Kanunay nakong ikomparar ang akong kaugalingon ngadto sa uban, ilabi na niadtong morag dunay hingpit nga kinabuhi. Unsaon nako nga mobati nga mas masaligon?”
Litrato gikan sa Getty images
Pag-ampo nga Makahibalo sa Imong mga Gasa
Ikaw adunay daghang mga talento ug espirituhanong mga gasa nga personal nga gihatag sa Langitnong Amahan kanimo. Adunay mga paagi nga ikaw lamang ang makapanalangin sa mga kinabuhi sa ubang mga tawo. Mao kini ang plano sa Langitnong Amahan. Pag-ampo aron makahibalo unsa nga mga gasa ang gihatag kanimo, ug kon ikaw nagkinahanglan og dugang nga giya, pangutan-a kadtong imong suod. Pinaagi sa pagpaminaw sa Espiritu ug pagpaningkamot sa pagdiskobre sa imong mga talento ug balaang mga hiyas, makakita ka og pagsalig sa imong kaugalingon nga wala nimo sukad makit-i kaniadto.
Amy P., edad 17, Kentucky, USA
Ila-ilaha Sila og Maayo
Sa dihang makamatikod ko nga akong gikomparar ang akong kaugalingon ngadto sa lain, maningkamot ko nga makaila pa og gamay niana nga tawo. Kon makaila nako sa akong “idolo,” klaro na kaayo ang kamatuoran nga ang matag binuhat dinhi sa yuta mag-atubang og mga pagsulay sa ilang kinabuhi. Kon magsige ko og istorya niana nga tawo, mas magsugod ko sa pag-ila nila isip higala ug dili usa ka tawo nga walay sayop.
Amelia C., edad 15, Idaho, USA
Ang Opinyon Lamang sa Langitnong Amahan ang Importante
Sa iyang Oktubre 2016 nga pakigpulong sa komperensya “Igo ba ang Akong Kamaayo? Makasulod Ba Ko Didto?” Si Elder J. Devn Cornish sa Seventy miingon, “Ang bugtong opinyon nga importante kanato mao ang unsay hunahuna sa atong Langitnong Amahan kanato. Palihug pangutan-a Siya sa sinsero nga paagi kon unsay Iyang hunahuna bahin ninyo. Mohigugma ug mokorihir Siya apan dili mopawala sa atong kadasig.” Kon maghunahuna ko nga ako dili gayud sama ka maayo sa mga tawo sa akong palibut, moduol ko sa Langitnong Amahan ug maningkamot sa paghinumdom nga ako usa ka anak sa mahigugmaong Dios kinsa andam nga motabang nako nga maabut ang akong hingpit nga potensyal ug mahimong sama, kinsa Siya nakahibalo nga ako mahimo kon ako magtinguha Kaniya.
Amanda M., edad 19, Paraná, Brazil
Pag-ampo alang sa Pagsalig
Kaniadto akong ikomparar ang akong kaugalingon ngadto sa uban kinsa sa akong hunahuna maayo og kahimtang kay kanako, ilabi na sa mga tawo kinsa adunay mas daghang kwarta. Kon mag-ampo ko sa Langitnong Amahan, hatagan ko niya og pagsalig sa akong kaugalingon. Nasayud ko nga bisan unsa pay hagit, ang Dios motabang nako tungod kay Siya dili mohatag nato og katungdanan gawas nga Siya moandam og paagi alang nato nga matuman kini (tan-awa sa 1Â Nephi 3:7; 17:3).
Joshua O., edad 19, Lagos, Nigeria