Family History: Kalinaw, Proteksyon, & mga Saad

Ni Elder Bradley D. Foster

Sa Seventy

Gikan sa usa ka pakigpulong, “Pagpundok, Pag-ayo, ug Pag-seal og mga Pamilya,” nga gihatag diha sa RootsTech Family History Conference sa Salt Lake City, Utah, USA, niadtong Pebrero 14, 2015.

Samtang ang inyong pamilya moapil sa pagpundok sa mga rekord, pag-ayo sa mga kasingkasing, ug sa pag-seal sa mga pamilya, kamo ug ang inyong mga kaliwat mapanalanginan hangtud sa kahangturan.

Ang istorya sa Simbahan ni Jesukristo sa mga Santos sa Ulahing mga Adlaw usa ka istorya kabahin sa mga pamilya. Sa akong pagsulti sa mga pamilya, wala ko magpasabut sa atong modernong konsepto sa Mama, Papa, ug mga anak.

Akong gigamit ang termino sa paagi nga gigamit kini sa Ginoo, isip susama og kahulugan sa kaliwatan o daghang henerasyon nga mga pamilya, tungod kay ang tanan adunay pamilya. Ang plano sa atong Langitnong Amahan alang sa Iyang mga anak nakasentro niini nga matang sa pamilya—uban sa mga anak nga nakakuha og kalig-on gikan sa mga katigulangan daghang mga henerasyon na ang milabay ug mga ginikanan nga nagtinguha sa pagpanalangin sa ilang kaliwatan sa umaabut nga mga henerasyon.

Niini nga pagkasabut ang Basahon ni Mormon nagsulti usab og mga istorya kabahin sa mga pamilya. Samtang magbasa kita niini nga mga istorya, atong masayran nga dili ingon niana kadako ang kausaban sa mga pamilya sa nangagi nga mga siglo. Bisan kadtong nabuhi sa laing panahon ug dapit susama ra kaayo kanato—ug ang tinguha sa Dios nga ang Iyang mga anak magpuyo sa malipayon, mahangturon nga mga pamilya wala mausab.

Nganong gipreserbar man sa Ginoo ang rekord niini nga mga istorya? Unsay gusto Niya nga atong makat-unan gikan niini? Naglakip ba kini og mga leksyon nga makatabang kanato sa atong mga paningkamot sa pagpundok, pag-ayo, ug pag-seal sa atong mga pamilya?

Usa ka Leksyon gikan ni Lehi

Ako nagtuo nga ang unang pamilya diha sa Basahon ni Mormon—ang pamilya ni Lehi—adunay gamhanan nga leksyon alang kanato nga tingali wala nato mamatikdi. Ang pamilya ni Lehi daghan og matudlo kanato kabahin sa mga rekord sa pamilya—nganong importante kini sa Ginoo ug nganong kinahanglan nga importante kini kanato.

Sa pagsugod sa istorya, si Lehi ug Sariah nagpadako sa ilang mga anak nga babaye ug upat ka mga anak nga lalaki sa Jerusalem, nagpuyo og medyo komportableng kinabuhi nianang dako nga siyudad. Ang ilang kinabuhi nausab hangtud sa dihang ang Ginoo misugo kang Lehi sa pagdala sa iyang pamilya ngadto sa kamingawan.

Mituman si Lehi, ug siya ug ang iyang pamilya mibiya sa ilang materyal nga kabtangan ug miadto sa kamingawan. Human sa taud-taod nga pagpanaw, si Lehi misulti ngadto sa iyang anak nga lalaki nga si Nephi:

“Tan-awa ako nakadamgo og usa ka damgo, diin ang Ginoo nagsugo kanako nga ikaw ug ang imong igsoon nga mga lalaki pabalikon sa Jerusalem.

“Kay tan-awa, anaa kang Laban ang talaan sa mga Judeo ug usab ang kasaysayan sa kagikanan, ug sila nakulit sa mga palid nga tumbaga” (1 Nephi 3:2–3; emphasis gidugang).

Tungod niini nga sugo, ang atong mga pamilya napanalanginan sa mosunod nga halangdong pamahayag sa hugot nga pagtuo ug pagkamasulundon gikan ni Nephi, “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).

Ang mga palid nga tumbaga usa ka rekord. Naglakip kini sa mga kasulatan, apan naglakip usab kini sa kasaysayan sa pamilya ni Lehi. Ang Ginoo nasayud unsa ka importante nga mapreserbar kana nga rekord alang sa daghang mga henerasyon nga moabut.

Naghunahuna ba kamo kon ngano nga ang Ginoo wala mosugo ni Lehi, kay sa iyang mga anak, nga mobalik alang sa rekord? Siya ang patriyarka sa pamilya. Ang Ginoo mihatag kaniya sa panan-awon. Dili ba si Lehi adunay mas dakong impluwensya ni Laban kay sa iyang mga anak?

Wala kita masayud kon ngano nga ang Ginoo misugo sa mga anak nga lalaki ni Lehi nga mobalik ngadto sa Jerusalem, apan nasayud kita nga naglisud sila sa pagtuman sa unsay gihangyo sa Ginoo nga ilang buhaton. Ang buluhaton lisud, ug gisulayan niini ang ilang hugot nga pagtuo. Nakakat-on sila og bililhong mga leksyon nga makatabang kanila sa tibuok nilang pagpanaw didto sa kamingawan. Tingali ang labing importante, sila nakakat-on nga kon ang Ginoo mosugo, Siya gayud mohatag og paagi.

Tingali makapangutana kita sa atong kaugalingon, unsay gusto sa Ginoo nga makat-unan sa atong mga anak samtang sila “mobalik” sa pagkuha sa atong mga rekord sa pamilya? Giunsa man Niya pag-andam og paagi alang kanila? Aduna bay mga kasinatian nga gusto Niya nga ilang maangkon? Nagdapit ba kita kanila nga makaangkon niini nga mga kasinatian? Unsa nga mga panalangin ang Iyang gitinguha nga ihatag ngadto sa iyang mga anak pinaagi sa templo ug pagserbisyo sa family history?

Sa dihang si Nephi ug iyang mga kaigsoonan mibalik ngadto sa tolda sa ilang amahan, si Lehi “mikuha sa mga talaan nga nahisulat sa mga palid nga tumbaga, ug siya misusi niini gikan sa sinugdanan.” Didto iyang nakita “ang lima ka mga basahon ni Moises,” “ang mga panagna sa balaan nga mga propeta,” ug “kasaysayan sa kagikanan sa iyang mga amahan; busa siya nahibalo nga siya usa ka kaliwat ni Jose … nga gibaligya ngadto sa Ehipto.” Ug sa dihang si Lehi “nakakita sa tanan niini nga mga butang, siya napuno sa Espiritu” (1 Nephi 5:10, 11, 13, 14, 17).

Si Lehi mitudlo dayon sa iyang pamilya kon unsay iyang nakat-unan gikan sa mga palid. Mahimo kang mosulti nga ang iyang tolda nahimong sentro sa family history ug pagkat-on—sama nga ang atong mga panimalay kinahanglan nga mamahimo.

Sayon rang masabtan nganong gusto sa Ginoo nga mabatonan sa pamilya ni Lehi kini nga mga rekord. Naghatag kini sa iyang kaliwatan og pagsabut sa ilang pagkatawo, nagdugtong kanila ngadto sa nangagi nga matinud-anong mga patriyarka ug nagtanom diha sa ilang mga kasingkasing “sa mga saad nga gihimo ngadto sa mga amahan” (D&P 2:2; Joseph Smith—Kasaysayan 1:39). Kini nga mga rekord importante kaayo ngadto sa hugot nga pagtuo sa wala pa matawo nga mga henerasyon nga ang Espiritu mipasidaan ni Nephi nga kon wala kini, ang tibuok “nasud … mokunhod ug mamatay tungod sa pagkawalay pagtuo” (1 Nephi 4:13).

Ang kasinatian sa lain nga katawhan diha sa Basahon ni Mormon nagpakita sa katinuod nga kon ang mga rekord mawala, ang kamatuoran mawala, ug ang mga resulta alang sa umaabut nga mga henerasyon mahimong grabe kaayo.

Ang mga Mulekite mibiya sa Jerusalem sa samang panahon sa pagbiya sa pamilya ni Lehi. Apan lahi kay sa pamilya ni Lehi, “sila wala makadala og mga talaan uban kanila.” Sa panahon nga nakaplagan sila ni Mosiah paglabay sa mga 400 ka tuig, “ang ilang pinulongan nahimo nga nausab; … ug sila milimud sa pagkatawo sa ilang Tiglalang” (Omni 1:17). Nawala kanila ang ilang pagkatawo isip katawhan sa pakigsaad.

Si Mosiah mitudlo sa mga Mulekite sa iyang pinulongan aron makakat-on sila gikan sa mga rekord nga iyang gipanag-iya. Isip resulta, ang mga Mulekite misinati og kausaban gikan sa samok, walay dios nga katilingban ngadto sa usa ka katilingban nga nakasabut sa plano sa Dios sa kalipay alang kanila—ug sa ilang mga pamilya.

Balik uban sa Imong Pamilya

Ang kahibalo kon si kinsa kita nga may kalabutan sa Dios ug sa usag usa mousab sa paagi sa atong paghunahuna, paglihok, ug pagtagad sa uban. Ang mga rekord usa ka importante nga piraso sa atong pagkatawo ug panglantaw. Ang paghinumdom nag-andam kanato sa pagpadayon.

Mga ginikanan, midapit ba kamo sa inyong pamilya sa “pagbalik”? Nahimulag ba ang inyong pamilya gikan sa ilang mga rekord—o gikan sa usag usa—sa usa o laing paagi? Ang koneksyon sa inyong pamilya tali sa karon ug sa nangagi naputol ba? Unsay nahitabo sa kasaysayan sa inyong pamilya nga maoy hinungdan niini nga pagkabulag? Ang paglalin ba, kagubot sa pamilya, pagkakabig ngadto sa ebanghelyo, o ang yanong paglabay sa panahon? Naningkamot ba kamo bag-ohay lang sa pagpangita sa inyong mga katigulangan sa FamilySearch.org?

Ang balay ni Israel nagkatibulaag, ug sa daghang paagi naglakip kana sa pagkatibulaag sa atong mga pamilya ug mga rekord. Ang atong responsibilidad mao ang pagpundok kanila ug, kon gikinahanglan, pag-ayo sa mga samad sa panagbulag. Samtang makugihon kitang naningkamot sa pagpabalik sa mga kasingkasing sa atong mga anak ngadto sa ilang mga amahan, ang atong mga kasingkasing mobalik usab ngadto sa atong mga anak¹ ug dungan natong makaplagan ang kalinaw ug pagkaayo nga moabut niini nga buhat (tan-awa sa D&P 98:16).

Sama nga si Lehi mipadala sa iyang mga anak balik ngadto sa Jerusalem alang sa sagrado nga mga rekord, atong ipadala og balik ang atong mga anak alang sa mga rekord sa atong pamilya. Sama nga ang Ginoo naghatag og paagi ni Nephi, Siya mihatag sa Internet ug ubang mga teknolohiya nga makapahimo sa atong mga anak sa pagpundok ug pag-ayo sa atong mga pamilya. Ug Siya mihatag og mga templo diin atong madala ang mga pangalan nga atong makit-an ug himoong permanente ang atong panagpundok pinaagi sa mga ordinansa sa pag-seal.

Kalipay sa Kamingawan

Sa dihang ang akong asawa, si Sharol, ug ako naminyo, midesisyon mi nga makaangkon og upat ka mga anak nga lalaki. Ang Ginoo adunay lahi nga plano. Mihatag Siya kanamo og upat ka mga anak nga babaye.

Mipanaw mi uban sa among mga anak nga babaye tadlas sa kamingawan. Karon mga minyo na sila nga adunay mga anak ug nagpanaw tadlas sa kaugalingon nilang kamingawan. Sayon ra ba ang tanan nga naagian? Dili. Nakasinati usab kami og mga pagbagulbol, ug dihay daghang mga panlimbasug.

Ang kamingawan sa kinabuhi mahimong lisud sa mga pamilya. Kon ang mga tawo mangutana, “Kumusta man ka ug ang imong pamilya?” Sagad kong moingon, “Naa mi sa krises ron. Salamat sa pagpangutana.”

Apan adunay nasinati usab nga mga higayon sa tinud-anay nga kalipay. Isip mga patriyarka ug mga matriyarka, naggahin kita og daghang panahon sa pagpalig-on sa atong mga anak alang sa kamingawan. Ang mga propeta sa atong panahon misaad nga ang buhat sa family history naghatag og “panalipod gikan sa impluwensya sa kaaway”² ug usa ka “lig-on ug malungtaron” nga pagkakabig ngadto sa Manluluwas.³ Pagkagamhanan nga paagi sa pagpundok, pag-ayo, ug pag-seal sa atong mga pamilya.

Isip patriyarka sa among pamilya, akong gihangyo ang akong mga anak nga babaye nga “mobalik” aron mangita sa mga rekord, modala sa mga ngalan ngadto sa templo, ug motudlo sa among mga apo. Naghangyo ako nila sa pag-ila-ila kon kinsa sila pinaagi sa pag-apil sa atong family history.

Usa ka Saad

Mosaad ko nga kon inyong dapiton ang inyong mga anak nga “mobalik” ug mangita sa mga rekord sa inyong pamilya, dungan kamo nga “[m]alipay sa hilabihan” sama ni Lehi ug Sariah ug mohatag og “mga pasalamat ngadto sa Dios sa Israel.” Samtang magsiksik kamo sa inyong mga rekord, kamo “[m]apuno sa Espiritu,” kay inyong mahibaloan “nga sila maayo; oo, gani labi nga bililhon.” Ug inyong masayran nga “kini mao ang kaalam sa Ginoo nga [kamo] modala kanila uban [kaninyo]” samtang mopanaw kamo sa “kamingawan paingon ngadto sa [inyong] yuta sa saad” (1 Nephi 5:9, 17, 21–22).

Ang Simbahan anaa sa pagsuporta ug paglig-on sa inyong pamilya niini nga panaw. Mosaad ko nga samtang ang inyong pamilya moapil diha sa pagpundok sa mga rekord, pag-ayo sa mga kasingkasing, ug sa pag-seal sa mga sakop sa pamilya, kamo ug ang inyong kaliwatan—inyong pamilya—mapanalanginan hangtud sa kahangturan.