Ang Simbahan Ania Dinhi?

Jon Evans, California, USA

Paghulagway pinaagi ni Allen Garns

Nagpasakop ako sa Simbahan sa edad nga 36, ug usahay bation nako nga lig-on sa espirituhanon. Sa ubang higayon buhaton lang nako unsay gipaabut nga akong buhaton. Tali sa busy nga iskedyul sa trabaho, ang akong asawa nagsugod og bag-ong trabaho, dili maayong panglawas, ug ubang mga hagit, nagsugod ko sa pagpakigbisog sa espirituhanong paagi. Mosimba ko ug motabang sa pagtudlo sa korum sa mga deacon, apan mao ra kana ang akong mahimo. Wala akoy kalig-on sa pag-abli sa akong mga kasulatan o moluhod aron mag-ampo.

Nakigbisog gihapon ko sa dihang mibiya ko sa usa ka biyahe sa negosyo ngadto sa amihanang Chile. Gikan sa airport sa Copiapó, nagdrayb mi og duha ka oras ngadto sa dapit sa pagtaud sa proyekto sa solar sa Chile’s Atacama Desert. Nasurprisa ko kon unsa ka mingaw kining maong rehiyon, pulos pula nga disyerto nga lapad kaayo. Ang kamingaw sa dapit makahadlok.

Human ang mga usa ka semana sa lugar, nagdrayb mi padulong sa pinakaduol nga lungsod alang sa mga suplay. Didto nakakita ko og building nga nakadapit sa akong pagtagad. Gihangyo nako ang drayber nga mopadaplin. Ang building dunay maanindot nga nataran nga gilibutan og puthaw nga koral. Sa atubangan sa maong building mao ang sinati nga ngalan, “La Iglesia de Jesucristo de los Santos de los Últimos Días” o “Ang Simbahan ni Jesukristo sa mga Santos sa Ulahing mga Adlaw.”

“Ang Simbahan ania dinhi?” Naghunahuna ko. Natingala ko nga ang Simbahan miabut dinhi niining mingaw nga bahin sa kalibutan. Gikuhaan nako og litrato ang meetinghouse ug gi-text kini ngadto sa akong asawa. Ang iyang tubag adunay dakong epekto kanako: “Ang Langitnong Amahan nakahibalo sa Iyang katawhan bisan asa.”

Mao kini ang direkta nga mensahe alang nako gikan sa akong Langitnong Amahan. Ang kabudlay sa inadlaw-adlaw nga pagpuyo, nalimtan nako, ug kinahanglang pahinumduman, nga ang Langitnong Amahan nahigugma sa Iyang tanang mga anak. Gihigugma Niya kadtong mga Santos nianang gamay ug layo nga lungsod sa tunga-tunga sa desyerto, ug Siya nahigugma usab kanako.

Nianang gabhiona miluhod ko ug nagpasalamat sa Langitnong Amahan sa mga panalangin nga Iyang gihatag kanako nianang adlawa. Ang pagkahibalo nga Siya nahigugma kanako nakatabang nako nga mapalig-on nako pag-usab ang akong pagka-espirituhanon, ug nagpadayon kini sa paglig-on nako matag adlaw.