Mga Tingog sa mga Santos sa Ulahing mga Adlaw
Nagpakilimos alang sa Kalooy
Paghulagway pinaagi ni Stan Fellows
Sa usa ka biyahe ngadto sa duol nga siyudad sa Estonia, nakakita ko og usa ka tawo nga nagpakilimos og kwarta. Talagsaon kaayo nga, nakamay-ong ko niya gikan pa sa una nga nagserbisyo ko isip usa ka misyonaryo niana nga siyudad 10 na ka tuig ang milabay. Nagdala siya og usa ka dakong bag sa mga plastik nga mga botilya, sama kaniadto, aron makakwarta. Nakahinumdom ko nga kanunay siyang mangayo og sobra nga sinsilyo, ug kon imong siyang hatagan mangayo pa siya og dugang.
Nakurat ko nga nakakita niya. Human sa 10 ka tuig mao lang siya gihapon—mas ubanon nalang, apan ingon og nagpakabuhi siya sa samang panginabuhi nga magpakilimos og kwarta kada adlaw. Naghunahuna ko sa talagsaon nga 10 ka tuig nagpuyo ko sa kasamtangan, nga naglakip sa pagkaminyo sa templo, pag-angkon og edukasyon, pagkakita og maayong trabaho, ug pagtagamtam og maayong panglawas.
Akong gihunahuna nga basin mao ni ang katapusang higayon nga makita nako siya, ug mibati ko nga hatagan nako siya og usa ka butang. Ang problema lang tibuok ang akong kwarta og dako ra ang bili kay sa gusto nakong ihatag. Nagduha-duha ko sa akong kapilian—wala bay ihatag ngadto niya o hatagan siya og sobra kay sa akong gusto. Mihukom ko nga dili kini makahimo og dakong kalainan alang kanako ug ikalipay niya kining adlawa, mao nga akong gihatag niya ang kwarta.
Wala pay duha ka adlaw ang milabay nahimutang na usab ko sa susama nga sitwasyon, apan niining higayona ako na usab ang nagpakilimos alang sa kalooy. Nagkabali ang mga petsa alang sa importanteng scholarship application. Nagtuo ko nga ako na kining nasumiter sa miaging duha ka semana, apan gikulbaan ko og maayo sa dihang akong gisusi kaduha ang petsa ug nakita nga napadala na nako kini sa miaging adlaw.
Ang kantidad sa scholarship eksaktong 100 ka piloon sa kantidad nga akong nahatag ngadto sa makililimos, ug dili ko katuo sa kasulagma niini. Akong nakaplagan ang akong kaugalingon nga nagpakilimos alang sa kalooy, diha sa akong mga pag-ampo ngadto sa akong Langitnong Amahan ug pinaagi sa email ngadto sa mga opisyales sa unibersidad. Miingon sila nga giapil nila ang application apan gitatakan nga naulahi na.
Natubag ang akong pag-ampo ug ako napanalanginan sa pagdawat sa scholarship, nga sa pinansyal nga paagi nakatabang nako ug sa akong asawa og dako. Apan ang mas importante nga kining kasinatian nakatudlo kanako og bililhong leksyon: dili ba kitang tanan mga makililimos atubangan sa Dios? (tan-awa sa Mosiah 4:19).