Pagpadayag alang sa Atong Panahon
Mga handumanan sa mga propeta ug mga apostoles sa 1978 nga pagpadayag
Mga deacon sa Manaus, Brazil, mipaambit sa sakrament. Tungod sa 1978 nga pagpadayag, takus nga mga naghupot sa priesthood sa bisan unsa nga kaliwat makapangalagad sa mga ordinansa sa priesthood.
Ang Pagtinguha
Presidente Spencer W. Kimball (1895–1985)
Ika-12 nga Presidente sa Simbahan
“Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo, ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang buot ipabuhat sa [Dios]. …
“May mahimayaon kaming kasinatian nga ang Ginoo klaro nga mipahayag nga ang panahon miabut na nga ang tanang takus nga mga lalaki ug mga babaye bisan asa mahimong isig ka manununod ug tig-ambit sa hingpit nga mga panalangin sa ebanghelyo. Buot ako nga kamo masayud, isip usa ka espesyal nga saksi sa Manluluwas, kon unsa ang akong gibati nga kaduol kaniya ug sa atong Langitnong Amahan samtang mihimo ako og daghang mga pagbisita didto sa ibabaw nga kwarto sa templo, moadto sa makadaghang higayon sa ubang mga adlaw nga nag-inusara. Giklaro kaayo sa Ginoo ngari kanako unsa ang angay nga buhaton.”
Mga Pagtulun-an sa mga Presidente sa Simbahan: Spencer W. Kimball (2006), 296, 297.
Ang Pag-ampo
Presidente Thomas S. Monson (1927–2018)
Ika-16 nga Presidente sa Simbahan
“Sa pagtapos sa miting uban sa Unang Kapangulohan ug sa Korum sa Napulog Duha, kami adunay espesyal nga pag-ampo didto sa altar [sa templo] diin si Presidente Kimball ang nag-ampo. Nangamuyo siya sa Ginoo alang sa kahayag ug kahibalo bahin niini nga isyu nga adunay importante kaayo nga mga sangputanan. Usa kadto ka tinubdan sa dakong kahupayan nga makadungog sa iyang mapainubsanon nga pangamuyo samtang siya nagtinguha og giya sa iyang halangdon nga calling. …
“Ang Unang Kapangulohan mipadayag dayon og pasalamat nga ‘ang espiritu sa kalinaw ug panaghiusa nga nagpatigbabaw sa miting … mao ang labing nindot sukad ug nga kini [mao] ang ebidensya nga ang Ginoo nahimuot sa among panaghisgutan.’ …
“… Panahon kadto sa kalipay, kay nakadungog kami sa propeta sa Ginoo nga mipahayag sa pagpadayag sa Ginoo niining higayuna.”
Sa Heidi S. Swinton, To the Rescue: The Biography of Thomas S. Monson (2010), 393.
Ang Pagpadayag
Elder Bruce R. McConkie (1915–85)
Sa Korum sa Napulog Duha ka mga Apostoles
“Ang Ginoo sa iyang kaalam mibu-bu sa Espiritu Santo diha sa Unang Kapangulohan ug sa Napulog Duha. … Ang pagpadayag miabut ngadto sa presidente sa Simbahan; miabut usab kini ngadto sa matag indibidwal nga nanambong. Dihay napulo ka sakop sa Konseho sa Napulog Duha ug tulo sa Unang Kapangulohan nga nagpundok. Ang resulta mao nga si Presidente Kimball nasayud, ug ang matag usa kanamo nasayud, independente ni bisan kinsa nga laing tawo, pinaagi sa direkta ug personal nga pagpadayag ngari kanamo, nga ang panahon miabut na sa paghatag sa ebanghelyo ug sa tanang mga panalangin niini ug sa tanang mga obligasyon niini, lakip ang priesthood ug sa mga panalangin sa balay sa Ginoo, ngadto sa matag nasud, kultura, ug kaliwat, lakip sa kaliwat sa mga itom. Walay nangutana bisan unsa kon unsay nahitabo o sa pulong ug mensahe nga miabut.”
“Ang Tanan Managsama ngadto sa Dios” (Brigham Young University devotional, Ago. 18, 1978), 4, speeches.byu.edu.
Ang Kasiguroan
Presidente Gordon B. Hinckley (1910–2008)
Ika-15 nga Presidente sa Simbahan
“Adunay tinahud ug nabalaan nga palibut diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga usa ka kasiguroan nga ang butang nga iyang giampo husto, nga ang panahon miabut na, ug nga karon ang talagsaon nga mga panalangin sa priesthood kinahanglang ihatag sa takus nga mga lalaki bisan asa sa walay pagsapayan sa kaliwatan.
“Ang matag usa nianang nag-alirong nga mga lalaki, pinaagi sa gahum sa Espiritu Santo, nasayud sa samang butang. …
“… Walay usa kanamo nga anaa niana nga okasyon nga mao lang gihapon human niana. Ni ang Simbahan pareha lang gihapon.”
“Priesthood Restoration,” Ensign, Okt. 1988, 70.