Ang Milagro sa Medium nga Kainit
Gusto ba kamo niini karon dayon—o gusto ba kamo niini nga sakto?
Hunahunaa ang usa ka batan-ong lalaki nga nag-inusara sa balay ug gigutom (morag dili kuno, oo, pero sulayi lang ang paghunahuna niini). Karon hunahunaa nga kining batan-ong lalaki nakahukom nga magluto og gi-grill nga cheese sandwich nga siya ra sa unang higayon.1 Hunahunaa nga ang mga ginikanan niini nga batan-ong lalaki wala gayud motudlo niya unsaon sa pagluto og gi-grill nga cheese ug nga siya wala gayud makaobserbar kanila kon magluto sila.
Bisan, ingnon ta lang, nga kining batan-ong lalaki duna sa tanang mga sagol: pan, cheese, gamay nga butter nga naa sa pan (ug gamay nga mayonnaise sa sulod tungod kay siya bright). Sunod, mikuha siya og kaha ug gibutang kini sa stove. (Hunahunaon usab nato nga siya walay espesyal nga griddle o ubang kagamitan sa pagluto niini.)
Karon hunahunaa nga dunay misulod sa iyang hunahuna—usa ka hunahuna nga kadaghanan sa mga tawo ignorante (o temporaryong walay kabuot) sa paghunahuna: “Kon pakusgan ko ang kalayo, mas madali kini.”
Hunahunaa unsay sunod nahitabo. (O tingali dili ka na kinahanglang maghunahuna pa.)
Mahimong kagumkom kaayo ang pan o pilit-pilit, nga nalanay ang cheese—apan dili ang duha. Kasagaran, ang pan kon tan-awon ug bation (ug tingali dunay lami) sama sa bato nga lava ug katunga sa cheese nalamay, nga dili kaayo nindot tan-awon.
Ang iyang problema, nga inyong makita, mao ang kombinasyon sa pagkaignorante (nga mapasaylo) ug pagkawalay pailub, (nga bisan masabtan ra, dili kaayo mapasaylo). Kon usbon pa niya kini nga sayop sa sunod higayon, dili na mapasaylo, tungod kay dili na ikapasangil sa pagkaignorante apan maoy resulta sa kinatibuk-an tungod sa pagkawalay pasensya.
Aron mahimo kining sakto, kinahanglang madiskobrehan niya ang milagro sa medium nga kainit.
Ang Medium Dili Makalaay
Ang medium setting sa usa ka stove usa ka perpekto alang sa gi-grill nga cheese ug daghan pang uban nga mga pagkaon tungod kay makapaluto kini sa pagkaon nga dili masobrahan ang ibabaw niini. Ang bugtong problema mao nga nagkinahanglan kini og dugang nga panahon ug atensyon pailub.
Ang Ginoo miingon, “Padayon diha sa pagpailub hangtud kamo mahingpit.” (D&P 67:13). Naghisgot Siya dinhi mahitungod sa matang sa kahingpitan nga labaw pa sa paghimo og gi-grill nga mga cheese sandwich; Gusto Siya nga kita mahimong mas sama Kaniya. Si Jesukristo mao ang unang ehemplo sa pagpailub. Ug kabahin sa pagsunod sa Iyang ehemplo nagpasabut nga pagpalapad sa atong panglantaw, motan-aw lapas sa mga butang sa pagkakaron, ug pagkakita sa mas dakong ganti nga moabut tungod sa pagdisiplina sa kaugalingon, pagtuo, pagkamasulundon, sa sigurado ug makanunayon nga paningkamot, taas nga pag-antus, ug gugma—sa laing pagkasulti, magbaton og pailub.
Sa depinisyon, ang pailub nagpasabut sa paghulat, nga mora og puol, apan sa gitudlo ni Presidente Dieter Uchtdorf, Ikaduhang Magtatambag sa Unang Kapangulohan, mas labaw pa kini kay sa paghulat: “Ang pailub nagkahulugan nga aktibong maghulat ug maglahutay. Nagkahulugan kini nga magpabilin uban sa usa ka butang ug pagbuhat sa tanan kutob sa atong mahimo—motrabaho, molaum, ug mogamit sa hugot; paglahutay sa kalisud uban sa determinasyon, bisan kon ang mga tinguha sa atong mga kasingkasing nalangan. Ang pailub dili lamang ang paglahutay; kondili paglahutay og maayo!”2
Dili basta lang ibutang ang gi-grill nga cheese sandwich sa kaha ug kalimtan kini; kon dili pagabantayan kini ug pagabalihon kini sa saktong panahon.
Dili basta lang moadto sa eskwelahan o seminary o sa simbahan; kon dili ang aktibong pagkat-on o pagsimba.
Dili basta lang maghulat sa pagpamatuod sa Basahon ni Mormon nga ihatag nganha kanimo tungod kay gipangayo nimo kini; kon dili ang pagpadayon sa pagbasa, pagtuon, pagpamalandong, pag-ampo, ug pagsunod sumala sa mga lagda niana nga basahon.
Dili basta lang maglingkod samtang ang mga higala nagbiay-biay sa inyong relihiyon, kon dili ang pag-ampo lang nila ug gusto nga sila dunay kausaban sa kasingkasing ug pagbuhat unsay inyong mahimo aron mahitabo kini.
Dili basta lang gustong maghulat hangtud sa edad nga 16 aron maka-date; kon dili ang pagkat-on sa pagmahal sa pagkamasulundon ug pagpaningkamot sa pagsabut kon sa unsa nga paagi ang tambag sa propeta makapanalangin kaninyo.
Pahinayi ang Kainit
Ang pailub ug pagkamapugnganon, o pagkontrol sa kaugalingon, kabahin sa “bunga sa Espiritu” (tan-awa sa Mga Taga-Galatia 5:22–23). Bisan og dunay dinalian nga mga butang nga nagkinahanglan og dinalian nga aksyon o andam nga tubag (sama nga dunay mga pagkaon nga nagkinahanglan og kusog nga kainit), kinahanglang makita ninyo ang inyong kaugalingon padulong sa mas mapailubon ug pagkontrol sa kaugalingon. Kon inyong mamatikdan nga kini nanghitabo, timailhan kini nga ang Espiritu naglihok sa inyong kinabuhi.
Ang milagro sa medium nga kainit mahimong makahatag ninyo og lamian nga gi-grill nga cheese sandwich, hamburger patties nga dili morag hockey pucks nga dunay pink sa tunga, hash browns imbis sa hash blacks, ug humay nga humok ug hunol-hunol imbis gahi ug hunit. Apan ang pailub anaa niini ang “hingpit nga pagbuhat” (Santiago 1:4) sa inyong kinabuhi, pagtabang kaninyo nga mopadayon sa unahan nga mahimong mas sama ni Jesukristo, magdala sa impluwensya sa Espiritu Santo, ug sa katapusan magtabang sa paggiya kaninyo ngadto sa kinabuhing dayon.
Kon mamatikdan ninyo ang mga butang nga maoy makaingon nga mahimong walay pailub, hunahunaa ang gi-grill nga cheese sandwich (o bisan unsa nga pagkaon nga dunay may kalabutan niini) ug unsay inyong isakripisyo sa pagtugot sa pagkawalay pailub nga mogiya sa inyong mga aksyon. Kon kamo sad-an sa pagkawalay pailub pirme, apil sa grupo. Makahinulsol mo ug makasulay pag-usab sa pagsunod sa ehemplo ug mga pagtulun-an ni Jesukristo. Aduna pay daghang gi-grill nga cheese sandwich nga himoon, ug dili pa ulahi sa pagkat-on mahitungod sa kahingpitan nga posible pinaagi sa pailub.