Ano, Bakit, at Paano: Isang Paglalarawan sa Panunumbalik

Ni Faith Sutherlin Blackhurst

Mga Magasin ng Simbahan

Upang maituro ang ebanghelyo, kakailanganin mong maipaliwanag kung ano ang apostasiya, mga dispensasyon, at ang Panunumbalik. Makatutulong ang tsart na ito.

Ipalagay nating ikaw ay nasa isang linggong bakasyon sa dalampasigan kasama ang pamilya ng iyong kaibigan. Naging napakasaya mo, subalit nagsisimula ka nang mangulila sa iyong pamilya. Pagkatapos ay nag-text sa iyo ang tatay mo upang kumustahin ka—iyon mismo ang kailangan mo upang madamang minamahal at naaalala ka.

Ang buhay sa daigdig ay parang ganyan. Ang Diyos ay hindi nagpapadala sa atin ng mga text, subalit malayo tayo sa ating tahanan sa langit, kaya isang paraan ng Ama sa Langit na maiparating ang Kanyang pagmamahal sa atin ay sa pamamagitan ng pagpapadala ng mga propeta.

Dispensasyon

Mga paglalarawan ni Ben Simonsen

Namumuno ang mga propeta sa tinatawag na mga dispensasyon, mga panahon kung kailan (1) ang Diyos ay may hindi bababa sa isang awtorisadong pinuno sa priesthood sa daigdig at (2) ang pinunong ito, isang propeta, ay natututuhan ang plano ng kaligtasan mula mismo sa Diyos. Pagkatapos ay itinuturo, o idinidispensa, ng propeta ang ebanghelyo sa mga tao.

Salamat sa mga banal na kasulatan, alam natin ang tungkol sa marami sa mga dispensasyong ito. Ilan sa mahahalagang dispensasyon ang kanila Adan, Enoc, Noe, Abraham, Moises, Jesucristo, at Joseph Smith. Ang Panginoon ay nagpasimula ng dispensasyon sa pamamagitan ng bawat propetang iyan.

Apostasiya

Apostasiya=kasamaan. Kapag ang isang tao o grupo ay tumatalikod mula sa mga katotohanan ng ebanghelyo ni Jesucristo, tinatanggihan ang mga propeta, at nahuhulog sa kasalanan, nag-aapostasiya sila.

Paano Nangyayari ang Apostasiya

Ang Diyos ay tumatawag ng propeta, na itinuturo ang totoong ebanghelyo ni Jesucristo.

Ang mga taong sumusunod sa mga turo ng propeta ay pinagpala.

Ang ilan sa mga tao ay nagiging mapagmataas at tinatanggihan ang propeta.

Madalas na iniaalis ng Panginoon ang Kanyang propeta mula sa mga taong tinatanggihan ang mga alituntunin ng ebanghelyo.

Kapag nasa wastong oras na, ang Diyos ay tumatawag ng bagong propeta upang ipanumbalik ang katotohanan, ang priesthood, at ang Simbahan.

Panunumbalik

Ang panunumbalik ay isang gawain ng pagbabalik ng isang bagay sa orihinal nitong kalagayan. Ito ay hindi isang repormasyon, na nagbabago ng isang bagay na naroroon na upang gumawa ng isang bagong bagay. Halimbawa, kung nais ninyong magpanumbalik ng isang lumang bahay, kailangan ninyong magpatayo muli gamit ang parehong layout tulad ng orihinal nito. Maaaring naisin ninyong magdagdag ng bagong tsiminea, ngunit babaguhin ninyo ang bahay, hindi panunumbalik.

Ang ebanghelyo ni Jesucristo ay kinailangang ipanumbalik dahil nawala ito noong Malawakang Apostasiya. Nabuhay ang mga tao nang ilang siglo nang walang totoong Simbahan. Kaya ipinanumbalik ng Panginoon ang Kanyang Simbahan at ebanghelyo sa pamamagitan ni Joseph Smith, tulad ng ipinropesiya ng sinaunang mga propeta (tingnan sa Isaias 2:1–3; 29:13–14; Mga Gawa 3:19–21; Apocalipsis 14:6–7; 2 Nephi 3:3–15).

Ang tunay na ebanghelyo ni Jesucristo ay narito upang manatili—kaya mananatili ka ba rito? Bagama’t ang daigdig ay lalong nagiging mas masama, mananatili ang Simbahan ni Jesucristo hanggang sa huli.

Mayroon kayong gagawing pagpili—ang parehong pagpiling hinarap ng mga tao mula sa simula ng kasaysayan: susundin ba ninyo ang propeta? Kung gagawin ninyo, pagpapalain kayo at matatamo ninyo ang Espiritu upang gabayan kayo.

Mga Pinuno ng mga Dispensasyon

Ang mga propetang ito ay tinawag ng Diyos, “dahil sa kanilang labis na pananampalataya at mabubuting gawa” (Alma 13:3; tingnan din sa Abraham 3:22–23). Ang mga susi ng priesthood na taglay nila ay ipinanumbalik kay Propetang Joseph Smith.

Narito ang ilang kawili-wiling bagay tungkol sa mga propetang ito. Tingnan kung ano pa ang matututuhan ninyo tungkol sa kanila habang inaaral ninyo ang mga banal na kasulatan.

Adan

Si Adan ay isang tunay na tagapanguna: siya ang unang tao sa daigdig at ang unang propeta! Itinuro niya sa kanyang pamilya ang ebanghelyo, subalit maging sa simula, marami ang “hinangad ang kanilang sariling mga payo sa dilim” at tinanggihan ang katotohanan (Moises 6:28).

Enoc

Narinig na ba ninyo na dinala sa langit ang isang buong lungsod? Ang lungsod ng Sion—na itinatag ni Enoc—ay napakabuti kaya dinala ang mga tao sa langit upang makasama ng Diyos (tingnan sa Moises 7:23).

Noe

Alam ninyo ang tungkol sa arka ni Noe. Walong katao lang—ang pamilya ni Noe—ang nakaligtas sa Baha dahil nakinig sila sa mga babala ni Noe (tingnan sa Genesis 7; Moises 8). Subalit alam ba ninyo na natanggap niya ang priesthood noong 10 taong gulang siya (tingnan sa D at T 107:52) at na “hinanap si Noe upang kitlan ng kanyang buhay” ng mga “higante”? (Moises 8:18).

Abraham

Muntik nang masakripisyo si Abraham ng masasamang saserdote, subalit iniligtas siya ng isang anghel (tingnan sa Abraham 1). Nagkaroon siya ng ilang kamangha-manghang paghahayag, kabilang ang isang pangitain tungkol sa buhay bago tayo isinilang. Ang mga miyembro ng Simbahan ay kanyang mga inapo, at ang tipang Abraham ay ipinangalanan sa kanya. (Tingnan sa Abraham 2–5.)

Moises

Pinamunuan ni Moises ang mga Israelita palabas ng Egipto at tinulungan sila na magkamit ng kalayaan. Siya ay “matiyagang naghangad na pabanalin ang kanyang mga tao upang kanilang mamasdan ang mukha ng Diyos; subalit kanilang pinatigas ang kanilang mga puso at hindi nakatagal sa kanyang harapan” (D at T 84:23–24). Sa katunayan, dahil sa kanilang apostasiya, nagpalibut-libot sila sa ilang nang 40 taon!

Jesucristo

Hindi lamang nagturo ng ebanghelyo at gumawa ng maraming himala si Jesucristo, subalit itinatag din Niya ang Kanyang Simbahan sa lupa. Siya ay nagbayad-sala para sa ating mga kasalanan at ipinako sa krus at nabuhay na mag-uli upang bigyang-kakayahan tayo na malagpasan ang espirituwal at pisikal na kamatayan. Siya ang pinuno ng Kanyang Simbahan ngayon, at Siya at ang Ama sa Langit ang pinagmumulan ng awtoridad ng priesthood.

Ang Malawakang Apostasiya

Matapos ang Pagkabuhay na Mag-uli ng Tagapagligtas, ang Kanyang mga Apostol at ang iba pang mga pinuno ng Simbahan ay sinubukang ikalat ang ebanghelyo, subalit tinanggihan ng mga tao ang kanilang mga turo at pinatay pa ang ilan sa mga Apostol. Dahil sa kasamaan ng mga tao, ang kabuuan ng ebanghelyo ay nawala sa daigdig. Nabalot ang daigdig ng espirituwal na kadiliman (tingnan sa Isaias 60:2).

• Sa loob ng higit sa 1,000 taon, ang mga tao ay walang paraang makatanggap ng mga ordenansa ng kaligtasan, mga pagpapala ng templo, o patnubay ng propeta.

• Nawala mula sa Biblia ang mahahalagang katotohanan.

• Itinuro ang maling mga ideya tungkol sa tunay na katangian ng Diyos.

• Ang ilan sa mga ordenansa ng kaligtasan ay binago o itinuro nang mali (tingnan sa Isaias 24:5).

• Ang apostasiya kalaunan ay nagdulot sa pagtataguyod ng maraming simbahan.

Ang Repormasyon

Noong panahon ng Malawakang Apostasiya, nabatid ng ilang relihiyosong tao sa Europa na ang ebanghelyo ni Jesucristo ay hindi naituturo nang wasto. Ang mga taga-repormang ito ay hindi mga propeta, datapwat ginawa nila ang lahat ng kanilang makakaya upang maituro ang katotohan ayon sa pagkakaunawa nila. Tumulong sila na magkaroon ng Biblia ang mas maraming tao. Marami ang nakipaglaban para sa kalayaang panrelihiyon at nagbigay-daan para sa Panunumbalik ng ebanghelyo.

Joseph Smith

Kung sa gayon ay nawala na ba ang ebanghelyo magpakailanman? Hindi! Naghayag muli ang Diyos ng mahahalagang katotohanan kay Joseph Smith. Ipinanumbalik sa kanya ng mga mensahero mula sa langit ang lahat ng kinakailangang susi ng priesthood (tingnan sa D at T 27:8–13; 110; 128:18–21), na nagdulot sa panahong ito na maging “dispensasyon ng kaganapan ng panahon” (D at T 138:48). Kilala rin ito bilang ang mga huling araw dahil ito ang huling dispensasyon bago ang Ikalawang Pagparito ni Jesucristo.

Ang Panunumbalik

Alam ba ninyo? Nasa INYO ang mga pagpapala ng Panunumbalik. Oo, sa inyo!

• Ang Simbahan ni Jesucristo ay ipinanumbalik nang may propeta at mga apostol upang mamuno rito.

• Ipinanumbalik ng Aklat ni Mormon, Doktrina at mga Tipan, Mahalagang Perlas, at ng iba pang mga paghahayag sa panahong ito ang mahahalagang katotohanang nawala (tingnan sa 2 Nephi 27).

• Natanggap ni Joseph Smith ang Aaronic Priesthood mula kay Juan Bautista (tingnan sa D at T 13) at ang Melchizedek Priesthood mula kina Apostol Pedro, Santiago, at Juan (tingnan sa D&C 128:20).

• Isinasagawa ng awtorisadong mga maytaglay ng priesthood ang mga ordenansa ng kaligtasan nang wasto.

• At alam natin na hindi na muling mawawala ang katotohanan sa pamamagitan ng apostasiya (tingnan sa Daniel 2:44).