Propetikanhong mga Pulong sa Wala Damha nga Dapit
Ang tagsulat nagpuyo sa Argentina samtang ang iyang bana nagserbisyo isip presidente sa misyon.
Usa ka magasin nga gibiyaan nakapausab sa kinabuhi ni Oscar Castro sa hangtud.
Si Oscar Castro gibunyagan ug gikumpirmahan human makakaplag og kinatibuk-ang komperensya nga isyu sa Liahona diha sa panimalay nga iyang gibalhinan.
Paghulagway pinaagi ni Dan Burr; litrato gihatag sa tagsulat
Ang adlaw nga ang asawa ni Oscar mibiya kaniya ug sa iyang duha ka gagmayng anak maoy usa sa labing lisud sa iyang kinabuhi. Daghan kaayo nga mga desisyon ang kinahanglang buhaton. Nagpangita siya og trabaho, ug karon nagkinahanglan siya og bag-ong lugar nga kapuy-an. Alang kaniya mora og nagun-ob ang iyang kinabuhi. Nakahunahuna siya nga moundang na lang, ug mao gyud unta ang iyang buhaton kon dili pa tungod sa iyang duha ka matahum nga mga anak.
Sa San Juan, Argentina, pipila ra ka mga balay ang maabangan sa presyo nga kaya ni Oscar. Apan usa ka gamay nga panimalay sa usa ka luwas nga kasilinganan bag-o lang gibiyaan sa usa ka grupo sa batan-ong mga lalaki, mao nga giabangan kini ni Oscar ug nangandam nga magsugod og bag-ong kinabuhi uban sa iyang mga anak.
Sa ilang bag-ong panimalay, pipila ka mga magasin ug mga basahon ang gibiyaan diha sa salog, ug human sa tibuok adlaw nga pagpanglimpyo ug pagpanghipos, milingkod si Oscar ug mitan-aw sa usa sa mga magasin. Naintriga siya sa hapin niini. Ubos sa ulohan, nga Liahona, adunay usa ka hulagway sa usa ka tigulang nga lalaki nga nagbarug sa usa ka tore nga namulong ngadto sa mga katawhan. Ang tawo mipahinumdom kaniya sa mga hulagway sa mga propeta sa biblia.
Giablihan ni Oscar ang magasin ug misugod sa pagbasa, “Matag usa kanato nasayud nang daan nga kinahanglan kitang mosulti sa atong mga minahal nga sila atong gihigugma. Apan unsay atong mga nahibaloan dili sa kanunay makita diha sa atong gibuhat.”1 Gihunahuna ni Oscar ang hait nga mga pulong nga napamulong tali niya ug sa iyang asawa sa makadaghang higayon. Gusto niyang tudloan ang iyang mga anak nga mahimong mas maayo kay sa niana. Mipadayon si Oscar sa pagbasa sa magasin, ug misugod siya pagbati og paglaum diha sa iyang kahiladman. Sa wala pa mahuman ang semana, nabasa na niya ang matag artikulo ug gusto pang masayud og dugang.
Paglabay sa usa ka bulan duha ka mga misyonaryo nanglakaw sa lugar nilang Oscar. Miduol si Oscar kanila ug nangutana kon sila mga misyonaryo ba sa mga Santos sa Ulahing mga Adlaw ug pilay magasto aron makakuha og dugang niadto nga mga magasin sa Simbahan. Ang mga elder misulti kaniya nga mogasto lamang siya og mga 20 minutos sa iyang oras.
Pagkasunod adlaw ang duha ka mga misyonaryo mibisita kang Oscar sa iyang panimalay. Gisultihan sila ni Oscar sa iyang pagbalhin ug pagkakita sa karaang mga basahon, magasin, ug mga pamphlet nga nagpahibalo kaniya kabahin sa Simbahan. Mipasabut siya nga ang unang artikulo nga iyang gibasa direktang may kalabutan sa iyang kinabuhi nianang panahona. Nasayud na siyang daan sa kaimportante sa pamilya ug gustong mas masayud pa kabahin sa family home evening ug pag-ampo sa pamilya. Iyang gisultihan ang mga elder sa uban pa nga iyang nakat-unan kabahin sa Simbahan, lakip kang Joseph Smith ug sa Pagpahiuli sa ebanghelyo.
Direkta siya nga mitan-aw sa mga mata sa mga elder ug misulti sa mga pulong nga gipangandoy nga madungog sa tanang mga misyonaryo: “Nagtuo ako nga si Joseph Smith usa ka propeta sa Dios.” Ang mga elder midapit kaniya nga magpabunyag, ug uban sa mga luha sa iyang mga mata, si Oscar midawat. Paglabay sa pipila ka semana, si Oscar Castro gibunyagan ug gikumpirmahan isip miyembro sa Simbahan.
Ang Ginoo miandam ni Oscar, ug ang iyang espiritu mahinulsulon ug andam nga makat-on ug molambo. Nianang halandumon, makatandog nga adlaw, ang diwa sa mga mensahe sa kinatibuk-ang komperensya nga isyu sa Liahona mitandog sa kasingkasing ni Oscar. Ang kanhi mga tag-iya sa panimalay wala masayud sa epekto sa pagbilin og pipila ka mga magasin sa Simbahan, apan ang mga mensahe sa ebanghelyo niadto nga mga magasin nahimong usa ka importante nga himan sa misyonaryo. Sa paggiya kaniya ngadto sa mga kamatuoran nga iyang gipangita, kini miusab sa kinabuhi ni Oscar sa hangtud.