4 na Lesoni mai vei Josefa Simici ena Nona Kauta mai na Vola i Momani

Mai vei Mckenna Clarke

Mekasini ni Lotu

Ni se qai yabaki 24, e sotava o Josefa Simici na veibolebole ena nona cakacaka me vakayacora na i vakaro ni Kalou. Ia, sa vorata o koya na dredre kecega ena veivuke ni Kalou, ka sa rawa talega vakakina vei keda.

young adult woman holding an old Book of Mormon

Ni da itabagone qase cake, eda na kerei beka meda cakava na ka ena via dredre me vakayacori ke sega na veivuke ni Kalou. Me vakataki, Josefa Simici, ni se qai yabaki 24, e sotava na veibolebole ka vakila ni sega ni veiganiti ena nona sasaga me vakavotukanataka na ivakaro bibi—ena kena tabaki na vakadewa ni Vola i Momani. Ia, ena veivuke ni Kalou, e vakacavara o koya na veika kece e kerei vei koya, na nona ivakaraitaki e laurai kina eso na sala ena rawa kina meda rawata kina na veika e sega ni rawa ni sega ni tiko kei keda na Kalou.

E sega ni gadrevi meda cecere me rawa ni vakayacora vei keda e dua na cakamana na Kalou. Ena gauna e vakarau tiko kina o Josefa me tabaka na iVola i Momani, e se qai tabagone qase cake ka sega vua na ilavo se vuli vinaka—ka qai sega sara na kila me baleta na vakavakadewa kei na tabaki ni veitukutuku maroroi bibi vakaoqo. E toso tikoga ena vakabauta kei na isolisoli kei na kaukauwa ni Kalou me vakacavara na cakacaka e kerei vei koya. Kevaka eda nuitaka na Tamada Vakalomalagi, ena vatara vei keda o Koya meda vakayacora na Nona cakacaka.
Ni solia vei keda na Kalou e dua na itavi, ena vakarautaka na sala o Koya meda na rawata kina. Kivei Josefa, na kena tabaki e 5,000 na ilavelave ni dua na ivola e 590 na kena draunipepa e dua beka na itavi levu ka sega ni rawa. Ia, ni sa yaco na gauna me tabaki kina na veika sa volai, e vakauqeti Martin Harris na Turaga me vesuka na baqe nona vanua ni teitei, me rawa ni vakarautaki kina e $3,000 (e tautauvata kei na $76,000 nikua) me vukei Josefa ena kena vakavotukanataki na nona inaki. Me vaka e vakavulica o Nifai, “e sa vakarautaka na [Turaga] na sala me ra rawata kina na ka sa vakarota vei ira ko koya” (1 Nifai 3:7). E biuta mai na Tamada Vakalomalagi na ivurevure kece ni veika e gadreva o Josefa me rawa ni vakaotia na itavi oya. Ena vakayacora talega vakakina vei keda o Koya.
E dau solia talega na Kalou meda tovolea tale vakarua. Eso na cala e vakayacora o Josefa Simici ka vakavuna na kena yali na 116 na draunipepa ni Vola i Momani. Baleta ni vakayalia na 116 na draunipepa, e vakayalia talega o Josefa na isolisoli ni vakavakadewa ena dua na gauna. Ia, baleta ni digia o koya me veivutuni, e yaco me qai vosoti ka qai soli tale vua me tovolea tale vakarua me vakacavara na nona ilesilesi. E kaya na Turaga, “Ia mo nanuma, na Kalou sa rui yalololoma; o koya, mo veivutunitaka na veika ko sa cakava ka sega ni salavata kei na ivakaro kau sa solia vei iko, ka mo digitaki tikoga kina, ka kacivi tale ki na cakacaka.” (D&C 3:10). Ena vakasinaiti na noda bula ena cala ena bula oqo, ia, ni da sa veivutuni ka tikora donu na yaloda ena vanua donu, ena dau solia vei keda na Turaga e dua tale na gauna meda tovolea tale.
Na noda vakanamata ki na yalayala ni reki ena rawa ni vukei keda meda lako curuma na veibolebole. Ena veibolebole kece e sotava o Josefa, e ciqoma o koya e vuqa na veivakalougatataki ka vakila na reki dina ena gauna taucoko e cakacaka tiko kina me vakavotuya mai na iVola i Momani. Ni sa tabaki oti na iVola i Momani, e tauyavutaki na Lotu ka sa papitaiso na itubutubu nei Josefa. Ena siga oya, e lako duadua yani kina veikau o Josefa ka tekivu tagi ena marau. Kevaka eda toso tikoga ena noda sotava tiko na veivakatovolei ka taura cake tu na uluda, ka biuta taucoko tu vua na Kalou na noda nuinui, ena rawa ni da kunea na reki kei na vakacegu.