Gikan sa Natad sa Misyon
Dugang nga Tabang
Ang tagsulat nagpuyo sa Iowa, USA.
Sa inyong misyon, siguro makasugat mo og mga investigator kinsa nagkinahanglan og usa ka tawo sa ilang kiliran, andam nga moapil sa proseso uban nila.
Litrato sa scuba diver pinaagi sa Getty Images
Misawom ko sa akong kaugalingong gikusgon. Lima ka pye (1.5 m) … gibati nako ang kakusgon sa sulog. Karon napulo ka pye. Sa kalit mingitngit. Gibati nako nga nahutdan ko sa akong ginhawa. Kining bugnaw kaayo, mangiub nga kadagatan dili sama sa pool nga among gipraktisan. Nahadlok ug mibati nga gianud sa tubig dali kong misaka padulong sa ibabaw.
“Unsay nahitabo?” ang assistant sa magtutudlo nangutana nako. Mga luha miagas sulod sa akong maskara. Diha ko sa tunga-tunga sa akong scuba-diving certification exam, nagpahigayon og 30-ka pye (9 m) nga pag-dive, usa sa gikinahanglan nga kahanas aron makapasar sa eksamin. Ang assistant nakakita sa akong pagkatarantar ug mipaniguro nako nga OK ra. Nag-awhag siya, pero wala mamugos. Gani dihay higayon nga misulti siya nako, “Mahimo rang dili ka mohimo niini.” Diha akong naamgohan nga gusto nako kining buhaton.
Nakahibalo ko nga bisan og kini lisud alang nako, gusto kong molampus niini; gusto nakong makuha ang certification. Mao nga gikontrolar nako ang akong kahadlok ug mikompleto sa nahibilin nga mga kahanas uban sa klase sa pagpasar sa eksamin. Lisud kadto, apan uban sa pipila ka pag-awhag nahimo nako kini.
Paglabay sa pipila ka bulan samtang nagserbisyo ko isip misyonaryo sa Peru, nahinumduman nako ang akong malisud nga kasinatian sa scuba-diving samtang nagdapit ko sa mga tawo sa pagpalig-on sa ilang pagtuo ug mag-usab sa ilang kinabuhi. Usa ka pamilya nga ganahan nga bisitahon sa akong kompanyon ug nako mao ang Rumays. Sila si Carina ug Enrique ug ang ilang tin-edyer nga mga anak nga babaye, sila si Karen ug Nicole, miabi-abi namo kanunay ug dali kaming nakagusto nila. Dili pa dugay nga sila si Carina, Karen, ug Nicole midawat sa ebanghelyo ug nagpasakop sa Simbahan.
Hinoon, si Enrique nagkinahanglan og dugang nga tabang. Ang among mensahe lahi gikan sa unsay iyang namat-an, mao nga milungtad og taud-taod nga makuha namo ang iyang pagsalig. Adunay daghang lain-laing mga kabalaka si Enrique. Ang pinaka-aspeto sa ebanghelyo nga nakasamok kaniya mao ang Basahon ni Mormon. Wala gayud siya makadungog niini nga basahon ug naglisud sa pagbasa ug pagsabut niini. Ang pagkadili sinati maoy nakahimo ni Enrique nga mibati og walay kasiguroan.
Nianang puntuha, si Enrique sama kanako sa dihang milangoy kog balik paingon sa ibabaw sa tubig: ang uban sayon ra kaayong misawom, samtang ako nangurog sa kahadlok. Sama usab nako, ang tanan nga gikinahanglan ni Enrique aron magmalampuson mao ang dugang nga tabang.
Kini nga tabang miabut ngadto kaniya sa lain-laing paagi. Dunay mga misyonaryo nga motabang kaniya nga motubag sa iyang mga kabalaka ug mobati sa Espiritu. Duna usab siyay mga miyembro sa ward nga nakigda-it kaniya ug mitudlo kaniya mahitungod sa iyang tahas isip usa ka amahan. Ang labing dakong tabang sa tanan, mao ang kaugalingong pamilya ni Enrique.
Bisan sa wala pa ang ilang bunyag, ang Rumays aduna nay kinaiya sa paghimo og pag-ampo sa pamilya ug pagtuon sa kasulatan. Ilang gihatagan si Enrique ug set sa mga kasulatan nga dunay dagko nga mga letra ug audio nga bersyon aron nga siya makatuon sa Basahon ni Mormon sa mas sayon nga paagi. Kining yanong mga paningkamot nakatabang og dako ni Enrique. Walay higayon nga dunay namugos niya; gisuportahan lang nila siya. Pinaagi sa ilang mga aksyon, gisultihan nila siya, “nakahibalo mi makahimo ra ka niini.”
Nakatabang kini ni Enrique sa pagdiskobre sa iyang kaugalingon ang gahum sa Basahon ni Mormon. Usa ka adlaw mipahibalo siya nga naminaw siya sa tibuok basahon ug nga nasayud siya nga pulong kini sa Dios. Mga upat ka bulan human sa bunyag sa iyang asawa ug mga anak, gihimo ni Enrique ang sama nga lakang ug nabunyagan usab.
Miingon si Enrique nga mapasalamaton siya sa tabang ug pasensya nga iyang nadawat nga nakapahimo niya nga moabut asa siya karon. Isip usa ka misyonaryo, gibati nako nga napanalanginan nga makasaksi sa ehemplo niini nga pamilya sa gugma samtang ilang gitabangan ang iyang bana ug amahan nga makabuntog sa iyang mga pagduha-duha. Mapasalamaton usab ako nga nakasinati ko og mahagitong scuba-diving nga nakatugot nako nga makatabang ni Enrique sa gamay nga paagi ug sa unsa nga paagi nga ang ubang mga investigator mobati atol sa proseso sa pagkakabig.
Samtang modapit kamo sa mga tawo sa paghinulsol ug mag-usab diha sa imong misyon, hinumdumi nga usahay ang tanang mga tawo kinahanglan nga magmalampuson sa pipila ka dugang nga pag-awhag. Tingali magkinahanglan sila og usa ka tawo nga kasaligan ug sinati diha sa ilang kiliran nga mag-ingon, “OK ra ang tanan. Nasayud ko nga makahimo ka niini. Mituo gayud ko nimo.” Naglaum sila nga kamo kanang tawhana kinsa andam moapil sa proseso uban kanila, motabang kanila nga makamao og bag-ong mga kinaiya ug mga kahanas, ug makatabang nila nga makaangkon og certification, nga mao gayud ang pagtugot sa Ginoo.