Mga Hulagway sa Hugot nga Pagtuo

Delva Netane

California, USA

Sila si Delva ug Kirkome Netane malingaw nga mogahin og panahon uban sa ilang mga anak, Teisa (tuo) ug MeLa (wala). Ang pamilyang Netane gipanalanginan og duha pa ka mga anak.

Bisan og ang ikaduhang pagmabdos ni Delva lisud, sila si Delva ug Kirkome mapasalamaton sa mga panalangin nga ilang nadawat. “Kini nga kasinatian nakapasuod sa among pamilya ngadto sa usag usa ug ngadto sa Ginoo,” miingon si Delva.

Nahinumdom sa malisud nga pagmabdos, miingon si Kirkome, “nabalaka ako pag-ayo. Apan ang akong asawa ug ako misalig sa among pagpamatuod sa ebanghelyo. Misalig mi sa paglaum ug miuyon nga kon adunay bisan unsa nga kahigayunan nga among ikahatag sa among anak nga babaye, buhaton namo ang among labing maayo.”

“Usa ka panalangin nga makadula uban ni MeLa kada adlaw ug makakita niya nga mopahiyom,” miingon si Kirkome. “Usa kini ka kanunay nga saksi ngari kanamo nga ang Dios mao ang nagkontrol ug nga ang mga tubag sa mga pag-ampo moabut kanato nga mas klaro ug buhi kay sa bisan unsang butang nga atong mahunahuna.”

Upat ka bulan sa iyang pagmabdos, si Delva giingnan nga ang iyang anak adunay rare chromosome disorder nga gitawag og trisomy 13. Gamay ra ang tsansa nga mabuhi ang bata, ug tungod kay ang kinabuhi ni Delva namiligro usab, ang mga doktor balik-balik nga mitambag kaniya nga ipakuha ang bata. Nag-atubang og walay kasiguroan nga sangputanan, mipili si Delva sa pagsalig sa Langitnong Amahan bisan unsa pay mahitabo.

Christina Smith, tiglitrato

Gisultihan ko nga ang akong anak nga babaye dili makalahutay sobra sa usa ka oras kon mabuhi man gani siya. Ug kon mabuhi man gani, gisultihan ko nga siya walay maayong kinabuhi. Ang akong doktor mitambag gayud nako nga ipahunong ang pagmabdos. Miadto ko og laing doktor ug gisultihan sa samang butang: ipahunong ang pagmabdos.

Dayon miadto ko sa usa ka doktor nga usa ka higala ug miyembro sa Simbahan. Naglaum ko nga ang Espiritu moaghat niya sa paghatag og lahi nga dayagnos. Gitan-aw niya ang tanang mga resulta sa mga pagtesting ug mga ultrasound ug mipadayag sa samang kabalaka sa ubang mga doktor. Apan giingnan ko niya nga magpuasa ug mag-ampo siya alang sa akong pamilya ug manghinaut sa labing maayo.

Nakigkita ko og lain-laing mga doktor ug mga espesyalista sa kinatibuk-an sa akong pagmabdos. Matag higayon mosugyot sila nga ipahunong tungod kay nahadlok sila nga mamiligro ang akong kinabuhi. Apan dili ko ganahan nga mohimo niana.

Ang akong bana ug ako andam nga modawat bisan unsay mahitabo. Kon ang among anak nga babaye mamatay, makahibalo mi nga siya bililhon nga espiritu. Kon mabuhi siya ug mahimo kining pakigbisog, kami adunay hugot nga pagtuo nga masulbad ra namo kini.

Lisud gihapon kadto kaayo. Naningkamot ko nga tagoan ang akong mga emosyon tungod kay aduna koy dos anyos nga anak nga babaye ug dili ko gusto nga makakita siya nga dili nako makontrol ang akong mga emosyon. Wala ko kahibalo unsay buhaton, unsay hunahunaon, o asa mangayo og panabang. Ang akong bana, mga higala, ug pamilya misuporta, apan gibati nako nga wala sila makasabut sa hingpit unsay akong nasinati. Ang bugtong tawo nga tinud-anay nga makasabut mao ang Ginoo. Nag-ampo ko kanunay alang sa kahupayan ug giya.

Sa katapusan, nakigkita ko sa among bishop ug mipasabut unsay nahitabo. Iyang gidapit ang ward sa pagpuasa alang sa among pamilya. Dinhi nagsugod ang akong paglaum. Nagsugod ako sa pagbati sa giya sa kahayag sa langit sa matag desisyon nga kinahanglan nakong himoon.

Sa walo ug tunga ka bulan, miadto ko alang sa 4D ultrasound.

Ang among anak nga babaye mogawas na sa pipila ka semana, ug nakaamgo ko nga mao kini ang katapusan. Gusto usab ko nga i-rekord ang pinitik sa kasingkasing sa akong anak nga babaye aron ibutang sa usa ka teddy bear aron mahinumduman siya.

Sa miaging mga ultrasound, ang mga doktor dili makakita sa bisan unsa nga porma sa lawas. Tungod niini, miingon sila nga ang mga kamot sa akong anak nga babaye putol ug ang iyang nawong ngil-ad. Ang mga imahe sa 4D ultrasound mas detalyado, mao nga sa dihang ang technician nagsugod sa ultrasound, nakita nako ang perpekto nga kamot sa akong anak nga babaye nga nagwara-wara nako diha sa screen. Nakita usab nako ang perpekto nga mga mata ug perpekto nga ba-ba. Gibati gyud nako pag-ayo nga dili siya mamatay.

Sa dihang ang akong anak nga babaye, nga si MeLa, natawo, ang mga espesyalista diha nagpaabut apan wala kinahanglana. Si MeLa walay trisomy 13. Ang mga doktor ug mga espesyalista dili makapasabut kon ngano, apan ang akong bana ug ako nasayud nga kini usa ka milagro.

Pagkatawo ni MeLa, ang mga doktor mirekomendar og dugang nga genetic testing aron pagtino kon aduna ba siyay bisan unsa nga mga pagka-abnormal. Ang mga resulta sa pagtesting nagpakita nga siya adunay talagsaon nga genetic condition. Ang geneticist nabalaka nga si MeLa mabuta, mabungol, ug dili makalakaw ug makasulti. Karon, bisan pa niana, samtang dunay nalangay sa iyang kalamboan, si MeLa makakita, makadungog, ug mogamit og training device aron sa pagtabang niya sa paglakaw. Makasulti usab siya og mga pulong matag karon ug unya. Siya ang labing malipayon nga bata!

Mapasalamaton usab kami kaayo sa mga panalangin nga among nadawat pinaagi niining tibuok proseso. Nasayud kita nga ang Langitnong Amahan mao gayud ang Tiglalang ug katapusang Tighukom sa kinabuhi. Bulahan kami nga nahimong kabahin niini. Matag adlaw motan-aw mi ni MeLa ug nasayud nga siya usa ka milagro. Ang among mga anak nakahatag og kalipay sa among kinabuhi ug nagpahinumdom namo nga kami adunay daghan nga angay pasalamatan.