Mga Leksyon gikan sa Inahan
Ni Elder Jairo Mazzagardi
Sa Seventy
Sa dihang nagtubo pa ko, kon makakwarta mi, kuhaon sa akong mama ang pinakanindot nga kwarta—kadtong dili kaayo kun-ot o hugaw—ug ihatag kini ngadto sa ministro sa simbahan nga among giapilan. Gihimo ni niya sa iyang tibuok kinabuhi. Miingon siya, “Kini iya sa Dios.” Ang ilang ehemplo nagpabilin kanako sukad niadto. Sa dihang nabunyagan ko sa Ang Simbahan ni Jesukristo sa mga Santos sa Ulahing mga Adlaw isip usa ka hamtong, dili lisud alang nako ang pagbayad sa ikapulo tungod kay ang akong inahan mitudlo nako sa pagsunod niana nga balaod.
Ang akong mama mitudlo usab nako nga magmatinuoron, bisan kon nagpasabut kini sa pagbuhat sa lisud nga mga butang. Ang among silingan dunay tanang mga matang sa tanom ug utanon. Usahay ang iyang prutas motubo habig sa among koral. Kausa akong gipu-po ang pipila niini ka bunga ug gidala ngadto ni mama. Mitan-aw siya nako ug miingon, Dili kana atoa.” Dili ko katuo niini. Miingon ko, “Unsay imong gipasabut? Misulod kini sa atong koral!” Miingon siya pag-usab, “Dili kana atoa.” Dayon iyang gigunitan ang akong kamot, ug miadto mi sa balay sa among silingan. Nangayo mi og pasaylo sa pagkuha sa iyang prutas. Miingon ang akong mama nga kon duna mi gusto nga butang, kinahanglang makuha namo ni sa matinuorong paagi.
Tingali ang inyong mga ginikanan dili mga miyembro sa Simbahan, o dili kamo kanunay uyon sa ilang mga pagpili. Makakat-on gihapon kamo og tinuod nga mga baruganan gikan nila, sama sa pagkamatinuoron, responsibilidad, pagpaningkamot sa kaugalingon, ug kakugi. Kadto nga mga baruganan dako nga mga panalangin sa inyong kinabuhi.