Hangtud sa Sunod Natong Panagkita
Ang Balaang Tinubdan sa Kaalam sa Simbahan sa Ginoo
Gikan sa “He Slumbers Not, nor Sleeps,” Ensign, Mayo 1983, 5–8. Ang punctuation ug capitalization gi-standard.
Gipadayon sa Dios ang Iyang buhat sumala sa Iyang kaugalingong plano.
Gilitratohan ni Mary Ouzounian, sa maayong kabubut-on sa Church History Museum
Ang balaan nga tinubdan sa kaalam sa organisasyon niini nga buhat ug sa mga tawag sa pagpangulo klaro. Ang mga General Authority tanan mga indibidwal, nga ang matag usa dunay iyang kaugalingong personalidad. Ang matag usa migamit og nagkalin-laing matang sa kasinatian ug kaagi. Dunay butang nga angay hisgutan sa nag-unang mga konseho sa Simbahan, ang matag usa gawasnon sa pagpagawas sa iyang panglataw. Ingon sa maobserbahan sa usa ka tawo nga ang makapaikag nga proseso naglihok, maanindot nga masaksihan ang gahum sa Espiritu Santo nga nag-impluwensya niining mga tawhana. Managlahi ang ilang mga opinyon apan dili kini nila isulti sa dili maayong paagi ug magkahiusa ra sila sa katapusan. “Ang akong balay mao ang balay sa kahusay, miingon ang Ginoo (tan-awa sa D&P 132:8). Sa pagsaksi niini nga proseso nga naglihok, nakasinati ko kanunay nga pagkabag-o sa pagtuo. …
Ang uban mopahayag og kabalaka nga ang Presidente sa Simbahan ingon og kanunay lang tigulang na, diin ang akong tubag, “Pagkadakong panalangin!” Ang buhat niini nga dispensasyon unang napahimutang pinaagi sa pagka-instrumento ni Propeta Joseph Smith. Siya niadtong higayuna batan-on ug lagsik, kansang hunahuna wala magsunod sa mga tradisyon sa iyang panahon. Ang iyang batan-ong hunahuna nga mahulma sa Ginoo, sama sa bag-o, humok nga clay sa Iyang pagsugod sa Iyang buhat.
Ang misunod ni Joseph medyo batan-on gihapon sa dihang nag-atubang siya og lisud nga responsibilidad sa paggiya sa tanang katawhan tabok sa kamingawan ngadto sa bag-ong yuta.
Apan ang mga sukaranan sa atong doktrina napahimutang na karon, ug kita naestablisar na isip katawhan, hangtud ang Ginoo mosugo og laing pagbalhin. Wala kita magkinahanglan og bag-ong mga paagi. Nagkinahanglan kita og debosyon sa pagsunod sa balaang gipamulong nga mga baruganan. Nagkinahanglan kita og pagkamaunungon ngadto sa atong lider. Siya mao ang atong propeta, manalagna ug tigpadayag. Dili gayud mahitabo nga mawad-an kita og propeta kon magpakabuhi kitang takus sa usa ka propeta. Dili kinahanglan nga batan-on siya. Siya kanunay ug padayon nga dunay batan-ong mga tawo nga mobiyahe sa tibuok kalibutan sa buhat sa pagpangalagad. Siya ang presiding high priest, ang naghupot sa tanang yawe sa balaang priesthood, ug mao ang tingog sa pagpadayag gikan sa Dios ngadto sa iyang mga katawhan.
Dunay karaang proverbio nga nag-ingon, “Ang pagkabatan-on alang sa aksyon. Ang edad alang sa kaalam.”
Sa akong hunahuna dunay butang nga ikapaniguro gayud sa pagkahibalo nianang wala makita nga umaabut kita dunay Presidente nga nadisiplina ug natudloan, nasulayan, ug natestingan, kansang kamatinud-anon sa buhat ug integridad sa mao nga kawsa nalig-on pinaagi sa pagserbisyo, kansang pagtuo nahingkod, ug kansang pagkaduol sa Dios naugmad sulod sa mga panahon sa daghang katuigan. …
Dili kita angay nga mahadlok sa umaabut kon kita nagsunod sa gipadayag nga mga baruganan.