Pagkamatinuoron sa Akong Kaugalingon—ug uban sa Dios
Ang tagsulat nagpuyo sa Utah, USA.
Ang akong garbo nakapugong nako sa pagdawat sa pagbadlong sa bishop nga mao ang kamatuoran—apan makalalis ba ako sa Espiritu Santo?
Mga tunga-tunga na sa akong misyon, ang akong kompanyon ug ako naglisud sa pagpakigtambayayong sa among ward mission leader. Dihay walay pagsinabtanay, mao nga nakahukom mi nga makigsulti sa bishop aron mahibalo unsay among buhaton. Ang akong tinguha, nanghinaut ko nga ang bishop makigsulti kaniya ug sulbaron ang among problema alang namo.
Apan hinoon, ang bishop misulti nako nga ako garbuso ug kritikal kaayo sa uban. Miuli ko nga masuk-anon mibati nga wala masabti ug napakyas—nganong nakasulti man siya niana kanako? Naghunahuna ba kaha siya sa among mga paningkamot sa pagpakigbahin sa ebanghelyo?
Samtang naglakaw mi, akong gisulti ang akong mga pagbati ngadto sa akong kompanyon. Apan sa kalit dihay miabut nga mga pulong sa akong hunahuna: “Ang mga nakasala naghunahuna nga ang kamatuoran malisud” (1 Nephi 16:2). Nakapahunong ni sa akong gihunahuna. Klaro nako nga kana nga hunahuna gikan sa Espiritu. Ang akong garbo nakapugong nako sa pagdawat sa pagbadlong sa bishop nga mao ang kamatuoran—apan makalalis ba ako sa Espiritu Santo?
Sad-an ko, ug ang Dios mipahibalo nako niini.
Pagsalikway sa Paghatag og Kaangayan sa Kaugalingon
Nianang higayuna, makatintal kaayo sa pagbaliwala sa mga butang nga sayop nako pagkabuhat. “Walay usa nato ganahan nga moangkon kon mitipas na kita gikan sa saktong dalan,” uyon si Elder Dieter F. Uchtdorf, sa Korum sa Napulog Duha ka mga Apostoles. “… Agi og sangputanan, kon moaninaw na kita sa atong kinabuhi, kita motan-aw basi sa atong personal nga mga opinyon, sa ikapangatarungan, ug mga istorya nga atong ipanulti sa atong kaugalingon aron makarason sa dili takus nga mga hunahuna ug mga lihok.”1
Sa akong bahin, nakumbinser nako ang akong kaugalingon nga nagbagulbol ko sa pagpalambo sa misyonaryo nga buhat sa among area. Ug kay sa modawat sa matinud-anong pagserbisyo sa among ward mission leader—dili hingpit para nako—kalit nakong nakit-an nga ako dili mapasalamaton, walay pasensya, ug sa prangka nga pagkasulti, dili mabination. Tungod sa pag-aghat sa Espiritu, akong makita ang akong mga aksyon kon unsa gayud kini.
Espirtuhanong Pagsusi sa Tinuod
Ang pagdawat sa maong direkta nga pagbadlong gikan sa Espiritu sakit, apan sa labing maayong paagi. Nakapaamgo kini nako nga kinahanglan akong magmatinuoron sa akong kaugalingon mahitungod sa akong mga sayop.
Personal akong nakahibalo nga ang Espiritu maoy akong labing importante nga higala sa proseso. Gibati nako nga si Elder Larry R. Lawrence sa Seventy direktang naghisgot ngari nako sa dihang gidapit niya ang mga miyembro sa Simbahan nga “mapaubsanong mangutana sa Ginoo sa mosunod nga pangutana: “Unsay nakapugong sa akong pag- uswag?’ … Kon sinsero kamo,” miingon siya “ang tubag magkaanam kaklaro. Pagpadayag kini nga alang ra gayud kaninyo.”2 Nasayud ko nga ako adunay gahum dili lang modawat og mga pag-aghat mahitungod sa akong mga kahuyang apan usab sa pagpalambo niini.
Gikan sa Kahuyang ngadto sa Kalig-on
Ang akong kasinatian nagtudlo kanako nga “kon ang [akong] mga kahuyang ug mga kasaypanan magpabiling masalipdan sa kangitngit, nan ang matubsanong gahum sa Manluluwas dili makaayo ug dili maghimo niini nga kalig-on.”3
Hinoon, kon ako adunay igong kaisug nga mahimong bantang ug modawat sa akong mga kahuyang pinaagi sa pagpaubos, ang Dios makatabang nako nga himoon kini nga mga kalig-on pinaagi sa Iyang grasya (tan-awa sa Ether 12:27, 1 Pedro 5:5).
Human sa tanan, ang pag-ila sa matinuorong paagi sa atong mga kahuyang—o motan-aw sa atong kaugalingon nga unsa kita—mao ang unang lakang sa dalan sa positibo nga kausaban. Samtang magpadayon ko nga magmatinuoron ug magtinguha og giya gikan sa Espiritu, ang akong Langitnong Amahan motabang nako nga makahibalo unsay kinahanglan nga usbon sa akong kinabuhi. Ug samtang mosalig ko ni Jesukristo, ang Iyang Pag-ula, ug ang Iyang makapalimyo nga gahum, makakita ko og kalamboan sa akong kaugalingon.
Bisan og dili sayon nga modawat sa akong mga sayop nianang higayuna sa pagbadlong, nasayud ko nga kon ako mopili nga magpainubsanon ug magmatinuoron sa akong kaugalingon ug sa Dios, mas malipayon ko ug mas modawat sa akong kaugalingon. Nasayud ko nga bisan pa sa akong mga sayop, ako adunay bili ngadto sa akong Langitnong Amahan—apan gusto gihapon Niya nga ako molambo. Pinaagi sa gahum sa Iyang Anak nga si Jesukristo ug sinsero nga paghinulsol, mahimo akong mas maayo pa kay sa akong gidamgo nga ako mahimo.