Pagdiskobre sa Inyong mga Gasa

Ni Justina Lichner

Ang tagsulat nagpuyo sa Rhineland-Palatinate, Germany.

Ingon og ang tanan kanunay nga mosulti, “Kon nakahibalo ka lang unsa ka bantugan.” Hinoon, ang tinuod, usahay wala lang gyud ka makahibalo unsa ka bantugan. Kon kamo wala mobati nga kamo ang pinaka-bright, ang pinakanindot, ang pinakamaayog hitsura, ang pinakalingaw, ug ang dunay labing maayong talento, ang atong kasiguroan sa kaugalingon ingon og mawala.

Apan hunahunaa kini: kitang tanan mga anak sa Langitnong Amahan. Sa ingon, gihatagan kita Niya og talagsaong mga gasa ug mga talento aron matabangan kita nga makatuman sa atong balaan nga potensyal. Sa atong pagpangita niini nga mga gasa, gipahinumduman kita sa atong balaan nga bili isip Iyang mga anak, ug kita makahimo sa pagpaduol ngadto Kaniya ug sa pagtabang sa uban sa pagbuhat sa ingon.

Pagdiskobre sa Inyong mga Gasa

Aniay siyam ka mga ideya aron matabangan kamo sa pagdiskobre sa inyong pipila nga dili kaayo klaro nga mga gasa.

1. Hangyoa ang uban nga pahibaloon kamo.

   Usahay dili nato makita ang atong kaugalingon sa unsay makita sa uban kanato. Hangyoa ang usa ka higala, o lider sa Simbahan sa pagsulat ninyo og mubo nga sulat mahitungod sa usa ka gasa o talento nga ilang nakita kaninyo.

2. Pangitaa ang mga gasa diha sa kalisdanan.

   Atol sa malisud nga panahon makapili kita tali sa pagpagawas sa atong labing maayo ug labing dautan nga mga hiyas. Kon lisud ang mga panahon, tutoki ang pagpangita ug paggamit sa inyong labing maayong mga hiyas ug mga gasa.

3. Pag-ampo alang sa panabang aron makaila sa inyong mga gasa.

   Ang Langitnong Amahan nasayud sa atong balaan nga potensyal. Kon kita naglisud sa pagkakita niini sa atong kaugalingon, Siya makatabang. Makaampo kamo alang sa panabang sa pag-ila sa inyong mga gasa.

4. Ayaw kahadlok sa pagbuhat og bag-ong mga butang.

   Palamboon lang ba nato ang mga gasa nga nahibaloan na nato tungod kay nahadlok kaayo ta sa pagbuhat og butang nga wala nato mabuhat kaniadto? Karon mao ang panahon sa pagsulay sa pagbuhat og bag-o ug sa pagdiskobre sa wala mahibaloi nga mga gasa.

5. Siksika ang pulong sa Dios.

   Ang Langitnong Amahan motabang nato sa pagdiskobre ug pagpalambo sa atong mga gasa pinaagi sa mga timailhan nga makita diha sa mga kasulatan—kasagaran pinaagi sa mga pagdapit sa pagbuhat. Tan-awa kini nga kasulatan pananglitan: “Hunong sa pakigbisog sa usag usa; hunong sa pagsulti og dautan sa usag usa.” (D&P 136:23). Unsa nga mga gasa ang inyong mapalambo gikan niini nga pagdapit? Ang gasa sa pagsulti og mabination nga mga pulong, ang gasa sa pagpakalma sa uban, ang gasa sa pagpugong, ug uban pa. Ug kana gikan lang sa usa ka bersikulo! Ang pagbasa sa mga kasulatan ug pagpaminaw sa mga pag-aghat sa Espiritu makatabang ninyo sa pagdiskobre sa inyong mga gasa.

6. Ayaw pagtutok sa inyong kaugalingon.

   Usahay ang atong pinakamaayong hiyas mogawas kon kita wala magtutok sa atong kaugalingon apan nagtutok sa unsa nga paagi kita maningkamot sa pagtrabaho ug pagtabang sa uban. Kon buhaton nato kana, makita nato nga kita adunay daghang Kristohanong mga gasa.

7. Hunahunaa ang mga tawo nga inyong gidayeg.

   Kinsa ang pipila ka tawo nga inyong maayong panig-ingnan? Makahimo kamo og lista sa tanang mga gasa sa mga tawo nga inyong maayong panig-ingnan ug, imbis motutok unsa nga mga gasa nga wala ninyo, pagsaulog sa inyong nadiskobrehan.

8. Hunahunaa ang inyong pamilya.

   Unsa nga mga gasa ang anaa ninyo nga anaa usab sa inyong mga igsoon, mga ginikanan, o mga apohan? Padayon pa! Pagsiksik sa family history, pangita og mga istorya, ug ilha ang daghan pa nga mga gasa nga inyong ipakigbahin sa inyong pamilya.

9. Dawata o basaha ang inyong patriyarkal nga panalangin.

   Ang inyong mga panalangin mahimong naghisgot mahitungod sa inyong mga gasa ug kinahanglan palamboon, ug mahimo usab nga motudlo kini ngadto sa dalan nga mogiya sa pagkadiskobre sa laing bag-ong mga gasa ug mga talento.

Pagpahingpit diha Kaniya

Dili kinahanglan nga kita ang labing maayo sa tanan aron mahibalo nga kita angayan nga mga anak sa Dios. Kinahanglan lang nga kita mahalaron sa pagpangita ug pagpalambo sa atong mga gasa ug mga talento—dayon, pinaagi sa Pag-ula ni Jesukristo, mahimo kitang hingpit diha Kaniya (tan-awa sa Moroni 10:32).

Ang Tinguha sa Pagdiskobre

“Nasayud ko nga ang atong Langitnong Amahan adunay daghang mga gasa ug mga talento nga gusto Niya nga ihatag kanato, apan “kini dunay kondisyon sa atong pagpangayo niini. Ang mga panalangin nagkinahanglan og trabaho o paningkamot sa atong bahin’ (Bible Dictionary, ‘Prayer’).”

Elder Mervyn B. Arnold sa Seventy, “Asa Man Ko? Unsaon sa Pagdiskobre ug Pagpalambo sa Inyong Espirituhanong mga Gasa ug mga Talento,” Liahona, Dis. 2014, 61.

Tabangi ang Uban sa Pagdiskobre og mga Gasa

Makakita kita og mga butang sa uban nga dili nila makita sa ilang kaugalingon. Niining semanaha ipakigbahin kadto nga mga butang uban sa higala o sakop sa pamilya. Aniay pipila ka mga pangutana nga ipangutana sa inyong kaugalingon nga makatabang ninyo sa pagdiskobre sa ubang mga gasa.

1. Unsay ilang nahimo sa pagtabang kaninyo?

2. Unsa ang inyong nagustuhan kanila?

3. Unsa nga butang nga maayo sila?

4. Unsay ilang gipaningkamutan nga mahimong mas maayo pa?