“Faapei ona Ou Alofa Atu ia te Outou”

Saunia e Peresitene Thomas S. Monson

O ni tausaga ua mavae na faamatala mai ai e se uo e igoa ia Lui se tala ootia e uiga i si ona tina agamalu ma leo malu. Ina ua maliu o ia, sa leai ni tupe se tele na ia tuua i ona atalii ma afafine ae sa na o se talatuu na mau i faataitaiga, i le ositaulaga, ma i le usiusitai.

Ina ua mae’a ona tautalagia molimau o le maliu ma uma foi le solo faanoanoa i le fanuamaliu, sa faapea ona faavasegaina ai e le fanau ua matutua ia nai meatotino laiti na tuua e tina. Na tau Lui i mea na i ai i se tusi puupuu ma se ki. Na faatonu mai i le tusi puupuu: “I le tulimanu o le potumoe, i le kapoti pito i lalo o la’u pusa lavalava, o loo i ai se pusa laitiiti. O loo i ai oa aupito taua i lo’u fatu. O le ki lenei e matala ai le pusa.”

Sa mafaufau [i latou] uma po o le a se mea na sili ona taua na tuuina e lo latou tina i se pusa e i ai se loka ma se ki.

Na aveese mai le pusa mai lona nofoaga sa teu ai, ma tatalaina ma le faaeteete e faaaoga ai le ki. A o suesue e Lui ma isi mea sa i totonu o le pusa, na latou mauaina ai ni ata toatasi o tamaiti taitoatasi, faatasi ai ma le igoa ma le aso fanau o le tamaitiiti. Ona aumai lea i fafo e Lui se kata valenitina na faia i le fale. I se tusitusi faatamaitiiti, ma faalelelei, lea na ia matauina o lana lava lea, sa ia faitauina ai upu sa ia tusia i le 60 tausaga ua te’a: “Tina Pele, ou te alofa ia te oe.”

Na ootia loto, malu leo, ma maligi loimata. O oa a tina o lona aiga lea e faavavau. O lona malosiaga na taoto lea i le faavae mausali o le “Ou te alofa ia te oe.”

I le lalolagi i aso nei, e leai se nofoaga e sili ona manaomia ai lena faavae mausali o le alofa nai lo o totonu o le aiga. Ma e leai se nofoaga e tatau ona maua ai e le lalolagi se faataitaiga sili ona lelei o lena faavae nai lo o totonu o aiga o le Au Paia o Aso e Gata Ai, o e ua avea le alofa ma fatu o o latou olaga faaleaiga.

Ia i tatou o e ua tautino mai o ni soo o le Faaola o Iesu Keriso, na Ia tuuina mai i ai le aoaoga maoae lenei:

“O le poloaiga fou ou te tuu atu ai ia te outou, Ia outou fealofani; faapei ona ou alofa atu ia te outou, ia fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani.”¹

Afai tatou te tausia le poloaiga ia fealofani, e tatau lava la ona tatou taulimaina le tasi ma le isi i le agalelei ma le faaaloalo, i le faaali atu o le alofa i a tatou fegalegaleaiga i lea aso ma lea aso. O le alofa e tuuina atu se upu agalelei, se tali e onosai, se faatinoga le manatu faapito, ma se faalogo e malamalama, ma se loto faamagalo. I a tatou fegalegaleaiga uma, o nei faatinoga ma isi, e fesoasoani e faamaonia ai le alofa o loo i totonu o o tatou loto.

Na saunoa Peresitene Gordon B. Hinckley (1910–2008): “O le alofa … o le ulo auro lea e i le si’ui o le nuanua. Ae na sili atu nai lo o le si’ui o le nuanua. E i ai foi le alofa i le amataga, ma mai i le [alofa] e puna a’e ai le matagofie lea e tau atu i le lagi i se aso matagia. O le alofa o le puipuigamalu lea e mafua ai ona fetagisi tamaiti, e faamemelo i ai le autalavou, o le fusi e fusia ai faaipoipoga, ma le suauu na te taofia feteenaiga faataumaoi i le aiga; o le filemu o le soifua matua, o le la susulu o le faamoemoe e sulugia ai le oti. Oka se tamaoaiga o i latou o e fiafia i a latou fegalegaleaiga ma aiga, uo, ekalesia, ma tuaoi.”²

O le alofa o le ute tonu lea o le talalelei, le uiga faaalia aupito tamalii o le tagata soifua. O le alofa o le vaifofo lea mo aiga e i ai faigata ma faafitauli, afioaga e i ai tulaga le manuia, ma malo auma’ia. O le alofa o se ataata, o se talotalo, o se upu agalelei, ma se faamalo. O le alofa o le ositaulaga, auauna atu, ma le le manatu faapito.

Tane, ia alolofa i a outou ava. Taulima i latou i le faatamalii ma le talisapaia. Tuafafine, alolofa i a outou tane. Taulima i latou i le ava ma faamalosiauga.

Matua, alolofa ia outou fanau. Tatalo mo i latou, aoao i latou, ma molimau atu ia i latou. Fanau, alolofa i o outou matua. Faaali atu le faaaloalo, loto faafetai, ma le usiusitai ia i latou.

Ua fautua mai Mamona, a aunoa ma le alofa mama o Keriso, “o ni mea noa [tatou].”³ O la’u tatalo, tau ina ia tatou mulimuli i le fautuaga a Mamona ia, “tatalo atu i le Tamā ma le malosi atoa o o [tatou] loto, ina ia faatumulia [tatou] i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea [tatou] ma atalii o le Atua; a oo ai ina afio mai o ia o le a tatou faapei o ia.”⁴