Fesili mo Faatalanoaga

Afai ua e filifili e auauna atu i se misiona, e te manaomia ma ou taitai o le Ekalesia lenei taimi paia o le auaunaga ina ia fiafia ma musuia. I le iai o lena faamoemoega i le mafaufau, e taua ia te oe ona saunia, agavaa, ma mafai ona auauna atu.

Ina ia fesoasoani ia te oe ina ia saunia, o fesili nei o le a fesili mai ai lau epikopo po o le peresitene o le paranesi e fua iai lou saunia. E mafai ona e faatalatalanoaina nei fesili i soo se taimi ma ia ma ou matua po o taitai o le Ekalesia.

Agavaa ma le Molimau

1. Pe i ai sou faatuatua ma sau molimau i le Atua le Tama Faavavau; o Lona Alo, o Iesu Keriso; ma le Agaga Paia?

Molimau: “Tofotofo i au upu, ma faaaoga sina vaega itiiti o le faatuatua, ioe, e tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe, seia oo lava ina ia e talitonu ai i se ala e mafai ai ona e tuu ane o se avanoa mo se vaega o au upu” (Alema 32:27).

2. Pe i ai sau molimau o Iesu Keriso ua na o le pau lea o le Alo e Toatasi na Fanaua a le Atua ma o le Faaola ma le Togiola o le lalolagi? Faamolemole faasoa mai lau molimau ia te au. Na faapefea ona aafia lou olaga e le Togiola a Iesu Keriso?

3. O le a le uiga ia te oe ia salamo? Pe ua e lagonaina ua e salamo atoatoa i au solitulafono ua mavae?

Salamo:

“O le mea lenei e mafai ai ona outou iloa pe afai ua salamo se tagata i ana agasala—faauta, e tautau atu e ia i latou ma lafoai i ai” (MF&F 58:42–43).

4. E mafai ona e faasoa mai lau molimau ia te au ua toefuatai mai le talalelei ma le Ekalesia a Iesu Keriso e ala mai i le Perofeta o Iosefa Samita ma o le Peresitene Russell M. Nelson o se perofeta a le Atua?

5. Pe iai sau molimau i le faamaoni o le Tusi a Mamona?

6. O auaunaga faafaifeautalai faamisiona e manaomia le ola ai i tulaga faatonuina o le talalelei. O le a sou malamalama e uiga i tulaga faatonuina nei?

a. O le tulafono o le legavia

E tusa ai ma le tulafono o le legavia, na e ola ai i taimi uma e tusa ai ma mea na talanoaina? Afai e leai, o le a le umi talu ona tupu le solitulafono? O le a se mea na e faia ia salamo ai?

Tulafono o le legavia: “O le legavia o le mama mai feusuaiga, o se tulaga e ‘fiafia i ai le Atua’ (Iakopo 2:7). Ina ia ola mama, e ao ona e mama i ou mafaufauga, upu, ma gaoioiga. E le tatau ona e faia ni sootaga tau feusuaiga ae e te le i faaipoipo faaletulafono” (Faamaoni i le Faatuatua: O Se Tusitaiala o le Talalelei [2004], 29).

e. Aloese mai ponokalafi

Aloese mai ponokalafi: Sa faamatala mai e Peresitene Dallin H. Oaks o le Au Peresitene Sili e faapea o le auai i le ponokalafi e fua i se faatulagaga e mai le le fuafuaina i le faaaogaina e faigata ona taofia, po o le vaisu. O le iloa o le malosi o le auai e fesoasoani e maua ai le fofo talafeagai. Aoao atili i le “Faamaloloina Mai le Mailei o Ponokarafi,” Liahona, 2015 Oke. 50–55; ma le overcomingpornography.org.

i. O le tulafono o le sefuluai

o. O le Upu o le Poto, e aofia ai le faaaogaina o vailaau faasaina po o le soona faaaogaina o fualaau ua fautuaina.

u. Tausia o le aso Sapati ia paia

f. Ia faamaoni i au upu uma e te tautala ai ma mea uma e te faia

Ua e ola e tusa ai ma nei tulaga faatonuina uma? O e ola nei e tusa ai ma ia mea? Pe o le a e ola e tusa ai ma na mea i le avea ai ma se faifeautalai faamisiona?

Taumafaiga ma Agavaa

7. O i ai ni ou moliaga faaletulafono o loo faatalitali e faasaga ia te oe?

8. Na e faia ea se soligatulafono matuia o tulafono tau solitulafono, tusa lava pe na lokaina oe pe leai, sa molia oe, pe na tapeina le faamaumauga?

9. Na e faia ea ni feusuaiga faasaua i se tamaitiiti i soo se auala, e tusa lava pe na molia oe pe leai, na faamaonia, pe na tapeese ia faamaumauga?

10. Na e solia ea soo se isi soligatulafono matuia po o se mea sese lea na tatau ona foia a o lei faia lau misiona?

11. Pe o e lagolagoina, faifaimea faatasi, pe o malilie faatasi ma soo se vaega po o ni tagata taitoatasi o a latou aoaoga po o mea ua latou faia e tetee pe faasagatau ai i aoaoga ua taliaina e Le Ekalesia a Iesu Keriso o le Au Paia o Aso e Gata Ai?

12. E i ai nisi au aitalafu e lei totogiina? O le a faapefea ona totogiina faauma nei aitalafu a o lei amataina lau misiona po o le taulimaina a o e auauna atu i se misiona?

13. O e maua pe na maua i soo se tulaga faaletino, faalemafaufau, pe faalelagona lea e faafaigata ai mo oe le faatumauina o se faasologa o taimi masani faafaifeautalai, lea e manaomia ai lou galue mo le 12–15 itula i le aso, e aofia ai le suesue mo le 2–4 itula i le aso, savali po o le tietie i le uila e oo atu i le 8–10 itula i le aso, ma isi mea?

O le tele o tulaga o le le agavaa ma le soifua maloloina o le a fai ma faalavelave ia te oe mai le auauna atu o se misiona tauleleia e mafai ona foia. Saili le fesoasoani e te manaomia. Afai ua faaauau pea ona iai ni faaletonu o lou soifua maloloinia i le taimi ua e sauni ai e auauna atu, ia faailoa atu i lou epikopo po o le peresitene o le paranesi. O le a mafai ai ona iloilo e le Ekalesia lou tulaga a o le i valaauina oe i se misiona. Mo se faataitaiga, tagai i le tala a Sister Fletcher o lo o mulimuli mai i nei fesili.

14. Na suesueina ea oe ma maua ai ni togafitiga mo le dyslexia po o nisi faaletonu o le faitautusi? Afai o lea, o e maua le toafimalie e faitau leotele ai tusitusiga paia ma isi tusitusiga? E te talitonu e mafai ona e taulotoina ni mau talafeagai ma isi faamatalaga faatasi ai ma le fesoasoani a lau soa? O a ni auala o e faia i le taimi nei e faaleleia ai lenei faaletonu?

15. Na i ai se taimi na e maua ai pe na faia ai se togafitiga mo se faaletonu i le tautala? Afai o lea, o e maua le toafimalie e tautala atu i luma o isi? O e lagona ua ia te oe ni meafaigaluega talafeagai e fesoasoani ia te oe e aoao ai, aoao atu, ma fesootai ai?

16. Na i ai se taimi na e inu ai ni vai po o ni fualaau po o le togafitia foi mo soo se tulaga nei: faaletonu e aafia ai le le nofo lelei (ADD), faaletonu e aafia ai le pulea e oe lava oe (ADHD), atuatuvale, faanoanoa, atuatuvale sili (OCD), faaletonu e aafia ai fesootaiga ma le tautala (e aofia ai le Asperger)? Afai e ioe, faamolemole faamatala mai.

17. Afai sa faia ni ou togafitiga mo se tasi o nei tulaga ma ua le o toe faaauauina, pe o le vaaiga a se fomai na mafua ai ona le toe faaauauina? Afai e leai, aisea na e taofia ai? O le a le tulaga manuia o lou soifua e aunoa ma le togafitiga po o vailaau faafomai? O le a le taimi mulimuli na e faaaoga ai vailaau faafomai mo nei faaletonu?

Saili vitio ma isi punaoa e saunia ai mo se misiona i le lds.org/go/81850.