Kabatan-onan

Mga Kalayo ug mga Leksyon sa Pagkamasulundon

Si Presidente Thomas S. Monson kausa misulti mahitungod sa usa ka higayon nga iyang nakat-unan ang kaimportante sa pagkamasulundon. Sa dihang otso anyos pa siya, ang iyang pamilya mibisita sa ilang payag sa bukid. Siya ug ang iyang higala gusto nga hawanan ang kasagbutan nga dapit alang sa usa ka campfire. Gisulayan nila pagpangibut ang sagbut, gibira ug gibunlot kutob sa ilang mahimo, apan ang nakuha nila gamay ra nga mga sagbut. Si Presidente Monson mipasabut, “Ug dayon misulod sa otso anyos nakong hunahuna ang hingpit nga sulbad. Akong giingnan si Danny, ‘Ang atong gikinahanglan mao ang pagsunog niining mga sagbut. Linginon lang nato sa pagsunog diha sa mga sagbut!’”

Bisan tuod nakahibalo siya nga gidid-an siya nga mogamit og posporo, mibalik siya sa payag aron magkuha og pipila, ug siya ug si Danny naghaling og gamayng kalayo diha sa sagbuton nga dapit. Naglaum sila nga mapalong ra kini, apan misilaub na hinoon ngadto sa dako ug makuyaw nga kalayo. Siya ug si Danny nanagan aron magpatabang, ug sa wala madugay ang mga hamtong midali sa pagpalong sa kalayo sa wala pa kini miabut sa mga kahoy.

Si Presidente Monson mipadayon, “Si Danny ug ako nakat-on og daghang lisud apan importante nga mga leksyon nianang adlawa—ang kaimportante sa pagkamasulundon. (Tan-awa sa “Ang Pagkamasulundon Makahatag og Panlangin,” Liahona, Mayo 2013, 89–90.)

Sama ni Presidente Monson, nakasinati na ba kamo sa pagkat-on og leksyon sa pagkamasulundon sa lisud nga paagi? Unsa nga mga tumong ang inyong mahimo aron mapabilin ang inyong kaugalingon nga luwas pinaagi sa pagkamasulundon?