Pagserbisyo Unahan sa Jordan

Ni R. Val Johnson ug Rachel Coleman

Mga Magasin sa Simbahan ug Publishing Services

O bisan asa kamo kinahanglan sa Ginoo.

Kritikal ang panginahanglan.

Niadtong 2013, lima ka kaso sa tipdas ang mitakboy sa kampo sa Za’atari refugee sa nasud sa Middle Eastern Jordan. Sobra sa 100,000 ka mga Syrian refugee, nga nagpuyo sa naghuot nga kondisyon, namiligro niining grabe nga makatakod, makuyaw nga virus. Ang gobyerno sa Jordan nagplano og dakong kampanya sa pagbakuna aron malikayan ang pagkatap sa kagaw. Ang plano sa pagbakuna og dili mominus sa 90,000 ka mga Syrian refugee tali sa edad nga 6 ka bulan ug 30 anyos sulod sa duha ka semana.

Apan adunay problema. Ang United Nations Children’s Emergency Fund (UNICEF) duna sa serum. Ang Jordanian Ministry of Health dunay mga klinika. Unsay wala nila mao ang cold-chain supply items—mga syringe, mga sudlanan alang sa hait nga mga instrumento, mga serum cooler—ug hapit wala nay panahon.¹

Nakiglambigit sila si Ron ug Sandi Hammond, senior welfare missionaries nga nagserbisyo isip mga country director sa Jordan alang sa LDS Charities. Samtang sila si Ron ug Sandi aduna nay relasyon sa pagpakigtambayayong uban sa UNICEF ug sa Ministry of Health, dali silang miapil sa sabut-sabut tali niini nga mga organisasyon aron sa pagtino kon sa unsang paagi ang LDS Charities makatabang.

Miingon si Ron, “Nagpakisayud mi mahitungod sa kantidad sa pagpalit og cold-chain supply items. Sa dihang gisultihan mi nila, miingon mi, ‘Nagtuo mi nga ang LDS Charities makatabang.’ Miingon sila, ‘Unsa ka dali? Kinahanglang maglihok na kita niini!’”

Sulod sa 20 ka oras ang LDS Charities miaprobar sa pagpalit sa gikinahanglang mga cold-chain supplies. “Sa dihang among gipahibalo ang Ministry of Health ug ang UNICEF,” miingon si Ron, “nakadayeg sila. Giunsa man sa usa ka NGO [non-governmental organization] paglihok dayon? Wala lamang ang kampanya sa pagbakuna natukma sa iskedyul, apan nakadasig usab kini sa kampanya sa tibuok nasud nga nakabakuna og gatusan ka libo ka refugee nga taga-Jordan ug taga-Syria.”

Ang krisis nalikayan.

Dugang pa, kining mabungahon nga pakigkumboya sa UNICEF, Jordan’s Ministry of Health, ug LDS Charities nakahimo og potensyal nga panagtambayayong sa umaabut.

Sa unsa nga paagi nga sila si Ron ug Sandi Hammond miabut nianang importanti nga higayon sa Middle East mao ang usa ka tugon sa pagtuo sa mga Hammond ug inspirasyon sa programa sa Church’s senior missionary.

Gikinahanglan: Mga Missionary Couple

Niadtong 2012 ang mga Hammond nagserbisyo isip ordinance worker sa Rexburg Idaho Temple. Si Ron dunay malampusong dental practice ug nagtudlo sa Religion Department sa Brigham Young University–Idaho. Apan ang malinawon nga kahimtang sa ilang kinabuhi kalit nga nausab uban sa espirituhanong impresyon sa pagsumiter dayon sa mga papeles nga moserbisyo og misyon. Ang tayming nakasurprisa nila. Ang ilang minyo nga mga anak anaa sa lain-laing ang-ang sa panarbaho ug pagbalhin og lugar, ug si Ron wala pa maghunahuna nga moretiro. Apan ang Espiritu mihatag nila og kasiguroan nga sila gikinahanglan ug nga ang tanan maayo ra.

Wala damha, ang mga lider sa priesthood sa punoang buhatan sa Simbahan nagpuasa ug nag-ampo nga makakita og tukma nga magtiayon nga moserbisyo isip mga country director alang sa LDS Charities sa Amman, Jordan.

“Klaro kaayo,” miingon si Sandi, “nga ang Ginoo nag-una namo, nag-andam sa mga detalye sa piho nga assignment nga Iyang giandam alang namo. Nasayud kami nga gibuhat kini Niya alang sa matag misyonaryo nga moserbisyo. Makahupay nga masayud nga ang Manluluwas nagpahimutang sa mga butang alang nimo sa pagserbisyo sa dili pa ikaw moabut.”

“Sa paghandom,” miingon si Ron, “mapasalamaton kami nga wala mi magbutang ni mamugos kon asa kami gusto nga moserbisyo. Ang pagtugyan niini ngadto sa mga kamot sa Ginoo makatugot Niya sa paghatag namo og kasinatian nga dili unta namo masinati.”

Kana nga kasinatian naglakip sa pagpakigtambayayong sa halangdon pamilya sa Jordan sa mga humanitarian project nga gitinguha sa mga halangdon. Ang mga Hammond nakigtambayayong sa lokal nga mga ospital ug mga klinika sa paghatag og training ngadto sa Jordanian medical staff bahin sa mga kahanas sa life-saving neonatal resuscitation, nga miresulta sa pagkunhod sa mangamatay nga bag-ong natawo nga bata. Pinaagi sa ilang mga paningkamot ug sa mga paningkamot sa ubang mga missionary couple, ang LDS Charities mihatag og training ug ekipo ngadto sa mga vision clinic ug mga organisasyon nga nagserbisyo niadtong dunay pisikal nga mga kakulangan. Uban niadtong gisuportahan sa mga Hammond ug sa ubang mga welfare missionary mao ang sentro nga nagtudlo sa mga babaye nga dunay pisikal nga mga kakulangan unsaon sa pagdesinyo ug paghimo og mga sinina ug mga handicraft. Kini nga mga kahanas nakahatag sa mga estudyante og oportunidad nga mas makasangkap sa ilang kaugalingon ug sa ilang mga pamilya.

midwives practice neonatal resuscitation techniques

Ubang mga proyekto naglakip sa pagpakigtambayayong sa ubang mga NGO ug sa gobyerno sa Jordan sa pagresponde sa emerhensya ug pag-screen sa Jordanian nga mga estudyante nga makadawat og usa o duha sa scholarship matag tuig nga moeskwela sa Brigham Young University. Usa sa labing makatagbaw nga mga kasinatian nga nasinati sa mga Hammond mao ang pagpakigtambayayong sa Latin Catholic Church sa pagtukod og mga kwarto sa eskwelahan alang sa mga Kristiyano nga Iraqi nga walay laing kapaingnan.

Uban sa Ginoo sa Iyang Ubasan

Samtang didto sa Jordan ang mga Hammond nakat-on kon unsa ka tinuod ang saad sa Ginoo niadtong nagserbisyo Kaniya: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

“Ang Dios miapil sa buhat,” miingon si Ron. “Uban Siya sa Iyang mga sulugoon sa ubasan. Si bisan kinsa nga magtiayon nga magmisyon kuyugan sa Ginoo diha sa ubasan. Wala kami motuo og mga milagro sa Jordan; gisunod namo kini.”

Dili ikalalis, ang mga anghel nga ilang nabati sa “palibut” nila naglakip sa langitnong mga anghel, apan giapil usab nila ang mortal nga mga anghel, ilabi sa ilang mga anak, kinsa misuporta sa ilang desisyon nga moserbisyo nga layo sa panimalay.

Ang ilang pamilya usab gipanalanginan sa mapanalipdanon, mapaluyuhon nga gahum sa Ginoo. Importante nga mga desisyon sa panarbaho ug pagbalhin nahimo, ug mga kabalaka sa potensyal nga mga komplikasyon sa pagpanganak nasulbad sa dihang ang ilang mga anak miduol ngadto sa Ginoo, nagtinambagay, ug nag-ampo ug nag-puasa alang sa usag usa.

Ang mga panalangin nga nadawat sa ilang mga anak talagsaon kaayo nga sa dihang sila si Brother ug Sister Hammond giimbitar nga patas-an ang ilang duha ka tuig nga misyon ngadto sa tulo, ang matag usa sa ilang mga anak mipadayag og madasigong suporta. Nakamatikod sila nga ang Ginoo dunay gibuhat nga espeyal kaayo alang nila isip resulta sa pagserbisyo sa ilang mga ginikanan.

Sa gihapon, nabati sa pamilyang Hammond nga ang panagbulag usa ka sakripisyo. Ang pagkalagyo nga mahimutang sa pikas bahin sa kalibutan gikan niadtong ilang minahal lisud. Apan dili na kini ingon ka lisud sama sa kaniadto. Ang teknolohiya nakapahimo alang sa pamilya nga malambigit sa kinabuhi sa usag usa kanunay kon gikinahanglan. Si Sandi miingon, “Ang mga magtiayon dili mawagtangan og kahigayunan sa pagkontak sa ilang mga pamilya. Kanunay namong makontak ang among mga pamilya sa among mga anak. Tungod sa FaceTime ug mga email, ang among upat ka bag-ong mga apo, natawo samtang kami nagserbisyo, nakaila namo ug madasigon ug maabiabihon sa dihang mipauli na mi.”

Pagbuka sa mga Mata ug mga Kasingkasing

Sa mga panalangin nga gibati sa mga Hammond nga ilang nadawat gikan sa ilang pagserbisyo mao nga nabuka ang ilang mga mata sa kamanggihatagon ug kamahigalaon sa mga tawo sa Jordan. Sa dihang unang nadawat sa mga Hammond ang ilang tawag, wala sila makasiguro sa mga tawo nga ilang serbisyuhan.

“Apan among nakaplagan ang among higala nga mga Muslim nga malumo ug manggihatagon,” Si Ron miingon, “ug kami nakasiguro nga kon sila makahibalo nga namiligro mi, sila manalipod kanamo.

“Ang ilang gugma nga putli talagsaon. Ang mga taga-Jordan dili makaantus nga dili motabang sa kon mahibalo sa uban nga walay mahimo. Nagpasulod na sila og mga refugee sukad pa sa panahon ni David. Ang Biblia dunay daghang mga pakisayran sa ‘unahan sa Jordan,’ ug nagsugod kami sa pagsulat sa mga letra ‘Unahan sa Jordan’ isip pag-ila sa serbisyo sa kalooy nga among gihatag niining masaysayanong maloloy-ong nasud. Sulod na sa gatusan ka tuig ang Jordan mao ang dapit sa gugma nga putli, ug ang Ginoo mipanalangin sa mga tawo tungod niini.”

Ang pagpakigtambayayong pag-ayo uban sa mga tawo sa Jordan nakapahimo sa mga Hammond sa pagpalambo og lig-on nga panaghigalaay. “Giimbitar kami sa daghang mga Iftar nga pangaon, ang pangaon nga motapos sa kada adlaw nga Ramadan nga puasa,” miingon si Sandi. “Ang among mga higala nga Muslim miimbitar usab namo sa mga engagement party, mga kasal, ug ubang mga okasyon sa pamilya.”

Ang Simbahan dili mo-proselyte o motugot og mga bunyag sa mga Muslim sa Jordan o bisan asa diin ang balaod midili niini, mao nga ang mga Hammond wala mopakigbahin og impormasyon mahitungod sa Simbahan. Hinoon, ilang gitutukan ang pagtukod ug pagpalig-on sa mga relasyon—uban sa halangdong pamilya, lokal nga humanitarian mga partner, ubang mga couple missionary nga nagserbisyo uban nila, ug sa mga lider sa relihiyon ug gobyerno. Kon pangutan-on sa mga detalye mahitungod sa Simbahan, ang mga Hammond miawhag sa mga nangutana sa pagbisita sa LDS.org.

Ang Panginahanglan sa Pagserbisyo

Sa pagkonsiderar sa talagsaong mga kasinatian nga nasinati nila ni Ron ug Sandi, mibati ba sila og espesyal uban sa mga magtiayon nga gitawag sa pagserbisyo—o kana gitawag sa pagserbisyo?

Oo—ug dili. “Miserbisyo kami asa ug kanus-a gikinahanglan sa Ginoo ang magtiayon nga dunay piho nga mga kahanas ug mga kasinatian sa kinabuhi,” miingon ang mga Hammond. “Apan kana tinuod alang sa tanang mga senior missionary. Ang matag magtiayon nga dunay abilidad sa pagserbisyo og misyon giandam sa pagserbisyo sa mga paagi nga espesyal ngadto kanila. Magkinahanglan lang sila nga mopakita og igong pagtuo sa pag-adto diin sila gikinahanglan sa Ginoo, ug Siya mogamit nila sa paghimo og kalainan sa mga kinabuhi sa uban.”

“Ang mga magtiayon makahimo og kalainan,” miingon si Elder Robert D. Hales sa Korum sa Napulog Duha ka mga Aposotles. “Ang mga magtiayon makatuman sa talagsaong mga butang nga walay laing nga makahimo. …

“… Ang mga paagi nga ang mga magtiayon makaserbisyo sa tinuod lang walay limit. Sa suporta sa mission office ug leadership training sa family history, buhat sa templo ug humanitarian service—dunay oportunidad sa paggamit hapit ang bisan unsa nga kahanas o talento nga gipanalangin sa Ginoo kaninyo. …

“… Daghan kamo og nadawat sa inyong kinabuhi, lakaw ug serbisyo sa atong Ginoo ug Manluluwas. Pagbaton og pagtuo; ang Ginoo nakahibalo asa kamo kinahanglanon. Dako kaayo ang panginahanglan, mga kaigsoonan, ug ang mga mamumuo gamay ra kaayo.”²