Mga Tingog sa mga Santos sa Ulahing mga Adlaw
Mga Anghel nga Ginganlan og Mr. ug Mrs. Dunn
Paghulagway pinaagi ni Wilson Ong
Nagtan-aw ko sa TV sa dihang mitawag ang akong inahan aron sultihan ko nga ang iyang igsoong lalaki, akong Tiyo nga 92 anyos nga si Floyd, ug ang iyang asawa, si Tiya Millie, nasakit og flu ug walay makaon sa ilang balay. Walay usa nila nga maayo ang panlawas aron makaadto sa tindahan sa pagpalit og bisan unsa. Si Tiyo Floyd ug Tiya Millie walay laing pamilya sa duol, mao nga walay usa nga makatabang kanila.
Naghunahuna ang akong inahan kon makatabang ba ko. Ako lamang ang miyembro sa Simbahan niana nga bahin sa akong pamilya, ug gihangyo nako sa ingon ana nga sitwasyon sa una. Ang problema mao nga nagpuyo ko sa Utah, USA, ug akong iyaan ug uyoan anaa sa Hemet, California, USA.
Giingnan nako ang akong mama nga hatagan ko og pipila ka minuto sa paghunahuna mahitungod sa unsay buhaton. Aduna koy higala kinsa nagpuyo duol sa Hemet, mao nga mitawag ko ug nangutana kon naa ba siyay nailhan sa Hemet. Misulti siya nako bahin sa usa ka babaye nga kadungan niya og serbisyo sa Redlands California Temple nga ginganlan og Sister Dunn kinsa presidente sa Relief Society didto.
Sa dihang si Sister Dunn mitubag sa telepono, miingon dayon ko og, “Hi, Sister Dunn. Wala ka makaila kanako, apan ang akong ngalan mao si Nancy Little, ug nagpuyo ko sa Utah. Miyembro ko sa Simbahan, apan ang akong tiya ug tiyo kinsa nagpuyo Hemet dili. Nasakit sila ug walay makaon diha sa ilang balay.” Gisultihan nako siya asa sila nagpuyo, diin layo ra kon asa siya dapit, ug mipasabut nga gusto lang ko nga makakuha og impormasyon bahin sa usa ka restawran duol nila nga mahimong makahatud nila og pagkaon.
Hinoon, si Sister Dunn miinsister nga siya ug iyang bana mohatud sa pagkaon ngadto sa akong tiya ug tiyo. Naatol nga duna silay hinimo nga sinabaw ug pan, ug ang iyang inahan bag-o lang nagluto og mga cookie. Mibalibad ko apan gusto gyud niya.
Pipila ka oras ang milabay, si Sister Dunn nanawag ug misiguro nako nga ang tanan maayo ra. Ang akong inahan mitawag aron sultihan ko kon unsay giingon ni Tiyo Floyd bahin sa ilang pagbisita. Miingon siya, “mga Anghel miabut sa among balay nga ginganlan og Mr. ug Mrs. Dunn. Miabut sila nga nagsapnay sa pagkaon, mga prutas, utanon, hinimo nga sinabaw, pan ug mga cookie. Mao kini ang kinalamian nga cookie nga akong nakaon sukad.” Ang mga Dunn mibisita sa akong tiyo, mitabang nila sa ilang mga panginahanglan, ug dayon si Brother Dunn mialsa sa akong nagluya nga si Tiya Millie, kinsa nag-antus sa alzheimer, gikan sa iyang higdaanan ngadto sa usa ka lingkuranan sa kusina aron si Sister Dunn makapakaon niya.
Sa dihang si Tiyo Floyd mitawag sa akong inahan aron sultihan siya mahitungod sa ilang pagbisita, mihilak siya. Miingon siya nga wala pa siya sukad makasugat ug ingon niana ka mabination ug ka maamumahon nga mga tawo. Iyang gisultihan ang akong mama nga swerte gyud ko nga nagpuyo sa Utah ug gilibutan “sa tanan niadtong mga Mormon.”
Upat ka adlaw human sa pagbisita, si Tiyo Floyd migawas paingon sa iyang mailbox nadakin-as ug nalamba. Nabunal ang iyang ulo ug namatay paglabay sa upat ka adlaw. Gawas sa usa ka homecare nurse, si Brother ug Sister Dunn ang katapusang tawo nga nakita sa akong tiyo sa wala pa siya mamatay.
Mapasalamaton ko sa Kristohanon nga mga ehemplo sa usa sa akong mga sister sa Relief Society kinsa nagpuyo og gatusan ka milya ang gilay-on, usa ka tawo nga wala nako mahimamat sukad, kinsa mitabang sa akong tiya ug tiyo.