Mga Tingog sa mga Santos sa Ulahing mga Adlaw
Si Captain Moroni Mitabang Nako sa Pagtudlo sa Middle School
Paghulagway pinaagi ni Allen Garns
Diha ko sa tunga-tunga sa lisud nga tuig sa pagtudlo sa mga 13 ug 14 anyos. Gikan pa ko sa usa ka makapasagmuyo nga miting uban sa assistant principal nga naghisgot sa bag-ohay lang nga evaluation. Tungod kay bag-o pa nga magtutudlo ug kinahanglan nga maoy mohimo sa kasagaran sa akong mga leksyon, nabantayan nako ang akong kaugalingon nga nanlimbasug sa pagpabilin sa mga estudyante nga mohimo sa mga buluhaton ug magpabiling interesado. Kasagaran ang panag-istoryahanay moadto na sa panginahanglan nga pugson nako ang akong mga estudyante nga mopili—mohimo sa mga buluhaton o magkaproblema—ug buhaton kon unsay akong mga gipasidaan.
Mibiya ko sa komperensya nga naguol ug nabug-atan. Gisiguro nako nga himoon kini nga miting nga mao ang pangutana sa adlaw samtang nagtuon ko sa akong mga kasulatan pagkasunod adlaw. Sa talagsaong paagi, miabut ang mga tubag ngari nako samtang nagbasa ko sa Basahon ni Mormon.
Nag-ampo ko nga makakat-on gikan sa mga kasulatan nianang buntaga kon sa unsang paagi nga mahimo kong mas maayo nga magtutudlo. Gitudloan ko sa Espiritu Santo samtang nagbasa ko bahin ni Captain Moroni diha sa Alma 44. Niining puntoha diha sa istorya, gilibutan ni Captain Moroni ug sa mga Nephite ang mga Lamanite sa suba sa Sidon ug gihadlok sila ngadto na sa punto nga gibuhian sa mga Lamanite ang ilang mga hinagiban. Mipadayon ako sa pagbasa, nga naghunahuna kon sa unsang paagi ko gusto nga mahisama ni Captain Moroni diha sa classroom: dunay command, masaligon, ug malampuson.
Gibasa nako ang panag-istoryahanay ug nakabantay nga gisultihan ni Moroni si Zerahemnah ug ang mga Lamanite nga napugos sila pagpili: “Motugyan sa inyong mga hinagiban sa gubat ngari kanamo, ug … kami moluwas sa inyong mga kinabuhi, kon kamo molakaw sa inyong dalan ug dili na mobalik pag-usab aron sa pakiggubat batok kanamo” o kondili “kon kamo dili mobuhat niini, … ako mosugo sa akong mga tawo nga sila mosulong diha kaninyo” (Alma 44:6, 7). Naamguhan nako nga nagbuhat siya sa unsay gisulti sa akong administrator nga akong buhaton! “Hatagi sila og duha ka kapilian, ug buhata,” miingon siya. Uban niana diha sa hunahuna, gigamit nako ang motto ni Moroni, “Tan-awa, kita motapos sa panagbangi” (Alma 44:10).
Andam nga mogamit sa mga baruganan nga akong nakat-unan diha sa istorya sa kasulatan bahin sa usa sa akong mga bayani, mibalik ko sa klase nga masaligon sa akong plano kon unsay buhaton. Duna koy figurine nga Captain Moroni, ug naa kini sulod sa bulsa sa akong sinina sa tibuok tuig sa tingklase isip usa ka pahinumdom kon giunsa pagtudlo ni Captain Moroni kanako sa pagdumala og usa ka classroom sa middle school. Samtang gihatagan nako ang akong mga estudyante og duha ka kapilian, milambo ang ilang kinaiya, gibuhat nila ang ilang buluhaton, ug mas nagkasinabut ra mi. Nahuman ang tuig, ug lisud lang gihapon kadto, apan uban sa natubag nga pag-ampo ug sa gahum sa mga kasulatan, nakahimo ko sa “pagtapos sa panagbangi.”