Ang Langitnong Amahan Nakaila Kaninyo

Ni Sister Cristina B. Franco

Ikaduhang Magtatambag sa Kinatibuk-ang Kapangulohan sa Primary

Kada Dominggo sa gamay nga lungsod sa Argentina, usa ka grupo sa mga tawo nagpundok sa ilawom sa kahoy aron sa pagbasa sa mga kasulatan ug magkat-on sa ebanghelyo. Ang ubang mga tawo mga miyembro sa Simbahan. Apan daghan kanila wala pa mabunyagi, ug gusto na kaayo sila nga magpabunyag!

Duna lang silay problema. Layo kaayo ang ilang gipuy-an gikan sa ubang mga lungsod. Walay mga lider sa Simbahan ang mibisita sa ilang lungsod taud-taod na.

Dayon nakadungog sila nga pipila ka mga misyonaryo anaa sa lungsod mga upat ka oras ang gilay-on. Silang tanan mihatag og kwarta aron ang usa ka tawo makapalit og tiket sa bus padulong sa lungsod nga tua ang mga misyonaryo. Sa pag-abut niya didto, naghulat siya sa estasyunan sa bus. Nagtuo siya nga kadto ang labing maayong dapit nga makita ang mga misyonaryo.

Human sa duha ka oras, nakita niya ang duha ka batan-ong lalaki. Sila mao ang mga misyonaryo! Gisultihan niya sila mahitungod sa mga tawo sa iyang lungsod. Mao nga ang mga misyonaryo ug ang presidente sa misyon nagplano nga mobiyahe didto aron mahimamat kining mga tawhana.

Sa adlaw nga ang presidente sa misyon ug ang mga misyonaryo miabut, daghang mga tawo ang nagpundok aron sa paghimamat kanila. Karon kadtong wala mabunyagi mahimong bunyagan. Human sila matudloi sa mga leksyon, andam na sila!

Ang pinakaduol nga sapa layo pa kaayo, mao nga nagbomba sila og tubig gikan sa puso ug gipuno ang portable nga swimming pool. Miabut og tulo ka oras ang pagpuno sa pool! Ang tanan, 27 ka mga babaye, mga lalaki, ug mga bata ang nabunyagan nianang adlawa. Napuno sila sa kalipay!

Nasayud ang Langitnong Amahan nga kining mga tawhana gusto nga magpabunyag, ug gitabangan Niya sila nga makita ang mga misyonaryo. Ang Langitnong Amahan nakaila usab kaninyo. Nakahibalo Siya asa kamo ug kinsa kamo ug unsay inyong gikinahanglan. Siya makadungog ug motubag sa inyong mga pag-ampo. Bisan unsa pay inyong gibati nga kamingaw, anaa Siya kanunay. Wala gayud kamo mag-inusara. Makaduol kamo Kaniya kanunay.