Mga Pangutana ugmga Tubag
“Pipila ka mga tawo nagsulti kanako nga nagkinahanglan ko nga adunay mga higala kinsa dili sama sa akong mga sumbanan aron sa paglig-on sa akong sumbanan. Tinuod ba kini?”
Sa katapusan, ang paglig-on sa imong mga sumbanan naggikan sa pagkat-on ug pagsunod sa ebanghelyo ni Jesukristo, ug ang mga higala makatabang o makababag nimo sa paghimo niana. Ang mga higala adunay dakong impluwensya diha nimo—sa paagi nga ikaw maghunahuna, mamulong, ug paglihok ug gani makatabang sa pagtino sa pagkatawo nga ikaw mahimo. Alang sa Kalig-on sa mga Kabatan-onan girekomendar nga “Pilia ang mga higala kinsa adunay sama sa inyong mga hiyas aron kamo makalig-on ug makaawhag sa usag usa sa pagpuyo sa taas nga mga sumbanan” ([2011], 16). Kini nga matang sa mga higala motabang nimo sa pagsunod sa ebanghelyo ni Jesukristo, mosunod sa imong mga sumbanan, ug mahimong mas maayo nga tawo.
Hinoon, dili tanang tawo nga imong ikauban adunay susama nga mga sumbanan sama sa imoha o mga miyembro sa Simbahan. Importante ang pagka mahigalaon ngadto sa matag usa ug sa pagtagad kanila sa paagi nga ang Manluluwas motagad kanila—inubanan sa gugma ug pagkamabination. “Ayaw itugot nga adunay magatamay kanimo tungod sa imong kabatan-on; hinonoa alang sa mga magtotoo, pagkinabuhi ingon nga panig-ingnan sa sinultihan ug sa paggawi, sa gugma, sa pagtoo, sa kaputli.” (1 Timoteo 4:12). Pinaagi sa imong ehemplo, ilang makita kon sa unsang paagi ikaw napanalanginan pinaagi sa pagsunod og taas nga sumbanan, ug ikaw makaawhag kanila sa pagbuhat sa ingon.
Tinguhaa ang giya sa Espiritu Santo—ug pagbaton og kaisug sa pagbuhat sa Iyang mga pag-aghat—sa inyong pagpili og mga higala ug maningkamot sa paglig-on sa inyong mga sumbanan.
Tinuod nga mga Higala
Sa akong unang tuig sa high school gikulbaan ko nga dili makakita og mga higala kinsa morespitar sa akong mga sumbanan. Human sa mubong panahon ako nahimong maayong higala sa usa ka klasmeyt, ug giingnan nako siya nga ako Mormon. Nangutana siya nako mahitungod niini, mao nga ako mihatag kaniya sa Alang sa Kalig-on sa mga Kabatan-onan nga pamphlet. Sukad niadtong adlawa, mihunong siya sa pagpamalikas diha sa akong atubangan. Kon ang imong mga higala tinuod nga mga higala, morespeto sila sa imong mga desisyon ug makatabang kanimo sa pagpanalipod sa imong mga sumbanan.
Candela M., edad 13, Buenos Aires, Argentina
Sunda ang Tambag sa Propeta
Usahay lisud ang pagpakigbatok sa tintasyon kon makigkuyog kita sa mga higala kinsa mohimo og sayop nga pagpili o maningkamot nga makahimo kita og dili maayo nga pagpili. Ang mga propeta nagsulti kanato diha sa Alang sa Kalig-on sa mga Kabatan-onan nga pamphlet nga ang mga higala “moimpluwensya og dako kaayo sa inyong panghunahuna ug panglihok, ug gani makatabang sa pagtino sa pagkatawo nga kamo mahimo.” ([2011], 16). Siguro kinahanglan aduna kitay mga higala kinsa andam sa pagrespeto sa atong mga sumbanan ug gani mopakita og interes ngari kanato sa pagtuman sa atong mga sumbanan.
Calvin W., edad 16, Arizona, USA
Hinumdumi ang Inyong mga Sumbanan
Ang mga higala kinsa dili sama sa inyong mga sumbanan sa pagkatinuod makapahuyang ug mopukan sa inyong sumbanan. Sa una nakong pagbalhin sa akong bag-o nga eskwelahan, naningkamot ko nga mahiangay pinaagi sa pagsulti sa ubang butang nga gigamit sa mga tawo nga naa sa akong palibut. Hapit ko makalimot sa akong mga sumbanan samtang naningkamot nga mahisama sa tanan. Karon nasayud na ko nga aron malig-on ang imong mga sumbanan, magkinahanglan ka og mga higala kinsa mosuporta ug moambit sa imong mga sumbanan. Sa katapusan mapasalamaton ko nga nakakita og mga higala sama niana tungod kay sila nagpahinumdom nako sa akong mga sumbanan.
Logan J., edad 15, Utah, USA
Gunit sa Gunitanan nga Puthaw
Ang pagbaton og mga higala nga maayo ang mga sumbanan mao gayud ang unsay inyong gusto. Gusto ninyong mapalibutan sa mga higala kinsa motabang ninyo sa paghupot sa mga sugo ug makadasig ninyo sa pagpuyo nga matarung. Ang pagpadayon sa paggunit og hugot sa puthaw nga gunitanan, nga naggiya ngadto sa kahoy sa kinabuhi, dili ngadto sa dako ug lapad nga gambalay. Ang pagpalibut sa inyong kaugalingon sa dili matarung mosangpot ngadto sa mga tintasyon. Pagbaton og maayong mga higala kinsa moimpluwensya kanimo sa pagsunod sa ebanghelyo.
Annie P., edad 13, Utah, USA
Ipabiling Taas ang Inyong mga Sumbanan
Ang mga higala nga managlahi og mga sumbanan dili gyud makapalig-on sa inyong sumbanan, apan pinaagi sa ilang pagkahigala, kamo makahatag kanila og maayong ehemplo nga sundon. Kon kamo adunay mga higala kinsa nakigbahin sa inyong mga gituohan, kini mahimong mag-awhag kaninyo sa pagtuman sa inyong mga sumbanan nga halangdon ug motabang kaninyo nga mobarug sa unsay husto.
Warren S., edad 14, Oregon, USA
Ang Maayong mga Higala usa ka Panalangin
Kon ang inyong mga higala wala mopakigbahin sa inyong mga sumbanan, mahimong mas lisud ang paglig-on sa inyong kaugalingong sumbanan. Ang pagbasa sa Alang sa Kalig-on sa Kabatan-onan nakatabang kanako sa pagpili og maayong mga higala kinsa nagtahud kanako. Karon ako nangandam sa pagserbisyo og misyon, ug nasayud ko nga ang maanaa sa palibut sa mga tawo nga sama nako og mga sumbanan nakatabang nako nga magpabiling matinud-anon sa ebanghelyo.
Nair M., edad 19, Buenos Aires, Argentina
Pag-ampo aron makakaplag og mga Higala
Human ang akong pamilya ug ako mibalhin ngadto sa bag-ong estado, kanunay kong nag-ampo nga makakita og mga higala kinsa akong makaistorya mahitungod sa ebanghelyo. Samtang ako nag-ampo, gibati ko ang kahupay, ug pipila ka bulan ang milabay nakahigala ko og talagsaong mga higala. Makasalig ko sa ilang suporta, ug nakatabang sila nako sa pagpalambo og mas dakong gugma sa ebanghelyo. Nasayud ko nga importante ang mga higala ug sila makapasayon alang nato sa pagsunod sa ebanghelyo.
Sara P., edad 16, Rio de Janeiro, Brazil