Pyetje & Përgjigje

“Përpos lutjes dhe studimit të shkrimeve të shenjta, cila është mënyra më e mirë për ta forcuar dëshminë time?”

Dëshmia juaj me shumë gjasë nuk do të vijë e tëra njëherësh. Ajo do të rritet përvojë shpirtërore pas përvoje shpirtërore – ashtu siç thonë shkrimet e shenjta: “Rresht pas rreshti, parim pas parimi” (2 Nefi 28:30). Ju atëherë duhet ta ushqeni dhe forconi dëshminë tuaj, ashtu si një farë që rritet (shih Alma 32:28–43). Dhe sikurse një bimë nuk mund të mbijetojë vetëm me ujë, po ashtu nuk ka vetëm një mënyrë “më të mirë” për ta forcuar dëshminë tuaj. Ju duhet një gërshetim mënyrash.

Lutja dhe studimi i shkrimit të shenjtë janë pa dyshim mënyra të mira për ta ushqyer dëshminë tuaj. Ndërsa e studioni ungjillin dhe luteni me qëllim të sinqertë për ta ditur se diçka është e vërtetë, Fryma e Shenjtë do t’ju ndihmojë ta ndieni të vërtetën e ungjillit (shih Moroni 10:4–5).

Ju gjithashtu mund ta forconi dëshminë tuaj duke i mbajtur urdhërimet. Kur e vini në jetë një parim të ungjillit – të tillë si agjërimin, mbajtjen e ditës së Shabatit të shenjtë ose marrjen e sakramentit – ju filloni të fitoni një dëshmi për mënyrën si dhe arsyen përse ai është i vërtetë, në vend të thjesht një dëshmie që është i vërtetë. Jezusi tha se, kur zgjidhni të “bë[ni] vullnetin e tij”, ju “do ta nj[ihni] … doktrinë[n]” (Gjoni 7:17).

Një mënyrë tjetër për ta ushqyer dëshminë tuaj është duke e dhënë atë. Presidenti Bojd K. Paker (1924–2015), President i Kuorumit të Dymbëdhjetë Apostujve, tha: “Një dëshmi fitohet kur jepet!” (“The Candle of the Lord”, Ensign, janar 1983, f. 54; Tambuli, korrik 1983, f. 34). Ju mund ta jepni dëshminë tuaj në kishë dhe seminar, në shtëpi dhe mes miqsh. Kur e bëni atë, Fryma e Shenjtë mund t’ju dëshmojë juve se ajo që po thoni, është e vërtetë.

Ndërsa e forconi dëshminë tuaj në shumë mënyra të ndryshme, ajo do të rritet e thellohet dhe ju do të ndieni paqe dhe gëzim.

Punoni me Misionarët

Puna misionare ka qenë mënyra më e mirë për mua për ta forcuar dëshminë time. Sa herë punoj me misionarët, unë ndiej dashurinë e Krishtit.

Xhoi D, 19 vjeçe, Leite, Filipine

Përpiquni të Jeni Dishepull

Ju mund ta forconi dëshminë tuaj duke u përpjekur për të qenë përherë një dishepull i vërtetë i Jezu Krishtit. Bindja ndaj urdhërimeve të Perëndisë na bën të guximshëm në dëshmitë tona dhe kjo në vijim i bën dëshmitë tona edhe më të forta dhe [na bën] gati për mbretërinë e Perëndisë (shih DeB 76:79). Ju gjithashtu mund ta forconi dëshminë tuaj duke e dhënë atë.

Plaku Mjul Simon, 23 vjeç, Misioni i Republikës Demokratike të Kongos, Lubumbashi

Dëgjojeni Frymën e Shenjtë

Vajtja në kishë, leximi i shkrimeve të shenjta, dëgjimi i bisedave të konferencës dhe kështu me radhë do t’ju ndihmojnë ta forconi dëshminë tuaj vetëm nëse e dëgjoni Frymën e Shenjtë. Ai do t’ju dëshmojë për të vërtetën. Dëgjojeni përherë Frymën e Shenjtë, pasi Ai gjendet pranë dhe do t’ju ndihmojë ta forconi dëshminë tuaj.

Alisa B., 16 vjeçe, Virxhinia, SHBA

Shpreheni Atë që e Dini se Është e Vërtetë

Kam mësuar se një nga mënyrat më të mrekullueshme për ta forcuar dëshminë time, është t’ua shpreh atë të tjerëve. Sa herë që e shpreh atë që besoj dhe e di se është e vërtetë – sado e thjeshtë dhe e parëndësishme që mund të jetë – unë ndiej një ngrohtësi të madhe brenda kraharorit tim dhe me të vjen një konfirmim [edhe] më i madh në zemrën time se ato gjëra që kam thënë, janë të vërteta! Me fjalë të tjera, e ndiej dëshminë time të forcohet.

Daglas S., 20 vjeç, San-Paolo, Brazil

Shkoni në Mision

Vajtja në mision do të forcojë dëshmitë për ju dhe për të tjerët të cilëve u jepni mësim. Në mision ju do të mësoni të mbështeteni plotësisht te Zoti dhe jo te forca juaj vetjake. Një mision do t’ju forcojë dhe, ndërsa i shërbeni Zotit dhe bëni punën e Tij, ai do të forcojë dëshminë tuaj.

Plaku Beili Peali’I Uilliams, 19 vjeç, Misioni i Singaporit

Bëhuni më Shumë si Krishti

Ne mund t’i forcojmë dëshmitë tona duke u bërë më shumë si Krishti. Unë e kam forcuar dëshminë time kur e kam shfaqur dashurinë e pastër të Krishtit dhe u kam shërbyer të tjerëve siç bëri Shpëtimtari.

Kiang Zhin P., 17 vjeçe, Seul, Koreja e Jugut

Jepeni Dëshminë Tuaj

Një mënyrë e mirë për ta forcuar dëshminë tuaj, është ta jepni atë. Ndonjëherë, kur e jepni dëshminë tuaj, ju e zbuloni [se e keni] atë. Ju gjithashtu mund të agjëroni për të ditur vetë nëse ajo që po ju mësohet, është e vërtetë. Unë i kam bërë të dyja këto gjëra dhe ato e kanë forcuar së tepërmi dëshminë time.

Porter S., 12 vjeç, Ajdaho, SHBA

Shërbejuni të Tjerëve

Përveç lutjes dhe studimit të shkrimeve të shenjta, unë mendoj se mënyra më e mirë për ta forcuar dëshminë tuaj është nëpërmjet shërbimit. Kur u shërbejmë të tjerëve, ne i tregojmë Perëndisë se ne kujdesemi për fëmijët e Tij. Gjithashtu, ne mund ta marrim Shpirtin kur jemi duke bërë punën e Perëndisë. Unë e di se, shumë herë, kam marrë ngushëllim gjatë periudhave të vështira dhe përgjigje për pyetjet ndërsa po bëja shërbim.

Karolina J., 18 vjeçe, Juta, SHBA

Përgjigjet synojnë të japin ndihmë dhe këndvështrim, jo që të jenë deklarime zyrtare për doktrinën e Kishës.

Ushqyerja e Dëshmisë Suaj

“Si një bimë në rritje, [një dëshmi] duhet të ushqehet ose ajo do të vyshket. … Bindja ndaj urdhërimeve është pjesë e ushqimit që duhet të siguroni për dëshminë tuaj.”

Presidenti Henri B. Ajring, Këshilltar i Parë në Presidencën e Parë, “Një Dëshmi e Gjallë”, Liahona, maj 2011, f. 125.

Pyetja Pasuese

Si mund ta ftoj Shpirtin në shtëpinë time kur njerëzit janë duke u grindur apo debatuar?

Dërgojeni përgjigjen tuaj dhe, nëse dëshironi, një fotografi me rezolucion të lartë deri më 15 nëntor 2017 në liahona.lds.org (klikoni te “Submit an Article” [“Dorëzo një Artikull”]) ose nëpërmjet postës elektronike në adresën [e-mail].

Ju lutemi, përfshini informacionin vijues: 1) emrin e plotë, 2) datën e lindjes, 3) lagjen ose degën, 4) kunjin ose distriktin, 5) lejen tuaj me shkrim dhe, nëse jeni nën moshën 18 vjeç, lejen me shkrim të prindit tuaj (mesazhi elektronik pranohet) për botimin e përgjigjes dhe të fotografisë suaj.

Përgjigjet mund të redaktohen lidhur me gjatësinë apo qartësinë.