Mensahe sa Visiting Teaching
Ang Pamilya Gi-orden sa Dios
Tun-i sa mainampuong paagi kining materyal ug pagtinguha sa inspirasyon aron masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa inyong hugot nga pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Litrato sa atubangan sa Buenos Aires Argentina Temple
“Sa mga pulong sa [kanta sa Primary], ‘Ang Pamilya Iya sa Dios,’ … napahinumduman kita sa lunsay nga doktrina,” miingon si Carole M. Stephens, Unang Magtatambag sa Kinatibuk-ang Kapangulohan sa Relief Society. “Atong nakat-unan nga dili lang kay ang pamilya iya sa Dios apan matag usa usab kanato sakop sa pamilya sa Dios. …
… Ang plano sa Amahan alang sa Iyang mga anak usa ka plano sa gugma. Usa kini ka plano sa paghiusa sa Iyang mga anak—sa Iyang pamilya—ngadto Kaniya.”1
Si Elder L.Tom Perry (1922–2015) sa Korum sa Napulog Duha ka mga Apostoles miingon: “Nagtuo usab kita nga ang lig-on ug tradisyunal nga mga pamilya dili lamang ang sukaranang mga yunit sa lig-ong katilingban, lig-ong ekonomiya, ug lig-ong kultura sa mga mithi—apan usab maoy sukaranang mga yunit sa kahangturan ug sa gingharian ug gobyerno sa Dios.
“Nagtuo kita nga ang organisasyon ug gobyerno sa langit tukuron diha sa mga pamilya ug gipalapdang mga pamilya.”2
“Ang tanan, walay pagsapayan sa ilang sitwasyon sa kaminyoon o gidaghanon sa mga anak, makapanalipod sa plano sa Ginoo nga gihulagway diha sa pamahayag bahin sa pamilya. Kon kini plano sa Ginoo, kinahanglan nga ato usab kini nga plano!”3
Dugang nga mga Kasulatan
Ang Doktrina sa Pamilya
Si Sister Julie B. Beck, kanhi Kinatibuk-ang Presidente sa Relief Society, mitudlo nga ang teyolohiya sa pamilya nga gibase sa Paglalang, sa Pagkapukan, ug sa Pag-ula ni Jesukristo:
“Ang Paglalang sa yuta naghatag og dapit diin ang mga pamilya makapuyo. Ang Dios milalang sa lalaki ug babaye kinsa mao ang duha ka importanting kaparis sa usa ka pamilya. Kini kabahin sa plano sa Langitnong Amahan nga sila si Adan ug Eva ma-sealed ug mahimong mahangturong pamilya.
“… Ang Pagkapukan nakapahimong posible alang kanila sa pagbaton og mga anak nga lalaki ug mga anak nga babaye.
“Ang Pag-ula ni [Kristo] nagtugot sa pamilya nga ma-sealed sa kahangturan. Kini nagtugot sa mga pamilya nga makabaton og mahangturong paglambo ug pagkahingpit. Ang plano sa kalipay, nga gitawag usab og plano sa kaluwasan, maoy usa ka plano nga gimugna alang sa mga pamilya. …
“… Kini mao ang doktrina ni Kristo. … Kon wala ang pamilya, walay plano; walay rason alang sa mortal nga kinabuhi.”4