Barug isip Tinuod nga mga Milenyal
Ni Presidente Russell M. Nelson
Presidente sa Korum sa Napulog Duha ka mga Apostoles
Gikan sa tibuok kalibutan nga debosyonal alang sa mga young adult, “Pagkahimo nga Tinuod nga mga Milenyal,” nga gihatag didto sa Brigham Young University–Hawaii niadtong Enero 10, 2016. Alang sa kompleto nga pakigpulong, adto sa broadcast.lds.org.
Kamo ”usa ka pinili nga henerasyon,“ gideterminar nang daan sa Dios sa pagbuhat og talagsaong buhat—sa pagtabang sa pag-andam sa mga katawhan niini nga kalibutan alang sa Ikaduhang Pag-anhi sa Ginoo.
Mga paghulagway pinaagi ni Scotty Reifsnyder
Daghang mga tawo ang motawag kaninyo isip milenyal. Akong angkunon nga kon ang mga researcher motawag ninyo niana nga pulong ug mohulagway kon unsa ang mapadayag sa ilang mga pagtuon kabahin ninyo—inyong ganahan ug dili ganahan, inyong mga pagbati ug mga hilig, inyong mga kalig-on ug kahuyang—dili ko komportable. Adunay usa ka butang kabahin sa paagi nga sila mogamit sa termino nga milenyal nga naghasol kanako. Ug sa walay lipud-lipod, dili kaayo ko interesado kon unsay ikasulti sa mga eksperto kabahin ninyo kay sa unsay gisulti sa Ginoo kanako kabahin ninyo.
Sa dihang nag-ampo ko kabahin ninyo ug nangutana sa Ginoo unsay Iyang pagbati mahitungod ninyo, lahi kaayo ang akong gibati gikan sa unsay gisulti sa mga researcher. Ang espirituhanong mga impresyon nga akong nadawat kabahin ninyo naghimo kanako nga motuo nga ang termino nga milenyal tinuoray nga haum alang kaninyo—apan tungod sa lahi kaayo nga rason kay sa nasabtan sukad sa mga eksperto.
Ang termino nga milenyal haum gayud kaninyo kon kana nga termino nagpahinumdom kaninyo kon si kinsa gayud kamo ug unsay katuyoan sa inyo gayud nga kinabuhi. Ang usa ka tinuod nga milenyal mao ang usa ka tawo kinsa natudloan ug nagtudlo sa ebanghelyo ni Jesukristo didto sa premortal nga kinabuhi, ug kinsa mihimo og mga pakigsaad didto uban sa atong Langitnong Amahan kalabut sa maisugong mga butang—bisan ang maisugong mga butang sa moral nga paagi—nga inyong buhaton samtang ania sa yuta.
Ang usa ka tinuod nga milenyal mao ang usa ka lalaki o babaye kinsa gisaligan sa Dios aron ipadala ngadto sa yuta atol sa labing mahinungdanong dispensasyon sa kasaysayan sa kalibutan. Ang usa ka tinuod nga milenyal mao ang usa ka lalaki o babaye kinsa nabuhi karon aron sa pagtabang sa pag-andam sa mga katawhan niini nga kalibutan alang sa Ikaduhang Pag-anhi ni Jesukristo ug sa Iyang milenyal nga paghari. Makasiguro kamo niini—kamo natawo aron mahimong usa ka tinuod nga milenyal.
Ang pangutana mao “Unsaon man ninyo pagbarug ug pagpakabuhi isip usa ka tinuod nga milenyal?” Ako adunay upat ka mga rekomendasyon.
1. Pagkat-on Kon Kinsa Gayud Kamo
Paggahin og panahon sa paghunahuna sa mainampoong paagi kabahin niini nga mga kamatuoran:
-
Kamo pinili nga anak nga lalaki o anak nga babaye sa Dios.
-
Kamo gilalang diha sa Iyang panagway.
-
Gitudloan kamo didto sa kalibutan sa espiritu sa pag-andam kaninyo alang sa bisan unsa ug tanang butang nga inyong masugatan atol niining ulahi nga bahin niining ulahing mga adlaw (tan-awa sa D&P 138:56). Kana nga pagtudlo magpabilin sulod kaninyo!
Nagpuyo kamo sa “ika-onse nga takna.” Ang Ginoo mipahayag nga kini mao ang katapusan nga panahon nga Siya motawag og mga mamumuo ngadto sa Iyang ubasan sa pagpundok sa mga pinili gikan sa upat ka mga suok sa kalibutan. (Tan-awa sa D&P 33:3–6.) Ug kamo gipadala sa pag-apil niini nga panagpundok. Balik-balik nako mismong nakit-an ang gamhanang impluwensya sa tinuod nga mga milenyal samtang sila nagdala sa uban ngadto sa kahibalo sa kamatuoran. Usa kini ka bahin sa inyong pagkatawo ug katuyoan isip binhi ni Abraham (tan-awa sa Mga Taga-Galacia 3:26–29)!
Pipila ka bulan ang milabay ang akong asawa, si Wendy, ug ako adunay talagsaong kasinatian sa layong bahin sa Siberia. Lakip niadtong mga nanagbiyahe uban kanamo sa among preparation day sa Irkutsk mao ang presidente sa misyon, si Gregory S. Brinton; iyang asawa, si Sally; ug ilang returned missionary nga anak, si Sam, kinsa miserbisyo sa iyang misyon sa Russia. Among gibisita ang matahum nga Lake Baikal ug usa ka merkado diha sa baybayon niini.
Dihang mibalik kami sa among van, among namatikdan nga wala si Sam. Sa wala madugay mibalik siya, giubanan sa usa ka hamtong nga babaye nga ginganlan og Valentina. Sa iyang lumad nga pinulongan nga Russian, si Valentina madasigong mituaw, “Kinahanglan ko nga makigkita sa inahan niining batan-ong lalaki. Matinahuron, maalamon, ug mabination kaayo siya! Kinahanglan ko nga makigkita sa iyang inahan!” Si Valentina nadani sa masanag, puno sa kahayag nga panagway ni Sam.
Si Sam mipaila-ila ni Valentina ngadto sa iyang inahan ug amahan, mihatag kaniya og pamphlet mahitungod sa Manluluwas, ug nakigsabut nga bisitahan siya sa mga misyonaryo. Sa dihang mibalik ang mga misyonaryo sa wala madugay aron sa pagbisita kaniya ug mihatag og kopya sa Basahon ni Mormon, misaad siya nga mobasa niini. Pipila ka mga babaye nga nagtrabaho sa samang dapit naghinam-hinam usab kabahin sa bag-ong basahon nga nadawat ni Valentina. Wala pa kita masayud sa katapusan niini nga istorya, apan tungod sa talagsaong kahayag nga gipasanag ni Sam, si Valentina ug pipila sa iyang mga higala gipaila sa ebanghelyo.
Ang tinuod nga mga milenyal sama ni Sam nasayud kon si kinsa gayud sila. Sila mapahinungurong mga disipulo ni Jesukristo kinsa mopahimulos dayon sa matag oportunidad sa pagtabang sa ilang kaugalingon ug sa uban nga mangandam alang sa milenyal nga paghari sa atong Manluluwas.
Busa, ang akong unang rekomendasyon mao ang pagkat-on alang sa inyong kaugalingon kon si kinsa gayud kamo. Pangutan-a ang inyong Langitnong Amahan sa pangalan ni Jesukristo unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga kamatuoran diha kaninyo. I-rekord kadto nga mga impresyon, ribyuha kini kanunay, ug sunda kadto nga mga impresyon nga walay pagkasayop.
Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilauman nga inyong buhaton alang Kaniya, mausab gayud ang inyong kinabuhi!
2. Laumi—ug Pangandam—sa Pagkab-ot sa Imposible
Ang Dios kanunay nga misugo sa Iyang mga anak sa pakigsaad sa pagbuhat sa lisud nga mga butang. Tungod kay kamo mga anak sa Dios nga nagtuman sa pakigsaad nga nagpuyo sa ulahing bahin niining ulahing mga adlaw, ang Ginoo mohangyo kaninyo sa pagbuhat sa malisud nga butang. Makasiguro kamo niana—ang mga pagsulay sama sa kang Abraham wala mohunong diha kang Abraham (tan-awa sa D&P 101:4–5).
Nasayud ko unsa ka makahahadlok nga pabuhaton og usa ka butang nga daw labaw ra kaayo sa inyong kapasidad. Sakop ako sa Korum sa Napulog Duha ka mga Apostoles sulod pa lamang sa 19 ka bulan sa dihang si Presidente Spencer W. Kimball (1895–1985) namatay. Sa unang miting sa Unang Kapangulohan ug Korum sa Napulog Duha ka mga Apostoles human sa pagkaorden ni Presidente Ezra Taft Benson (1899–1994), siya mihatag og piho nga mga buluhaton ngadto sa Napulog Duha. Ang iyang mga istruksyon ngari nako naglakip niining mga pulong: “Elder Nelson, ikaw ang moabli sa mga nasud sa Eastern Europe alang sa pagsangyaw sa ebanghelyo.”
1985 kadto. Atol niadtong mga tuig sa politikanhong kabalaka nga atong nailhan isip ang Cold War, dili lamang usa ka tinuod nga paril ang nagbahin sa dakbayan sa Berlin, apan ang tibuok Eastern Europe anaa usab ubos sa higpit nga impluwensya sa komunismo. Ang mga simbahan gisirad-an, ug ang relihiyoso nga pagsimba gilimitahan og maayo.
Migahin ko og dakong bahin sa akong propesyonal nga kinabuhi sa pag-abli og mga kasingkasing aron sa pagpahigayon og makaluwas sa kinabuhi nga mga operasyon, apan wala koy kasinatian aron motuo ko nga makapaabli ko og mga nasud alang sa pagsangyaw sa ebanghelyo. Bisan pa niana, usa ka propeta mihatag kanako og buluhaton, busa gisugdan nako sa pagbuhat ang daw imposible nga butang.
Gikan sa sinugdanan, ang mga babag gibutang sa akong agianan. Miabut ko sa kadaghanan sa mga nasud nga wala masayud kon asa moadto. Bisan kon nakahimo ko nga masayran ang ngalan sa tukma nga opisyales sa gobyerno, kasagaran ikanselar ang miting sa katapusang minuto o iuswag. Sa usa ka nasud, sa dihang ang usa ka sabut gilangay og duha ka adlaw, pipila ka mga tintasyon gituyo og pahigayon aron sa pagsulay kanako—lakip ang mga lit-ag sa ilegal nga pagpangilis og kwarta ug uban pang ginadili nga mga kalihokan. Sa laing okasyon, ang usa ka miting gisugdan uban sa hangyo nga ako mobiya diha-diha dayon!
Apan ang Ginoo makahimo sa pagbuhat sa Iyang kaugalingong buhat (tan-awa sa 2 Nephi 27:20–21), ug pribilehiyo nako nga makita ang sunod-sunod nga pagkahitabo sa mga milagro—kanunay, ug human lamang nga akong gibuhat ang akong labing maayo nga panghunahuna, ang akong labing maisugong mga paningkamot, ug ang akong labing matinguhaong pag-ampo sa buluhaton.
Ang Simbahan pormal nga giila sa pipila niadto nga mga nasud sa wala pa malumpag ang Paril sa Berlin. Ang uban misunod sa wala madugay. Niadtong 1992, nakahimo ko sa pag-report kang Presidente Benson nga ang Simbahan naestablisar na sa matag nasud sa Eastern Europe!
Isip usa ka tinuod nga milenyal nga masaligan sa Ginoo, kamo usab makahimo og kasaysayan! Kamo hangyoon sa pagdawat og mahagitong mga buluhaton ug mahimong instrumento sa mga kamot sa Ginoo. Ug Siya makapahimo kaninyo nga makab-ot ang imposible.
Unsaon ninyo pagkab-ot ang imposible? Pinaagi sa pagbuhat sa bisan unsa nga gikinahanglan sa paglig-on sa inyong hugot nga pagtuo kang Jesukristo, pinaagi sa pagpalambo sa inyong pagsabut sa doktrina nga gitudlo sa Iyang gipahiuli nga Simbahan, ug pinaagi sa walay puas nga pagtinguha sa kamatuoran. Kon kamo hangyoon sa pagbuhat sa imposibleng mga butang, kamo—isip usa ka tinuod nga milenyal nga may pundasyon sa lunsay nga doktrina—makadawat kamo sa buluhaton uban sa hugot nga pagtuo ug pagkamapadayunon ug malipayong mobuhat sa tanan nga anaa ubos sa inyong gahum sa pagtuman sa mga katuyoan sa Ginoo (tan-awa sa D&P 123:17).
Kamo adunay mga adlaw nga mawad-an gayud sa kadasig. Busa pag-ampo alang sa kaisug nga dili moundang! Magkinahanglan kamo niana nga kalig-on tungod kay mag-anam og ka dili popular ang mamahimong usa ka Santos sa Ulahing mga Adlaw. Subo lang, pipila sa inyong giisip nga mga higala mobudhi kaninyo. Ug ang ubang butang daw dili lang gayud makiangayon.
Hinoon, ako mosaad kaninyo nga samtang kamo mosunod ni Jesukristo, inyong makaplagan ang malungtarong kalinaw ug tinuod nga kalipay. Samtang sundon ninyo ang inyong mga pakigsaad uban sa nagkadugang nga katukma, ug samtang kamo manalipod sa Simbahan ug gingharian sa Dios dinhi sa yuta karon, ang Ginoo mopanalangin kaninyo og kalig-on ug kaalam sa pagbuhat sa imposible.
3. Pagkat-on Unsaon sa Pag-access sa Gahum sa Langit
Matag usa kanato adunay mga pangutana. Ang magtinguha sa pagkat-on, pagsabut, ug pag-ila sa kamatuoran usa ka mahinungdanong bahin sa atong mortal nga kasinatian. Dakong parte sa akong kinabuhi gigahin diha sa pag-research. Kamo usab labing makakat-on pinaagi sa pagpangutana og dinasig nga mga pangutana.
Niini gayud nga higayuna ang uban kaninyo nanlimbasug nga masayud unsay angay buhaton sa inyong kinabuhi. Ang uban ninyo tingali maghunahuna kon napasaylo ba mo sa inyong mga sala. Kadaghanan ninyo naglibug kinsa ug asa ang inyong mahangturong kauban—ug angay kamong maghunahuna niini.
Ang pipila tingali makapangutana nganong ang Simbahan nagbuhat sa pipila ka mga butang. Tingali daghan ninyo ang dili sigurado unsaon nga makadawat og mga tubag sa inyong mga pag-ampo.
Ang atong Langitnong Amahan ug ang Iyang Anak andam nga motubag sa inyong mga pangutana pinaagi sa pagpangalagad sa Espiritu Santo. Apan depende na ninyo nga magkat-on unsaon nga mokwalipay ug modawat niadto nga mga tubag.
Asa man kamo makasugod? Sugdi pinaagi sa paggahin og daghang panahon sa balaang mga dapit. Ang templo usa ka balaan nga dapit. Ingon man ang chapel, diin kamo mohimo og bag-o nga mga pakigsaad sa sakrament matag Dominggo. Dapiton ko usab kamo sa paghimo sa inyong apartment, inyong dormitoryo, inyong panimalay, o inyong kwarto nga usa ka balaan nga dapit diin makahiklin kamo nga luwas gikan sa dautan nga mga kalinga sa kalibutan.
Ang pag-ampo usa ka yawe. Pag-ampo aron masayud kon unsay hunungon sa pagbuhat ug unsay sugdan sa pagbuhat. Pag-ampo aron masayud unsay idugang sa inyong palibut ug unsay tangtangon aron ang Espiritu magauban kaninyo sa kabuhong.
Pangamuyo sa Ginoo alang sa gasa sa pag-ila. Dayon magpuyo ug maningkamot nga mahimong takus nga makadawat niana nga gasa, nga kon ang makalibug nga mga panghitabo motumaw sa kalibutan, kamo masayud gayud unsa ang tinuod ug unsay dili (tan-awa sa 2 Nephi 31:13).
Pagserbisyo uban sa gugma. Ang mahigugmaong pagserbisyo niadtong nahisalaag o samaran sa espiritu moabli sa inyong kasingkasing ngadto sa personal nga pagpadayag.
Paggahin og mas dakong panahon—mas dako gayud nga panahon—sa mga dapit diin ang Espiritu anaa. Kana nagpasabut nga mas daghang panahon uban sa mga higala kinsa nagtinguha nga makabaton sa Espiritu uban kanila. Paggahin og mas daghang panahon sa pag-ampo, mas daghang panahon sa mga kasulatan, mas daghang panahon sa buhat sa family history, mas daghang panahon sa templo. Mosaad ko nga samtang kamo kanunay nga mohatag sa Ginoo og dako nga bahin sa inyong panahon, Siya mopilo-pilo sa nahibilin.
Atong gipaluyohan ang 15 ka mga lalaki kinsa giordinahan isip mga propeta, mga manalagna, ug mga tigpadayag. Kon moabut ang lisud nga problema—ug daw mag-anam kini kalisud matag adlaw—kining 15 ka mga lalaki manlimbasug sa pagsulbad sa problema, maningkamot nga makakita sa posibleng mga resulta sa lain-laing mga solusyon, ug sila makugihong magtinguha sa pagpaminaw sa tingog sa Ginoo. Human sa pagpuasa, pag-ampo, pagtuon, pagpamalandong, ug pakigtambag uban sa akong mga Kaigsoonan mahitungod sa importante kaayong mga butang, kasagaran makamata ko inig ka gabii uban sa dugang mga impresyon kabahin sa mga isyu nga among gikabalak-an. Ug ang akong mga Kaigsoonan dunay sama nga kasinatian.
Ang Unang Kapangulohan ug Korum sa Napulog Duha ka mga Apostoles magtinambagay sa usag usa ug mopakigbahin sa tanan nga gipasabut ug gipabati kanamo sa Ginoo sa indibidwal ug tiningub nga paagi. Ug dayon motan-aw kami sa Ginoo nga moimpluwensya sa Presidente sa Simbahan sa pagpahayag sa kabubut-on sa Ginoo.
Kining propetikanhong proseso gisunod niadtong 2012 sa pag-usab sa minimum nga edad sa misyonaryo, ug usab sa bag-o lang nga mga gidugang sa handbook sa Simbahan, isip resulta sa paghimong legal sa kaminyoon sa mga sama og sekso sa ubang mga nasud. Napuno sa kapuangod alang sa tanan, ug ilabi na sa mga bata, naningkamot mi og maayo sa pagsabut sa kabubut-on sa Ginoo kabahin niini nga butang.
Kanunay nga naghunahuna sa plano sa Dios sa kaluwasan ug sa Iyang paglaum alang sa kinabuhing dayon alang sa matag usa sa Iyang mga anak, among gikonsiderar ang dili maihap nga mga pag-usab ug mga kombinasyon sa posibleng mga sitwasyon nga mahimong motumaw. Pabalik-balik kaming nag-abut sa templo sa pagpuasa ug pag-ampo ug nagtinguha og dugang giya ug inspirasyon. Ug unya, sa dihang ang Ginoo midasig sa Iyang propeta, si Presidente Thomas S. Monson, sa pagpahayag sa hunahuna sa Ginoo ug sa kabubut-on sa Ginoo, ang matag usa kanamo niana nga sagradong higayon mibati og espirituhanong kumpirmasyon. Among pribilehiyo isip mga Apostoles sa pagpaluyo sa unsay gipadayag ngadto ni Presidente Monson. Pagpadayag gikan sa Ginoo ngadto sa Iyang mga sulugoon usa ka sagrado nga proseso, ug mao usab inyong pribilehiyo sa pagdawat og personal nga pagpadayag.
Mga kaigsoonan, kamo adunay sama nga access ngadto sa hunahuna ug kabubut-on sa Ginoo alang sa inyong kaugalingong kinabuhi sama namong mga Apostoles alang sa Iyang Simbahan. Sama sa gikinahanglan sa Ginoo gikan namo sa pagpangita ug pagpamalandong, pagpuasa ug pag-ampo, ug pagtuon ug pagpaningkamot sa lisud nga mga pangutana, Siya nagkinahanglan gikan ninyo sa pagbuhat sa ingon samtang kamo magtinguha og mga tubag sa inyong kaugalingong mga pangutana.
Makakat-on kamo sa pagpaminaw sa tingog sa Ginoo pinaagi sa mga paghunghong sa Espiritu Santo.1 Samtang daw makatabang ang Google, Twitter, ug Facebook, kini dili gayud makahatag og mga tubag sa inyong labing importanteng mga pangutana!
Akong minahal nga batan-ong mga higala, inyong mahibaloan ang hunahuna ug kabubut-on sa Ginoo alang sa inyong kaugalingong kinabuhi. Dili kinahanglang maghunahuna kamo kon anaa ba kamo sa dapit nga gusto sa Ginoo nga kamo maanaa o kon nagbuhat ba kamo sa gusto Niya nga inyong buhaton. Mahimo kamong makahibalo! Ang Espiritu Santo “magtug-an kaninyo sa tanan nga mga butang nga inyong buhaton” (2 Nephi 32:3).
4. Sunda ang mga Propeta
Niadtong 1979, samtang nagserbisyo isip kinatibuk-ang presidente sa Sunday School, gidapit ko sa pagtambong sa usa ka seminar sa mga Regional Representative diin si Presidente Spencer W. Kimball mihatag og makapadasig nga pakigpulong kabahin sa pag-abli sa pultahan sa mga nasud nga nianang higayuna sirado ngadto sa Simbahan, sama sa China. Gihagit niya ang tanang mitambong sa pagtuon sa pinulongan nga Mandarin aron makatanyag kami sa among propesyonal nga kahanas sa pagtabang sa mga tawo sa China.
Ngari kanako, ang hagit ni Presidente Kimball ingon og usa ka propetikanhong sugo. Mao nga niana dayong gabhiuna akong gihangyo ang akong asawa, si Dantzel, kon andam ba siyang magtuon og Mandarin uban kanako. Miuyon siya, ug nakakaplag kami og usa ka tutor nga motabang kanamo. Siyempre wala mi makat-on nga maayo kaayong makasulti og Mandarin, apan igo ang among nahibaloan nga sa dihang gidapit ko pagkasunod tuig (pinaagi sa nagsunod-sunod nga wala gayud damha nga mga hitabo) sa pag-adto ngadto sa China isip usa ka visiting professor aron sa pagtudlo og open-heart surgery, mas andam na ako sa pagdawat sa imbitasyon.
Paspasan nato og lima ka tuig ngadto sa 1985, ang tuig human ako gitawag ngadto sa Korum sa Napulog Duha. Usa ka adlaw nakadawat ko og dinaliang hangyo sa pag-adto ngadto sa China sa pagpahigayon og open-heart surgery sa ilang sikat nga opera star, gitamud sa tibuok China isip nasudnong bayani. Akong gipasabut nga ang akong full-time nga eklesiyastikanhong responsibilidad nagpugong kanako sa pag-adto, apan ang mga doktor sa China mihangyo kanako nga moadto diha-diha dayon sa pagpahigayon sa makaluwas sa kinabuhi nga operasyon.
Akong gihisgutan ang sitwasyon uban sa akong presidente sa korum ug sa Unang Kapangulohan. Mibati sila nga, isip usa ka pabor ngadto sa mga tawo sa China, kinahanglan kong mobiyahe ug mopahigayon sa operasyon.
Nga akong gibuhat. Maayo gani, malampuson ang operasyon! Ug mao kadto ang katapusang open-heart nga operasyon nga akong gipahigayon. Didto kadto sa Jinan, China, niadtong Marso 4, 1985.
Karon, modiretso na usab kita sa Oktubre 2015. Si Wendy ug ako gidapit sa pagbalik ngadto sa Shandong University School of Medicine sa Jinan. Nahingangha kami sa dihang mainiton akong giabi-abi isip “karaan nga higala” sa China ug nahiusa pag-usab uban sa mga surgeon nga akong natudloan 35 ka tuig na ang milabay. Ang labing nindot nga bahin sa among pagbisita mao ang pakighimamat sa anak ug apo niadtong sikat nga opera star. Ang tanan niining talagsaong mga kasinatian nahitabo tungod sa usa ka rason: Naminaw ko sa tambag sa usa ka propeta sa pagtuon og Mandarin!
Ang mga propeta makakita sa unahan. Makakita sila sa makalilisang nga kakuyaw nga gibutang o ibutang sa kaaway diha sa atong dalan. Ang mga propeta makakita usab sa talagsaong mga posibilidad ug mga pribilehiyo nga naghulat niadtong naminaw uban sa tuyo sa pagsunod. Nasayud ko nga tinuod kini! Pabalik-balik ko kini nga nasinati sa akong kaugalingon.
Ang Ginoo misaad kanato nga Siya dili gayud motugot sa propeta nga mopahisalaag kanato. Si Presidente Harold B. Lee (1899–1973) mideklarar: “Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini mosupak sa inyong politikanhong mga panglantaw. Mahimo nga kini supak sa inyong sosyal nga mga panglantaw. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6).”2
Kamo dili kanunay makasabut sa matag pahayag sa buhi nga propeta. Apan kon kamo nasayud nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta.
Mga 40 B.C., daghang mga Nephite miapil sa Simbahan, ug ang Simbahan miuswag. Apan ang tinago nga mga kalihokan misugod usab sa pagtubo, ug daghan sa ilang maliputon nga mga pangulo mitago taliwala sa mga katawhan ug lisud mailhan. Sa dihang ang katawhan nahimong mas magarbuhon, daghan sa mga Nephite ang “mibiay-biay niana nga sagrado, milimud sa espiritu sa pagpanagna ug pagpadayag” (Helaman 4:12).
Kadtong sama nga mga hulga anaa sa atong taliwala karon. Ang bug-at nga reyalidad mao nga ang “mga sulugoon ni Satanas” (D&P 10:5) nakatago taliwala sa tibuok katilingban. Busa pagmatngon og maayo kon kang kinsang tambag ang inyong sundon (tan-awa sa Helaman 12:23).
Minahal ko nga mga kaigsoonan, kamo gipakatawo aron mahimong tinuod nga mga milenyal. Kamo “usa ka pinili nga henerasyon” (1 Pedro 2:9), gideterminar nang daan sa Dios sa pagbuhat og talagsaong buhat—sa pagtabang sa pag-andam sa mga katawhan niini nga kalibutan alang sa Ikaduhang Pag-anhi sa Ginoo!