N Aki Tabe Bwa Antai Ngkoe
E maeka te tia korokaraki i Utah, USA.
“O tiaki,” e iango Andi. “Tera ae na riki ngkai I aki kabaeaki ma au utu?”
Ngai natin te Atua, ao e kanakomaiai” (Aia Boki n Anene Ataei, 2).
“I taraa n raoiroi,” E iango Andi ngke e waekoa n taraa te tirotaam. E bwaina ana kunnikai ae mamate nanona iai ae uraura. E tangiria n tainako ni bwaina ana kunnikai ae te kabanea n tikiraoi n te Tabati. E biri rikaaki n nako ni kaingabong.
E a tibwa kabanea kanana Andi ngke aia kaa ana utu Reeder e katangi bu man te kawai. “Tiabo, Mom! Tiabo, Dad!” E taku Andi, ni kitiniia ngke e biri n otinaki man te mataroa.
E ngae ngke Mom ao Dad tiaki kaain te Ekaretia, a kaunga Andi bwa e na nakon te taromauri ni katoa wiiki. A tia ana utu Reeder ni ka kabwaka n te kaa e kuri katoa Tabati man te tai are bwabetitoaki iai ao ni kamatoaki Andi e tangira aron aia mwakuri ana utu Reeder ni karaoia bwa e na namakina te butimwaeaki ao te tangira n tainako.
Imwiin te bootaki n toa bon te tai ibukin te Moanrinan. Andi e tangiria ni ira ana kiraati te Tari ao Titita Long n te Moanrinan ae 8, 9, 10, ke 11 aia ririki. A rangin n akoi te Tari ao Titita Long, ao aia reirei bon kabanea n tamaroa n tainako.
“N te bong aei ao ti nang taekin rongorongon tembora,” E taku Titita Long. “Tera bwaai tabeua aika ti atai ibukin te tembora?”
E ata te kaeka teuana Andi: “Ti kona ni karaoi bwabetito n te tembora.” E rangin n ingainga nanona n te bwai anne bukina bwa ni katoa ririki ao e karaoa mwanangana te ataeinnaine n ana uoote nakon te tembora ni karaoi bwabetito. E aki maan ao e a kona ni karaoia naba Andi!
“E rangin n tikiraoi, Andi. Tera riki ae ti ataia?”
“Ko kona ni mareaki n te tembora,” e taku raoraon Andi ae Allison.
“E rangin n tikiraoi,” e taku Titita Long. “Iai riki?”
“A kona utu n ikotaki n aki toki ngkana a kabaeaki inanon te tembora,” e reitia Allison.
“Ma tiaki au utu,” e iango Andi. “A tuai kabeaki Mom ao Dad n te tembora!” E aki maan ao e ura moana, ao e moanna ni wanako ran ni mata mai matana.
“Iai am kanganga, Andi?” e titiraki Titita Long.
“Eng,” e taku ma wawanakon ngakona, ni kataia n aki tang. Ma e kona n namakina bukibukin buroona ni karokoa banen te reirei.
Ngke e a bane te reirei, E tekateka Titita Long irarikin Andi ao ni katokaa baina iaona. “Tera te bwai ae e riki?” e titiraki.
“N na aki ikotaki ma mom ao dad n aki toki,” e taku Andi. “A tuai mare n te tembora. Antai ae n na ikotaki ma ngaia imwiin ae I mate? E na kona Tamau are i Karawa n teimatoa n tangirai ngkana tiaki kaain te ekaretia au karo?”
Titita Long e kamwataua taraakin matan Andi. “N aki tabe bwa antai ngkoe ao akea te kangaanga ngkana a tia n roko am utu n te tembora ke a tuai, ko bon teimatoa n riki bwa ana utu te Tama are i Karawa. Ko kona n tiku ni kaan nako Ina ao n riki bwa te banna ni katooto nakoia tabeman. E tangiriko, e kairiko, ao e kamanoko, n tainako, ni bwaai ni kabane. E tangiria ni kakabwaiako ma am utu. Nkgoe bon natin te Atua, Andi.”
N te tai anne ao buroon Andi e moanna n namakina te kukurei teutana, ao te bukibuki e toki. Ngkai e a kaonaki nanona n te tangira. E ata te bwai are e a tia n taekinna ana tia reirei bwa e koaua.