Pagserbisyo sa Simbahan
Diin Kita Gikinahanglan
Ang mga tagsulat nagpuyo na karon sa Massachusetts, USA.
Usa ka pag-aghat nga mobalhin ngadto sa Brooklyn, New York, migiya namo sa pagserbisyo ug mga panalangin nga dili unta namo mahunahuna.
Litrato sa Eyi family
Niadtong 2013 nagpuyo mi sa Manhattan, New York, USA. Gimahal namo ang among ward. Tungod kay nagpaabut na mi sa among unang anak, nagsugod mi sa pagpangita og mas dako-dako nga apartment diha sa ward. Nakakita mi og usa nga ingon og perpekto na apan dili maayo ang pagbati.
Niana nga tingpamulak, si Laura nagsugod sa pagbati nga tingali kinahanglan kaming mobalhin ngadto sa Brooklyn. Dili sigurado si Wil. Kami walay nahibaloan og bisan unsa sa Brooklyn, ug si Wil gusto nga duol ra siya sa iyang trabaho sa investment-banking aron nga, sa iyang taas nga oras sa pagtrabaho, kadiyot ra siya mobiyahe. Nakahukom mi sa pag-ampo mahitungod niini ug maminaw sa tubag atol sa kinatibuk-ang komperensya.
Samtang nagtan-aw kami sa mga pakigpulong sa usa ka laptop sa among studio apartment, si Elder Stanley G. Ellis sa Seventy mipakigbahin og kasinatian nga iyang nasinati isip sakop sa kapangulohan sa stake. Miingon siya nga ang mga pamilya nga mobalhin ngadto sa iyang stake sa Texas, USA, kasagaran mangutana unsa nga ward ang labing maayo. Kausa ra sulod sa 16 ka tuig nga ang usa ka pamilya nangutana unsa nga ward ang nagkinahanglan og tabang.1
Natandog kami niini nga istorya. Nakatubag kini sa among pag-ampo. Mao nga, imbis nga magpabilin sa ward nga among giganahan, nga komportable kami, ug adunay nindot kaayo nga nursery ug Primary, kinasingkasing namong gidawat ang tambag ni Elder Ellis ug nag-ampo mahitungod kon asa kami mobalhin.
Nianang higayuna, nagserbisyo kami isip mga ordinance worker sa Manhattan New York Temple. Usa sa mga worker didto suhito kaayo sa siyudad sa New York. Misugyot siya og duha ka ward diin kami mahimong makatabang—ang duha didto sa Brooklyn.
Ang unang ward layo na kaayo sa trabaho ni Wil. Ang ikaduha mas duol-duol, ug gibati namo nga nakita ang sakto nga lugar sa dihang among gibisitahan ang sakrament miting sa ward. Kadaghanan sa mga miyembro mga Haitian nga mga langyaw. Tungod kay si Wil gikan sa Gabon ug makasulti og French, naghunahuna mi sa ward nga nindot alang namo.
Talagsaong mga Kasinatian
Pipila ka semana ang milabay nakakita mi og apartment ug mibalhin. Sa wala madugay si Wil gitawag sa lain-laing makahuluganong mga paagi. Ang pagsabut sa pinulongan milungtad og dugay-dugay, apan mibati siya nga napanalanginan nga daling nakamao sa Haitian Creole sa pagtabang sa paghubad alang sa mga miyembro atol sa mga miting ug mga interbyu. Napanalanginan usab si Laura sa pagserbisyo og nagkalain-laing mga kapasidad, ug kami miapil sa misyonaryo nga buhat.
Usa sa among nahimong higala mao ang batan-ong investigator nga ginganlan og Normil Romelus, nga gikan sa Haiti aron moeskwela. Mobisita siya sa among balay uban sa mga misyonaryo, ug kami motabang sa pagtudlo kaniya sa French ug Creole. Human mabunyagi si Normil, mi-sponsor mi niya sa programa sa Church’s Pathway, diin iyang nahimamat ang iyang umaabut nga asawa. Gibati namo nga mapasalamaton sa pagtambong sa ilang kasal sa Manhattan Temple.
Nahimamat usab namo ang usa ka matinud-anon nga sister kinsa mianha sa New York gikan sa Haiti aron magpatambal sa kanser. Atol sa iyang pagpuyo, ang ward council mibuhat sa tanan sa pagtabang kaniya ug sa pagsiguro sa iyang gikinahanglan, lakip sa transportasyon padulong ug gikan sa iyang pagpatambal. Napanalanginan kami sa pagserbisyo ug sa pagbisita kaniya niining higayuna. Naglaum nga nindot ang resulta, apan namatay siya.
Kadtong duha ka mga kasinatian nagrepresentar unsay gihimo sa ward alang sa mga tawo—motabang ug mobayaw nila. Mapasalamaton kami niini ug sa ubang talagsaong mga kasinatian.
Unsa Gayud ang Labing Mahinungdanon
Nakat-unan namo nga kon kita moserbisyo sa Ginoo ug sa Iyang mga anak, Siya moatiman nato. Ang among kasinatian sa Brooklyn nakatabang namo nga mabutang sa saktong panglantaw. Nakatabang kini ni Wil nga dili kaayo magpadala sa maanindot nga kahimtang sa pagtrabaho sa Wall Street ug mahinumdom unsay labing importante. Sa investment banking, hapit ang tanan nagtrabaho sa Dominggo. Si Wil usahay kinahanglang motrabaho sa balay, apan ang Ginoo mipanalangin namo aron nga siya dili na moadto sa opisina sa Dominggo.
Sa dihang mibalhin mi sa Brooklyn, nagtuo mi nga usa mi sa duha ka pamilya nga dunay gagmay nga mga bata sa ward. Apan ang mga utlanan sa ward nausab, ug pipila ka lain-laing batan-ong mga pamilya ang mibalhin usab.
Sa katapusan, gusto namo nga mobalhin ngadto sa Gabon. Gibati namo nga ang among mga kasinatian sa Brooklyn nakatabang nga maandam mi nga makaserbisyo og mas maayo sa Simbahan ug sa mga tawo nga gikan sa Africa. Mapasalamaton mi nga misunod sa pag-aghat nga mobalhin. Ang Ginoo mipanalangin namo—ug nagpadayon sa pagpanalangin namo—sa mga paagi nga dili namo mahunahuna.