Sa Pulpito

Nagkahiusa sa Pagbuhat og Kaayohan

Ni Emma Hale Smith

Kining bag-ong paagi naghatag og importansya sa kinabuhi sa mahalarong kababayen-an ug sa ilang mga mensahe, gikutlo gikan sa libro nga At the Pulpit: 185 Years of Discourses by Latter-day Saint Women (2017). Ang pinili nga mga kapitulo anaa sa churchhistorianspress.org/at-the-pulpit.

Mahitungod ni Sister Smith

Nahimamat ni Emma Hale Smith (1804–79) ang iyang bana, nga si Joseph, sa dihang nagpuyo si Joseph sa uma sa mga ginikanan ni Emma sa Harmony, Pennsylvania, USA. Naminyo sila niadtong Enero 18, 1827. Ang inahan ni Joseph, si Lucy Mack Smith, midayeg ni Emma: “Wala ako sukad makakita og babaye sa akong kinabuhi kinsa molahutay sa tanang matang sa kakapoy ug kalisud … uban nianang dili matarug nga kaisug, kadasig, ug pailub.”¹ Si Emma nagtrabaho makadiyot isip usa ka tigsulat sa paghubad sa Basahon ni Mormon. Abli ang iyang panimalay ngadto sa masakiton, sa walay ginikanan, ug sa ubang mga bisita.

Niadtong Hulyo 1830, si Joseph Smith midiktar og pagpadayag ngadto kaniya, nga nailhan karon nga Doktrina ug mga Pakigsaad 25. Napili siya nga presidente sa Female Relief Society of Nauvoo niadtong Marso 17, 1842. Bisan og si Emma nakamiting sa kapunongan og dose lang ka higayon niadtong 1842 ug upat ka higayon niadtong Marso 1844, ang iyang pagpangulo importante sa pag-establisar sa organisasyon.

Ang Nauvoo Relief Society naglihok sa pormat sa panaghisgot kay sa pormal nga mga leksyon. Ang mga pulong ni Emma gikutlo dinhi, nagpakita sa iyang pagpangulo.² Gimintenar ni Emma ang iyang kabuot sa espirituhanong awtoridad, nag-awhag sa mga babaye sa paghinulsol samtang lig-unon nila ang usag usa ug nagpraktis og gugmang putli. Nag-awhag siya og panaghiusa ug nagtudlo sa mga babaye bahin sa kapuangod ug pag-atiman sa kabus.

Paninguha sa Pagbuhat og Kaayohan

[Marso 17, 1842]

“Ang sulti ni President³ Emma Smith nga mohimo kita og butang nga dili ordinaryo. Kon ang usa ka barko makaagi og kusog nga sulog sa mabaw nga bahin nga dunay daghang mga Mormon nga sakay, isipon nato kana nga usa ka panawagan alang sa kahupayan. Paabuton nato ang talagsaong mga okasyon ug dinaliang mga tawag. …

“[Mihimo siya] og pakigpulong bahin sa tumong sa kapunongan, sa mga katungdanan niini ngadto sa uban, sa may kalabutan nga mga katungdanan ngadto sa usag usa, sa ato pa, sa pagpangita ug paghupay sa naguol, nga ang matag sakop kinahanglang maningkamot sa pagbuhat og kaayohan, … [ug] magprangkahay sa usag usa.”

Niadtong Hulyo ug Agosto 1839, ang lungsod sa Commerce (dayon Nauvoo), Illinois, naapektahan pag-ayo sa midagsang nga malaria. Niini nga painting, si Emma anaa sa tunga sa sirkulo sa mga biktima sa malaria, naghatag og tabang ug kahupayan.

Emma Smith, ang Pinili nga Babaye, ni Theodore S. Gorka; kwadro gikan sa Getty Images

Magkahiusa

[Marso 24, 1842]

“Si President E. Smith … mibarug ug miingon nga ang mga plano sa pagpasiugda og panaghiusa niini nga kapunongan kinahanglan atimanon pag-ayo. Nga ang matag miyembro kinahanglang hingpit ang pagkasakop. Isip usa ka kapunongan, [siya] naglaum nga ilang isalikway sa ilang kaugalingon ang tanang kasina ug dautan nga pagbati ngadto sa usag usa, kon aduna man. …

“… Walay usa nga kinahanglang mobati nga magduha-duha sa pagtubag sa mga pangutana mahitungod niini nga kapunongan. Walay bisan unsa nga pribado. Ang mga katuyoan niini mao ang lunsay nga pagkamabination … , ang mga katuyoan niini mao ang pagkamanggihatagon: walay usa ang makasupak sa pagsulti sa maayo, sa pagpugong sa dautan. Naglaum siya nga ang tanan mobati sa ilang kaugalingon nga obligado sa pagsunod niini nga lagda. … Katungdanan [kini] sa matag tawo sa pagpangutana sa kondisyon sa kabus ug pagpresentar sa ilang tinuod nga kahimtang.”

Pagsugod diha sa Panimalay

[Abril 14, 1842]

“Ang tinguha ni President E. Smith mao ang pagbuhat og kaayohan. Nagtinguha nga ang tanang miyembro niini nga kapunongan motabang kaniya. Miingon nga kinahanglan nga sugdan diha sa panimalay, isalikway ang tanang dautan gikan sa atong kaugalingong kasingkasing. … Ipatuman ang panginahanglan sa pagpuyo sa paagi nga dawaton sa Dios.”

Paghinulsol ug Pagbiya

[Mayo 19, 1842]

“Si Mrs. President nagpadayon pinaagi sa pag-awhag sa tanan kinsa nasayop sa paghinulsol ug pagbiya sa ilang mga sala. Miingon nga ang mga kasundalohan ni Satanas batok niini nga Simbahan.”

Magpuyo nga Matarung sa atubangan sa Dios

[Hunyo 23, 1842]

“Si Mrs. President miingon nga nalipay siya nga nakakita sa nagkadako nga panaghiusa sa kapunongan. Naglaum nga kita magpuyo nga matarung sa atubangan sa Dios, sa atong kaugalingon, ug sa kalibutan. … Miingon nga wala kitay laing buhaton kondili mahadlok sa Dios ug motuman sa mga sugo, ug ang pagbuhat sa ingon mouswag kita.”

Pagpalig-on sa Usag Usa

[Marso 16, 1844]

“Si Mrs. President … namulong sa miting bahin sa panginahanglan nga magkahiusa sa ilang kaugalingon ug pagpalig-on sa usag usa aron kita makahimo sa pagbuhat og daghang kaayohan alang sa mga kabus. … Kinahanglan nga magpakita og gugma nga putli sa palibut aron sa pagpanalipod niadtong maghinulsol ug makabuhat og daghan pa. … Mitambag siya nga magsunod sa mga pagtulun-an sa Basahon ni Mormon ug sa Doktrina ug mga Pakigsaad.”

Mubo nga mga Sulat

1. “Lucy Mack Smith, History, 1845,” 190, josephsmithpapers.org.

2. Kinutlo gikan sa Nauvoo Relief Society Minute Book, Mar. 17, 1842–Mar. 16, 1844, 8–[126].

3. Ang babaye nga mga lider sa ika-disenuybe nga siglo sa kasagaran adunay nagkalain-laing mga titulo. Sa Nauvoo Minutes, sa paglain kaniya gikan sa iyang bana, si Emma gitawag nga Presidentess, President Emma Smith, Mrs. President, ug President Smith.