Duha ka Misyon, Duha ka Pamilya Napanalanginan

Juan Manuel Gomez, Rosario, Argentina

Samtang nagserbisyo sa Arizona Mesa Mission, pirme kong makadawat og mga email gikan sa akong igsoong babaye sa Argentina. Si Natalia dili miyembro sa Simbahan. Pipila ka tuig na ang milabay, sa dihang namatay ang iyang anak nga babaye, ang among pamilya misulay sa pagpakigbahin sa ebanghelyo ngadto kaniya, pero wala gayud siya mainteresado.

Nagpadayon ko sa pagpakigbahin sa akong pagpamatuod kaniya samtang nagmisyon ko. Sa usa ka email, gisultihan nako siya mahitungod sa usa ka babaye nga nahimamat sa akong kompanyon ug nako. Ang iyang anak nga babaye namatay usab. Nagpamatuod kami sa mahangturong mga pamilya ug mibati siya og paglaum sa unsay among gipakigbahin. Giingnan nako si Natalia nga mao usab ang iyang bation. Mibalos siya og sulat, nagsulti nako nga siya gusto nga mobati niana nga paglaum apan nagtuo nga ang iyang pagtuo dili ingon niana ka lig-on.

Nakahukom ko sa pagpadala ni Natalia og sulat nga gisulat sa kamot nagdapit kaniya sa pag-ampo alang sa panabang nga motuo. Nadasig usab ako sa pagsulat og usa ka paragraph sa Iningles ug kini alang sa misyonaryo. Kahibalo ra si Natalia og Kinatsila, maong giingnan nako siya nga pangitaon ang mga misyonaryo ug hangyoon sila nga mohubad alang kaniya. Nagtuo ko nga ang misyonaryo makamao og Iningles.

Sa wala madugay, nakadawat ko og email gikan ni Natalia. Nakit-an niya ang mga misyonaryo ug mihangyo nila sa paghubad sa akong sulat. Hilom kini nilang gibasa ug mipahiyom. Sa dihang si Natalia nangutana unsay akong gisulat, mitubag sila, “Hisgutan nato kini!” Gisulat nako nga si Natalia naguol sa kamatayon sa iyang anak nga babaye, ug mihangyo sa mga misyonaryo sa pagtudlo kaniya sa plano sa kaluwasan.

Mipakigbahin ang mga misyonaryo og mubo nga mensahe, ug si Natalia nakagusto unsay ilang gitudlo. Dayon gisultihan sila ni Natalia nga ako nagserbisyo og misyon sa Mesa, Arizona, USA. Usa sa elder, si Elder Larson, miingon nga didto siya gikan.

Paglabay sa usa ka tuig nabalhin ko ngadto sa dapit diin magpuyo ang pamilya ni Elder Larson. Akong nakaila ang iyang pamilya ug nakaila usab niya ang akong pamilya, ug ang duha ka pamilya napanalanginan. Si Elder Larson nag-ampo alang sa iyang manghud nga lalaki, nga nakigbisog sa iyang pagpamatuod. Nagkaparis mi isip kompanyon sa iyang igsoon ug mitabang niya nga malig-on ang iyang pagpamatuod. Si Elder Larson ug ang iyang kompanyon nagpadayon sa pagtudlo ni Natalia ug sa katapusan nabunyagan siya. Nasayud ko nga ang Ginoo mipadala namo sa duha ka direksyon, ako sa Arizona, ug si Elder Larson ngadto sa Argentina, aron kaming duha makatabang Kaniya sa pagpalig-on sa among mga pamilya diha sa ebanghelyo.