Katauraoiko ni Karaoan te Bwai Teuana—ao Imwiina Karaoia
Unimwaane Hugo E. Martinez
Man te Itingaun
Katauraoam ao karaoan Ana mwakuri te Uea e na bita maium.
Te tia reirei ngai n te tieminari inanon onoua te ririki. Ti kaitibo n te aoa 6:00. ni katoa ingabong ni mweengau i Puerto Rico. E kainnanoa te mwakuri ae korakora ni katauraoi reirei ni katoabong, Te Moanibong nakon te Kanimabong. Ma I kukurei iai, ao e buokai ni karikirakea te tangira ae bati nakoia kairake n te Ekaretia.
I kunea bwa angiin te bwai ae a karekea ataein te reirei man te tieminari e boboto iaon aia katauraoi. Ngaia ae ngkana ko tangiria ni karekea te kabwaia ae bati man reirein te tieminari, I kaoko bwa ko na kamatebwaia te reirei imwain te tai ao n iangoia raoi. Nakomai nakon Kristo ma te nano ae korakora ibukin te atatai. Nakomai nakon te tieminari ma te nanorinano ao te anua ae kukurei, n aron te ataei ae uarereke, ae tangiria n reirei n tainako. Katauraoiko bwa ko aonga ni kona n tibwatibwa bwa kam aonga ni kona n reirei imarenami. Ao roko ma taian titiraki. Temanna te kairake, te kibu are e warekaki, ke te titiraki are e tabekia te tia reirei e kona ni kaekaa am titiraki.
Te kabanea n nakoraoi ni kaetieti n tain te kiraati ke te bowi n te Ekaretia ngkana ko katauraoiko ao ko karekei taeka aika kanamakinaki iroun te tamnei ake a roko kanga taian iango. Koroi, ao karaoi nanoia. Tarai booki aika tabu riki tabeua ke taetae n te maungatabu ni kabuta ke koroboki man ana maekatiin te Ekaretia iaon iango akanne. Iangoia ni kabonganai am iango ao am namakin ao n tauraoi n nako ni beku, ibukina bwa ngkana iai koaua aikai inanom, ao e na kabonganako te Uea ni buokiia tabeman.
Imwiina, ngke I beku n taben te beretitenti n te mition ma buu, I kunea bwa te timenari bon te bwai ni katauraoi ae tamaroa ibukin te mwakuri ni mitinare. Inanon ririki I a tia n noroa mwakan te euangkerio ae kamimi ni kakabwaiaiia ataein te reirei n te tieminari aika a kakaonimaki. A tia ni kamwakuri reirei ake a reiakinaki iai inanon reirei aikanne nakon kakaewenako aika a kangaanga ni maiuia ao a tia n rinanon kangaanga, ao n tia n oki nakon ana waaki ni kakukurei te Ekaretia imwiin aia tai n aki kakaonimaki.
Ko rangin ni kakawaki iroun te Uea. Ko bon rangin ni kakawaki. Ana mwakuri te kairake bon te katauraoi ibukin te mwakuri ni mitinare ao imwiina karaoan te mwakuri ni mitinare. Ngkai, ko riai n ota n anne ngkana ko teimatoa ni karaoa te mwakuri ni mitinare, ao ngkana ko teimatoa ni katauraoi, aio are e na kaungako ao ni kaira rikirakem n riki bwa ana mitinare te Uea. Ko aki kainnanoa te ara ni mitinare iaon bwabwaam ni karaoa te mwakuri ni mitinare, ibukina bwa ko uota aran Iesu Kristo ao e na koreaki n taainako inanomi ibukin ami berita aika tabu.
E koaua naba anne n rongorongon te utu ao n te mwakuri n te tembora. Te katooto, n Aonon te Caribbean, ike I beku iai, titeiki ake a kabonganaia kairake bwa taan rabaku iaon rongorongon te utu e kakorakora riki aia batienti kaain te ekaretia ni kakaei aara ibukin te mwakuri n te tembora ao karaoan te mwakuri n te tembora. Inanon teuana te titeiki iai 20 kairake aika a weteaki bwa taan rabaku iaon rongorongon utu inanon teuana te ririki imwain are a bon tau ibukin te mitinare. Ngke a kawariia kaain te ekaretia inanon mweengaia ni kaotaia n aron karaoan rongorongon te utu, a taetae nakoia aomata inanon kawaia man tuangia taekan rongorongon te utu ao te tembora. Anne bon te mwakuri ni mitinare!
Au kantaninga bwa ngkana a karaoi mwakuri ni mitinare, a ria n tia ni kaman namakina te Tamnei n te kawai ae korakora—te kantaninga bon inanon mweengaia, ma ngkana tiaki ikekei, ao n etina raoi ngke a karaoa te mitinare, rongorongon te utu, ao te mwakuri n te tembora. Ngkanne, ngke a rin inanon te tienta ni kataneiai ibukiia mitinare, au kantaninga bwa akea mai ibuakoia ae tuangai, “I a tia n namakina te Tamnei n ae korakora riki ikai (inanon te tienta ni kataneiai ibukiia mitinare) nakon ae I a tia n namakinna inanon maiu n taai aika nako.” A riai n tia n namakina Ana kairoro n ae korakora riki imwain anne.
E tangiriko te Uea. Ana babaire bon ibukin rongorongon te utu, tembora, ao mwakuri ni mitinare ni karaoaki iroumi. Iai iroum rabakaum ao te atatai. Ngkana ko tauraoi raoi, ko kona ni karaoa te mwakuri aei. E na kakabwaiako ao ni bita maium.