Mensahe sa Unang Kapangulohan
Mga Panalangin sa Pagkamasulundon
Ni Presidente Thomas S. Monson
Paghulagway pinaagi ni Jim Madsen
“Ang labing mahinungdanon nga pagtulun-an nga atong makat-unan dinhi sa pagkamortal” si Presidente Thomas S. Monson mitudlo, “mao nga kon ang Dios mamulong ug kita mosunod, dili gayud kita masayop kanunay.”1
Mapanalanginan usab kita. Sumala sa gisulti ni Presidente Monson atol sa bag-ohay lang nga kinatibuk-ang komperensya: “Kon atong sundon ang mga kasugoan, ang atong kinabuhi mas malipayon, mas makatagbaw, ug dili kaayo komplikado.” Ang atong mga hagit ug mga problema mas sayon pas-anon, ug atong madawat ang gisaad nga mga panalangin sa [Dios].”2
Sa mosunod nga mga kinutlo gikan sa mga pagtulun-an ni Presidente Monson isip Presidente sa Simbahan, siya nagpahinumdom kanato nga ang mga sugo mao ang labing siguro nga giya ngadto sa kalipay ug kalinaw.
Mga Giya alang sa Panaw
“Ang kasugoan sa Dios wala gihatag aron sa pagpugong kanato o aron mahimong mga babag sa atong kalipay. Ang sukwahi mao ang tinuod. Siya kinsa naglalang kanato ug nahigugma kanato hingpit nga nasayud kon sa unsang paagi kita magpakabuhi aron maangkon ang labing dakong kalipay kutob sa mahimo. Siya mihatag kanato og mga sumbanan diin, kon mosunod kita niini, luwas nga mogiya kanato niining makuyaw nga mortal nga panaw. Atong mahinumduman ang mga pulong sa pamilyar nga himno: ‘Sundon ang Kasugoan! Niini anaa ang kasiguroan; niini anaa ang kalinaw’ [tan-awa sa “Sundon ang Kasugoan,” Hymns, nu. 303].”3
Kalig-on ug Kahibalo
“Ang pagkamasulundon mao ang timailhan sa mga propeta; makahatag kini og kusog ug kahibalo kanila sa tanang panahon. Importante nga kita makahibalo nga kita usab, adunay katungod niining tinubdan sa kusog ug kahibalo. Giandam na kini alang sa matag usa kanato karon kon mosunod kita sa mga sugo sa Dios. …
“Ang kahibalo nga atong gitinguha, ang mga tubag nga atong gihandom, ug ang kalig-on nga atong gitinguha karon sa pag-atubang sa mga hagit sa komplikado ug nagkausab nga kalibutan atong madawat kon kita andam nga mosunod sa mga sugo sa Ginoo.”4
Mopili sa Pagsunod
“Ang atong panahon nagduso sa pagkamatugtanon. Ang mga magasin ug mga salida naghulagway sa mga artista sa tilon, ang mga bayani sa dulaanan—kana ang gihandom nga sundon sa mga batan-on—ang pagbaliwala sa mga balaod sa Dios ug dayag nga pagpakasala, ingon og walay dautang epekto. Ayaw gyud kini tuohi! Dunay panahon sa pagpanudya—gani sa paghukom. Ang tanan adunay sangputanan kon dili niining kinabuhia, unya sa sunod. Ang Paghukom moabut sa tanan. … Mohangyo ko nga inyong pilion ug sundon.”5
Hingpit nga Kalipay ug Kalinaw
“Makit-an kini ninyo sa mga panahon nga kadtong mga kalibutanon mas malipayon kay kaninyo. Ang pipila kaninyo mobati nga pinugngan tungod sa lagda sa pamatasan nga atong gisunod sa Simbahan. Akong mga kaigsoonan, ako mopahayag kaninyo, nga walay makahatag og mas labaw nga kalipay sa atong kinabuhi o labaw nga kalinaw sa atong kalag kay sa Espititu nga makaduol nato samtang kita magsunod sa Manluluwas ug magsunod sa mga sugo.”6
Maglakaw nga Matarung
“Ako mopamatuod kaninyo nga ang atong mga panalangin nga gisaad walay sukod. Bisan og ang unos nga mga panganud magpundok, bisan og ang ulan mobundak kanato, ang atong kahibalo sa ebanghelyo ug ang atong gugma sa atong Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw sa matarung ug mosunod sa mga sugo. Walay butang niining kalibutana nga makapildi kanato.”7
Sunda ang Manluluwas
“Kinsa kini nga Tawo sa kasub-anan, ug nakasinati og kagul-anan? Kinsa kining Hari sa himaya, kini nga Ginoo sa mga panon? Siya ang atong Agalon. Siya ang atong Manluluwas. Siya ang Anak sa Dios. Siya ang Tigpasiugda sa atong Kaluwasan. Siya nagtawag, ‘Sunod kanako.’ Siya mitudlo, ‘Lakaw, ug buhata ang ingon.’ Siya mihangyo, ‘Sunda ang akong mga kasugoan.’
“Sundon nato Siya. Sundon nato ang Iyang ehemplo. Tumanon nato ang Iyang mga pulong. Sa paghimo sa ingon, gihatag nato Kaniya ang balaang gasa sa pagpasalamat.”8