Digital Only

4 Ka Paagi sa Pagserbisyo sa mga Pamilya nga dunay mga Kakulangan

Ni Valerie Durrant

Mga Magasin sa Simbahan

Ang mga pamilya nga naapektuhan sa mga kakulangan nagkinahanglan sa inyong gugma, tabang, ug suporta.

Mga 15 ka porsyento sa populasyon sa kalibutan adunay pipila ka matang sa kakulangan.¹ Alang sa mga tig-atiman niadtong adunay mga kakulangan, ang butang nga sayon sama sa pag-adto sa miting sa sakrament mahimong lisud na kaayo nga buluhaton. Kasagaran, ang isig ka miyembro sa ward gusto nga motabang apan wala makahibalo unsay ilang buhaton.

Kining upat ka mga sugyot gikan sa Church’s Disability Services makatabang usab:

1. Paggahin og panahon nga makasabut sa ilang mga panginahanglan. Sa malumo apan direkta nga paagi pangutana mahitungod sa indibidwal nga may kakulangan ug sa ilang sitwasyon. Sinatia ang inyong kaugalingon sa mga implikasyon sa pisikal, emosyunal, o mental nga nadayagnos niana nga tawo. Ang yanong pag-ila sa miyembro sa ward ug sa iyang mga pakigbisog sa personal nga paagi mao ang usa ka maayong dapit sa pagsugod ug makahatag ninyo og ideya unsaon sa pagtabang ang indibidwal ug ang mga tig-atiman.

2. Tagda kadtong dunay mga kakulangan sama sa inyong pagtagad ni bisan kinsa. Tawaga sila sa ilang ngalan ug paapila sila sa mga panag-istoryahanay. Hinumdumi nga sila mga anak sa Dios. Tutuki unsay mahimo niadtong adunay mga kakulangan.

3. Tanyag og piho nga tabang. Pulihi ang “sultihi ko kon duna ba koy mahimo” sa piho, personal nga tabang. Hunahunaa ang mga butang sama sa, “Makabantay ba ako sa bata alang nimo karong Huwebes sa gabii samtang ikaw moadto sa templo?”

4. Sugod og gamay ug pagmamugnaon. Kon ang usa ka pamilya adunay bata nga anaa sa wheelchair, mahimong mag-andam kamo og lugar para wheelchair sa matag miting sa sakrament. O kon ang usa ka sakop sa klase dili gusto nga mobasa og kusog, hangyoa hinoon sila sa pagtabang sa pagpanghatag sa mga handout.

Samtang maningkamot kamo nga makahibalo unsaon sa pagserbisyo ang mga pamilya ug ang mga tig-amuma niadtong adunay mga kakulangan, ang Espiritu mao ang inyong giya.

Mubo nga sulat

1. Tan-awa sa World Health Organization, “World Report on Disability” (2011), 261.

Unsa Ang Akong Mahimo?

Pagkat-on og dugang mahitungod sa komon nga mga kakulangan ug sa unsa nga paagi kamo makatabang sa disability.lds.org.

Pagdiskobre pa og Daghan

Alang sa dugang nga mga ideya kon unsaon sa pagtabang ang uban sa matinud-anong paagi, basaha ang artikulo sa Liahona ang “Pagtambayayong sa Usag Usa nga mga Alantuson” ni Elder Jeffrey R. Holland.