryland, ike e riki bwa mwakoron te onaoraki bwa te tia mwakuri.
Rikirake rinanon Kataaki
Inanon Okitobwa 1981, e a kuneakite kaentia n ana tabo ni kariki Titita Renlund. E rinanon uoua korokoro ao ruaiwa namakaina bwainaorakiana. Ni karawawataakina E ikakorakora n tararuaan Ruth ao natiia te aine, e ururing Unimwaane Renlund, “I bon rootaki, ao kanga au tataro a aki roko i karawa.”
Ngke e uotarikaaki Ruth man te onaoraki, e rang ni mamaara, ma a tangiria n tataro n ikotaki. E titirakina Titita Renlund ngkana e kona n tataro. “Ana moan taeka neiei a kangai, ‘Tamara are i Karawa, ti karabwako Ngkoe ibukin mwaakan te nakoanibonga are e karaoaki bwa akea totokoana bwa tera ae riki, ti kona ni ikotaki n akea tokina.’”
Inanon te tai anne, e namakina te kaniaki ae e onoti nakon buuna ao nakon te Atua. “Tera are I a kaman oota n taekana are te utu akea tokina inanon au iango, ngkai I oota inanou,” e taku Unimwaane Renlund. “Mamaaran Ruth e bita kairan maiura.
Kanakoan ana iango man aorakina, Titita Renlund e iangoia ni ira te reirei ibukin te tua. “I bon ti iangoia, ‘Aio e na bon ti riki bwa te taneiai ae buakaka ni karokoa ti karaoa te bwai ae raoiroi mai iai,’” e taku Titita Renlund. “Bon akea n ara babaire ibukin reken te kaentia ngke te ataeinaine ao tii temanna natira. Ao kamaiuau e kananououa. Ma ti namakina te reirei n te tua bon te bwai ae riai.”
E karekea ana kamatebwai riki e reitinako ni bwabwainaoraki ibukin aorakina ao buuna e reitinako mwakurina.
Te Bitiobi i Inukan-te Kaawa ae Baltimore
Ngke Unimwaane Renlund e a bita te waaki man teniua te ririki iaon te tia mwakuri n te onaoraki nakon reiakin te mwakuri n te buro, e manga intawiunaki ngke e na manga riki bwa te bitiobi ibukin te uoote ae Baltimore. Brent Petty, are bon te moan kauntira n te Baltimore Maryland Stake n te tai anne, e uringa te intawiu anne. Ngaia ao te beretitenti n te titeiki, Stephen P. Shipley, e namakina “korakoran ana kairi te Tamnei ae Raoiroi” ngke a intawiunna.
Te Tari Petty e uringa are “E kamoamoaki ngaia ngke te bitiobi ae te kabanea n tamaroa,” riki ma rabakauna ao kakaewenako n ana utu are e taneiai inanona. Ngke e weteaki Unimwaane Renlund nakon te Kooram n Abotoro n te Tengaun ma Uoman n te ririki ae nako, te Tari Petty e ataia bwa kaain te uoote ae Baltimore n reitaki ma raoraon Unimwaane Renlund n ana tabo ni mwakuri n te onaoraki, angiia ake tiaki Aomata aika Itiaki ni Boong aikai, a rang kukurei. A anga aia tangira ibukina ao mamataaiakinan ana beku ao e a moamoariki anuana n aomata.
Kamoamoan te Beku
Inanon 1986, imwiin ana angabeeba Titita Renlund man te Uniwetiri man Reirein te Tua i Marylandao Unimwaane Renlund e kabanea ana teniua n ririki n te burokuraem ni mwakuri n te onaoraki ao teniua te ririki n reirei iaon mwakurian te buro, a oki nako Utah. Titita Renlund e moana ana kataneiai iaon te tua n aobitin te kaetitua i Utah, ao Unimwaane Renlund e riki bwa te burobetia iaon bwain aoraki n te Uniwetiri i Utah. Ibukin 18 te ririki e tarekita n te onaoraki n te Utah Transplantation Affiliated Hospital Cardiac Transplat Program.
Inanon 2000 e riki naba bwa te tarekita ibukin te Heart Failure Prevention ao Treatment Program i Intermountain HealthCenter i Salt Lake City. Iai inanon te burokuraem kanimwan bwamwin te buro ao te buro are e karaoia te aomata. Donald B. Doty, M.D., e tabangaki kinaakina bwa ngaia te tia korokoro n te buro, raona ni mwakuri ao raoraon Dr. Renlund n ana Onaoraki te LDS. Dr. Doty e taku,“Kamimiin Ana kataneiai, e-nano taraana, e konabwai ni mwakuri, ao ana nanoanga e rang tamaaroa.”
Dr. A. G. Kfoury, te katorika ae taua te aro are mwamwakuri ma Dr. Renlund inanon ririki aika a mwaiti, e taekinna bwa Dr. Renlund bon te tia kaira te mwakuri ni kamwaingan te buro n te aba, “akea n aiarona, e kokoaua n te bwai ae e karaoia, e atataiaomata, ao n nanoanga.” E taku Dr. Renlund “e kaotinakoa te tamaroa mai inanoia aomata. E karaoia ma te karaurau. E ongora raoi ao tabe nanona iai, ao e rang n anaakii nanona n aia tokanikai koraki ake a mwakuri ma ngaia.” Dr. Renlund e kairi ma te karaurau man te katooto ao e aki toki n tabe ibukiia aia utu raona ni mwakuri.
Dr. Kfoury e onoti n taekina ana nanoanga Dr. Runlund ibukiia ana aoraki. N te katooto, ngkana te aoraki akea baona, Dr. Renlund e kona ni kabutiia n ataakin raroan mwengan te aoraki, ni katoka teuarei ke neierei n ana kaa, ao ngkanne e a manga kabuta te aoraki n okira te onaoraki. Dr. Kfoury e taku aio e bon rang kamimi.
Beku n te Itingaun
Imwiin rikina bwa te beretitenti n te titeiki ibukin nimaua te ririki i Salt Lake Uniwetiri Moan Titeiki, Unimwaane Renlund e weteaki n 2000 ni beku bwa te Itingaun n te Aono i Utah. Ngkanne inanon Eberi 2009 e manga weteaki n riki ngaia bwa te Mataniwi ni Kabuta n te Itingaun. Ana moan mwakuri e na beku bwa te Beretitentii n te Aono i Maiakimaeaon Aberika, te aono are iai ana unite te Ekaretia 25 aaba aika kakaokoro.
Titita Renlund e tibwa aia kaeka nakon te wewete: “Bon te bwai ae ti aki kantaningaia, ti butimwaia. Ao a taku aomata, ‘Ko nang kitana nakoam ngkai ko a roko n te kabanea n rietata.’ Ao anne a bon rang koaua. Ma ngkana te Uea e kainnanoa nakoara ae te kabanea n rietata ao aio ngkanne are ti kona iai ni beku, ngkanne anne te tai nako.”
N taetae iaon ninikorian buna, Unimwaane Renlund e taku, “E karaoa te anganano ae korakora.” Titita Renlund e kitana ana mwakuri ngke te beretitenti n ana tabo ni mwakuri n te tua ao ni kitan nakoana n te bootaki tabeua aika bubura ni beku ma ngaia. “Ti kanakoaki nako Aberika ao ti kairaki mairouia Aomata aika Itiaki taekan bwaai aikai riai,” e taku Unimwaane Renlund.
Teuana te Tabati inukan Congo e titirakiniia kaain te aro bwa tera kakaewenako ake a kaaitarai, ma a aki kona n iangoa teuana te kakaewenako. E a manga titiraki riki. Tokina, te unimwaane ae tau mai bukin te ruu e teirake ao e taku, “Unimwaane Renlund, ti na kanga ni karekei kakaewenako? Iai iroura ana euangkerio Iesu Kristo.” Kaotiotana iaon te taneiai anne, Unimwaane Renlund e kabwarabwara: “I tangiria n riki n aroia Congolese aika Itiaki aikai, ake a tataro ibukin te amwarake ni katoa bong, a kakaitau ibukiia aia utu. E karako kaubwaia, ma a bane n reke bwaai irouia (n te euangkerio).”
Ni beku bwa te Beretitentii n te Aono ibukin nimaua te ririki, Unimwaane Renlund e mwananga te ngaa te maire rinanon rababan Aberika Maiakimaean te Aono, e kawariia kain te aro ao mitinare. E kamatebwaia te taetae ni Buranti ibukina e kamanenaaki te taetae n tabeua aba akanne.
Uniimwaane Jeffrey R. Holland, man te Kooram n Abotoro n te Tengaun ma Uoman e katabeaki ni beku ngaia bwa te Beretentii n te Aono i Maiakimaeaon Aberika n te tai anne, e taku Unimwaane Renlund: “Akea temanna ae kona ni kakaonimaki nakon tabena n te aono ma kaaina ao a kainnanoa nakon riki are e karaoia Unimwaane Renlund. E beku n aki tokitoki ni kan kinaia aomata, n tangira aia katei, ao ni buokiia ni kamwaingiia Aomata aika Itiaki nakon kamaiuakiia.”
Weteaki n Riki bwa te Tia Kakoaua ae Onoti
N Tebetembwa 29, 2015, e karekea te wewete ae e aki kantaningaia man Aobitin te Moan Beretitentii. N ana Tabo n Tararua te Ekaretia, “I rang butimwaeaki iroun Beretitenti Thomas S. Monson ao ana kauntira ake uoman. Imwiin tekatekara, Beretitenti Monson e taraai, ao e taku, ‘Tari Renlund, ti karabwabwa te wewete aei nakoim n beku bwa te membwa n te Kooram n Abotoro n te Tengaun ma Uoman.’”
Unimwaane Renlund e kuba man mimi. E nanorinano ni kariaia te wewete ao e ururing, “Iangoa Beretitenti Monson e namakina bwa riiu a bane ni maenako, ao e taraai, ao e taku, ‘Te Atua e weteiko; te Uea e anganai bwa N na ataia.’”
Unimwaane Renlund e okira ana aobiti, e kaina te mataroa, ao bwaka iaon bubuaniwaena n tataro. Imwiin okin nanona, e wetea buuna. “Aron are karaoia bon teuana maibuakon te tounako,” e taku, “ma bwaninin te anganano ae matoa nakon te Uea, Ana Ekaretia, ao nakoiu.”
Natiia te aine, Ashley, e kakoaua, “Tamau e karekea te bwai ae tamaroa ibukin te kakabwaia mai karawa ao n tia n tauraoi n ana bong ni maiu ni beku ibukin te wewete aei. Iai irouna nanona ae bubura; e onrake n te tangira.”
Kabotauana, tarin Unimwaane Renlund, Gary, e taku Unimwaane Renlund “e bon katauraoi man te tai ae maan, ni ikoti kakaewenako akanne ao man beku ibukin weteana are e roko ibukina. Aio bon mwakoron te babaire ae bubura are e kaman tiku n ana tabo, ao e bebete ibukiu bwa na kamatoa.”
Maing: Tamnein te aobiti iroun Tom Smart, Deseret News; tamnein te aine iroun Joy Basso
N ururing iaon kakawakin te bwai ae te wewete, Unimwaane Renlund e taku, “I namakinna I aki tau, ma I tii tau bwa I ataia bwa Iesu Kristo bon te Tia Kamaiua te aonaaba. I kona ni kakoaua ae E bon maiu, are Ngaia au Tia Kamaiu ao am Tia Kamaiu. I a ataia bwa bon anne te koaua.”